မန္တလေးမြို့တော် စည်ပင်သာယာရေးကော်မတီမှ တာဝန်ယူဆောက်လုပ်သော မြရည်နန္ဒာတန်ဖိုးမျှတ တိုက်ခန်းများအား ဝယ်ယူခွင့်အတွက် မဲစနစ်ဖြင့် ပွင့်လင်းမြင်သာစွာ စနစ်တကျချထားပေးပြီးဖြစ်ရာ အိမ်(သို့မဟုတ်) မြေပိုင်ဆိုင်မှုရှိကြောင်း စစ်ဆေးတွေ့ရှိသော နိုင်ငံ့ဝန်ထမ်းများ၏ တိုက်ခန်းများကို တန်ဖိုးငွေပြန်လည်ပေးအပ်မည်မဟုတ်ဘဲသိမ်းယူ သွားမည်ဖြစ်ကြောင်းသိရသည်
'' တိုက်ခန်းလျှောက်ထားရာမှာ လိုအပ်တဲ့အထောက်အထားတွေကို မမှန်မကန်တင်ပြထားတာမျိုး စစ်ဆေးတွေ့ရှိရရင် တိုက်ခန်းချထားမှုကို ပြန်လည်ရုပ်သိမ်းသွားမှာပါ။ မဲပေါက်ထားတဲ့တိုက်ခန်းမှာ ဝယ်ယူခွင့်ရရှိသူ ကိုယ်တိုင်နေထိုင်ရမှာဖြစ်တဲ့အပြင် ငါးနှစ်အတွင်းမှာ တခြားသူကိုငှားရမ်းခြင်း၊ တစ်ဆင့်လွှဲပြောင်းရောင်းချခြင်းတွေ မပြုလုပ်ဖို့တားမြစ်ထားပြီး သတ်မှတ်ကာလကျော်လွန်မှသာ ကော်မတီခွင့်ပြုချက်ဖြင့် တိုက်ခန်းကို လွှဲပြောင်းရောင်းချနိုင်မည်ဖြစ်ပါတယ်။ ဖောက်ဖျက်တဲ့ ဝန်ထမ်းတွေကို Black List စာရင်းထည့်သွင်းမှာဖြစ်ပြီး လျှောက်လွှာ ထပ်မံတင်ခွင့်ကိုလည်းရပ်ဆိုင်းသွားမှာပါ''ဟု မန္တလေးမြို့တော် စည်ပင်သာယာရေးကော်မတီ၊ အဆောက်အအုံနှင့် ကုန်ရုံဌာနမှ ဌာနမှူးဦးဇော်ဝင်းက စက်တင်ဘာ ၆ရက်တွင် ဒီမိုကရေစီတူဒေးသို့ ပြောကြားသည်။
ချမ်းမြသာစည်မြို့နယ်ရှိ မြရည်နန္ဒာတန်ဖိုးမျှတအိမ်ရာရှိ တိုက်ခန်းများအနက် ပထမသုတ်အဖြစ် အခန်းပေါင်း ၈၇၂ ခန်းမှ ပင်စင်စားများအတွက် အခန်း ၂ဝဝ၊ လုပ်သက် ၁ဝ နှစ် အထက်ရှိသူများအတွက် ၂၅ ခန်း၊ လုပ်သက် ၁၁ နှစ်မှ ၂၅နှစ် အထိရှိသူများအတွက် ၁၉၂ခန်း၊ လုပ်သက် ၂၆နှစ်အထက်ရှိသူများအတွက် ၂၅၅ခန်းကို ပြီးခဲ့သည့် သြဂုတ်လနောက်ဆုံးပတ်အတွင်းက ချထားပေးခဲ့ရာ အငြိမ်းစားဝန်ထမ်း ၂၈၂၅ဦးနှင့် တာဝန်ထမ်းဆောင်ဆဲဝန်ထမ်း ၈၆၁ဝ ဦးတို့က ဝယ်ယူခွင့် လျှောက်ထားရရှိခဲ့ကြပြီး တိုက်ခန်းများကို မဲပေါက်ထားသူများ အနေဖြင့် ဘဏ်ချေးငွေစနစ်ဖြင့် ဝယ်ယူလိုပါက ရတနာပုံဘဏ်၊ မြန်မာအရှေ့တိုင်းဘဏ်၊ ဧရာဝတီဘဏ်နှင့် CHID ဘဏ်များ၌ တိုက်ခန်းတန်ဖိုး၏ ၃ဝ ရာခိုင်နှုန်းကို ပေးသွင်းထားရမည် ဖြစ်ကာ လက်ငင်းငွေချေစနစ်ဖြင့် ဝယ်ယူလိုပါက စက်တင်ဘာ ၁၅ ရက် နောက်ဆုံးထား၍ မန္တလေးမြို့တော်စည်ပင်သာယာရေး ကော်မတီ၏ ငွေစာရင်းအမှတ်သို့ ပေးသွင်းရမည်ဖြစ်ကြောင်း သိရသည်။
Credit: Democracytoday
