ကန်ဒေါ်လာ ၃၅ ဘီလီယံခန့် ဘဏ္ဍာငွေရှိသော မလေးရှားအမျိုးသား ပင်စင်ရန်ပုံငွေအဖွဲ့က ဗြိတိန်ရှိ တက္ကသိုလ်ကျောင်းသား အဆောင် ၂ ခုကို ကန်ဒေါ်လာ ၅၁ သန်းဖြင့် ဝယ်ယူ

မလေးရှားနိုင်ငံ၏ ပြည်သူ့ဝန်ထမ်းပင်စင်ရန်ပုံငွေအဖွဲ့ဖြစ်သော ကမ်ပူလန် ဝမ် ပါဆာရန် (KWAP) သည် ဗြိတိန်ရှိ ကျောင်းသားဆောင် အဆောက်အအုံ ၂ ခုကို ပေါင် ၃၉ ဒသမ ၇၅ သန်း (ကန်ဒေါ်လာ ၅၁ ဒသမ ၂ သန်း) ဖြင့် ဝယ်ယူလိုက်သည်။

ဝယ်ယူလိုက်သည့် အဆောက်အအုံများမှာ ဘာမင်ဂမ်မြို့၊ ဘရစ္စတိုးလမ်း၊ အမှတ် ၈၀၀ ရှိ ဘိုးဘွားပိုင် ၄ ထပ်အဆောက်အအုံတစ်ခုနှင့် စကော့တလန်၏မြို့တော် အီဒင်ဘာ့ဂ်ျမှ The Mill House အမည်ရှိ ဘိုးဘွားပိုင် ၆ ထပ်အဆောက်အအုံတို့ဖြစ်ကြပြီး ပေါင် ၁၄ ဒသမ ၆၂ သန်းနှင့် ပေါင် ၂၅ ဒသမ ၁၃ သန်း အသီးသီးဖြင့် ဝယ်ယူခဲ့ခြင်း ဖြစ်သည်။

အဆောက်အအုံ ၂ ခုလုံးမှာ ကျောင်းသားဆောင်များဖြစ်ကြပြီး ဘာမင်ဂမ်တက္ကသိုလ်၊ အီဒင်ဘာ့ဂ်ျ တက္ကသိုလ်၊ ဟီးရီးယဲ့-ဝပ်ထ် တက္ကသိုလ်၊ အီဒင်ဘာ့ဂ်ျ နာပီယာတက္ကသိုလ်နှင့် ကွင်း မာဂရက် တက္ကသိုလ်တို့အနီးတွင် တည်ရှိသည်။

ရောင်းချသူများမှာ IP Investment Management (HK) Ltd နှင့် Maven Capital Partners တို့ ဖြစ်ကြသည်။

“အခုဝယ်ယူလိုက်မှုဟာ KWAP ရဲ့ ရည်မှန်းချက်ဖြစ်တဲ့ နိုင်ငံတကာ အိမ်ခြံမြေကဏ္ဍပိုင်ဆိုင်မှု မြှင့်တင်ရေးနဲ့ ကိုက်ညီနေပါတယ်။

ကျွန်တော်တို့အနေနဲ့ မလေးရှားပင်စင်စားတွေကို ပံ့ပိုးနိုင်ဖို့ ရည်မှန်းချက်နဲ့အညီ ပြည်ပဈေးကွက်တွေမှာ ခြေချမှုမြှင့်တင်ရေးအတွက် ဆက်လက်ကြိုးပမ်းသွားမှာလည်း ဖြစ်ပါတယ်” ဟု KWAP ၏ အမှုဆောင်အရာရှိချုပ် ကာမာရူဇာမန် ဝမ် အာမက်က ပြောကြားသည်။

ယခုအဆောက်အအုံ ၂ လုံးဝယ်ယူလိုက်မှုအရ KWAP ၏ ပြည်ပအိမ်ခြံမြေ ပိုင်ဆိုင်မှုမှာ ၁၄ ခုရှိလာမည်ဖြစ်ပြီး အခြားအိမ်ခြံမြေများမှာ သြစတေးလျ၊ လန်ဒန်နှင့် ဂျာမနီတို့တွင် တည်ရှိသည်။

၂၀၁၇ ခုနှစ်၊ ဒီဇင်ဘာလ ၃၁ ရက် အချက်အလက်များအရ KWAP ပိုင်ဆိုင်ထားသော အိမ်ခြံမြေများ၏ ၇၅ ရာခိုင်နှုန်းမှာ ပြည်ပတွင်ဖြစ်ပြီး ပြည်တွင်းတွင် ၂၅ ရာခိုင်နှုန်းသာရှိသည်။

Credit: iMyanmarHouse.com (iMyanmarHouse.com Team မှ ရေးသား ဖော်ပြသည်။)