အမေရိကန်ရှိ ကွန်ဒိုခန်း အရောင်းအဝယ်ကိုင်တွယ်ကြသော ပွဲစားများက အာရှဝယ်လက်များကို ပစ်မှတ်ထားလာလျက်ရှိ

အမေရိကန်ပြည်ထောင်စုတွင် ကွန်ဒိုခန်း အရောင်းအဝယ်ကိုင်တွယ်ကြသော ပွဲစားများက အာရှဝယ်လက်များကို ပစ်မှတ်ထားလာ လျက်ရှိနေကြောင်း ဂျပန်အခြေစိုက်သတင်းဝက်ဘ်ဆိုက်တစ်ခုတွင် ဖော်ပြသည်။

မကြာသေးမီက အော်ရီဂွန်ပြည်နယ်၊ ပို့တ်လန်းမြို့တွင် ကွန်ဒိုမီနီယံတစ်ခု၏ အခန်းများ ဈေးကွက်တင်ခဲ့ရာ အခန်းစုစုပေါင်း၏ ၄ ပုံတစ်ပုံကျော်ကို အာရှဝယ်လက်များအား ပစ်မှတ်ထားခဲ့သည်ဟု ဆိုသည်။

(မှတ်ချက်။ အမေရိကန်တွင် ပို့တ်လန်းအမည်ဖြင့် မြို့ ၂ မြို့ရှိရာ အခြားတစ်မြို့မှာ မိန်းပြည်နယ်တွင် တည်ရှိသည်။ )

ပို့တ်လန်းမြို့ အရှေ့မြောက်ပိုင်းတွင် အကောင်အထည်ဖော် ဆောက်လုပ်လျက်ရှိသော TwentyTwenty ကွန်ဒိုမီနီယံကြီး၏ အခန်းပေါင်း ၁၆၂ ခန်းအနက် ၄၅ ခန်းကို တရုတ်၊ ဂျပန်နှင့် စင်္ကာပူတို့အပါအဝင် အာရှနိုင်ငံများမှ ဝယ်လက်များကို ပစ်မှတ်ထားခဲ့သည်။

အမေရိကန်၏ အနောက်ဘက်ကမ်းရိုးတန်းမြို့ကြီးများတွင် အာရှဝယ်လက်များမှာ အလွန်ကြီးမားသည့် ဝယ်လက်ရင်းမြစ်တစ်ခု ဖြစ်လာနေသည်။

ပြီးခဲ့သော ၂၀၁၇ ခုနှစ်အတွင်း အမေရိကန်အိမ်ခြံမြေဈေးကွက်တွင် တရုတ်ဝယ်လက်တို့၏ ဝယ်ယူခဲ့မှု ပမာဏမှာ ကန်ဒေါ်လာ ၃၀ ဒသမ ၄ ဘီလီယံအထိ ရှိခဲ့ကြောင်း အမျိုးသားအိမ်ခြံမြေအသင်း၏ ထုတ်ပြန်ချက်တစ်ရပ်တွင် ဖော်ပြသည်။

ကွန်ဒိုခန်းများအတွက် ပစ်မှတ်ထားသည့် အာရှဝယ်လက်များ၏ ထက်ဝက်ခန့်မှာ ရင်းနှီးမြှုပ်နှံသူများ ဖြစ်ဖွယ်ရာရှိကြောင်း Sotheby’s International Realty မှ အိမ်ခြံမြေအကျိုးဆောင် မိုက်ကယ်ကျန်းက ပြောကြားသည်။

ဝယ်လက်အများစုမှာ အခန်းများကို ပြန်လည်အငှားချထားဖွယ်ရှိပြီး အချို့ကမူ အပန်းဖြေရာနေအိမ်များဖြစ် ထားရှိကြဖွယ်ရှိကြောင်းလည်း မိုက်ကယ်ကျန်းက ပြောကြားသည်။

ပို့တ်လန်းရှိ ကွန်ဒိုမီနီယံအဆောက်အအုံကြီးမှာ လာမည့် ၂၀၁၉ ခုနှစ်တွင် အပြီးသတ်ဆောက်လုပ်နိုင်ဖွယ်ရာရှိပြီး အိပ်ခန်း တစ်ခန်းပါ အခန်းများ၏ ဈေးနှုန်းမှာ ကန်ဒေါ်လာ ၃၀၀၀၀၀ မှစတင်ဖွယ်ရာရှိပြီး အိပ်ခန်း ၂ ခန်းပါ အခန်းများမှာ ဒေါ်လာ ၅၀၀၀၀၀ မှ စတင်ဖွယ်ရှိသည်။

တရုတ်ပြည်မကြီးမှ ဝယ်လက်အများစုမှာ ပို့တ်လန်းနှင့် အော်ရီဂွန်ပြည်နယ်ကို ကြားပင် မကြားဖူးကြဟု ဆိုသည်။

ကမ္ဘာပေါ်တွင် အလှပဆုံးမြို့ဟု နာမည်ကျော်သော ကနေဒါနိုင်ငံ၊ ဗန်ကူးဗားမြို့မှ အိမ်ခြံမြေ အကျိုးဆောင်များသည်လည်း အာရှဝယ်လက်များကို ပစ်မှတ်ထားနေသည်ဟု ဆိုသည်။

အမေရိကန်ပြည်ထောင်စု၊ ဝါရှင်တန်ပြည်နယ်၏ ပင်လယ်ဆိပ်ကမ်းမြို့ကြီးဖြစ်သော ဆီယက်တဲလ်သည်လည်း အာရှရင်းနှီးမြှုပ်နှံသူတို့ များစွာပစ်မှတ်ထားသည့် နေရာတစ်ခု ဖြစ်သည်။

Credit: iMyanmarHouse.com (iMyanmarHouse.com Team မှ ရေးသား ဖော်ပြသည်။)