တရုတ်အစိုးရသည် အိမ်ခြံမြေဈေးကွက်အပေါ် ကန့်သတ်ထိန်းချုပ်မှုများ အရှိန်မြှင့်တင်လာလျက်ရှိရာ ရှန်ဟိုင်းအာဏာပိုင်တို့က ယွမ်ငွေ ၅ ဘီလီယံကျော် တန်ကြေးရှိ မြေကွက်များ လေလံတင် ရောင်းချရန် စီစဉ်ထားမှုကို ဖျက်သိမ်းလိုက်ကြောင်း ရှန်ဟိုင်းအခြေစိုက် အိမ်ခြံမြေသတင်း ဝက်ဘ်ဆိုက်တစ်ခုတွင် ဖော်ပြသည်။
ယွမ်ငွေ ၅ ဒသမ ၄၁ ဘီလီယံ ( ကန်ဒေါ်လာ ၇၉၆ ဒသမ ၄ သန်း) တန်ကြေးရှိ အဆိုပါမြေနေရာများ လေလံတင်ရန် ဖျက်သိမ်းလိုက်ခြင်း၏ အကြောင်းရင်းကိုမူ ထုတ်ပြန်ကြေညာခဲ့ခြင်း မရှိချေ။
ရောင်းချမည့်မြေနေရာများတွင် လူနေစီမံကိန်းမြေနေရာ ၂ ခုနှင့် ကူးသန်းရောင်းဝယ်ရေးဆိုင်ရာ မြေကွက် ၂ ခုတို့ ဖြစ်ကြသည်။
Developer တို့အနေဖြင့် မြေနေရာများဝယ်ရန် ပိုမိုခက်ခဲသည့် အခြေအနေသို့ ရောက်ရှိလာပြီဖြစ်ကြောင်းလည်း ဈေးကွက်သုတေသီတို့က သုံးသပ်သည်။
တချိန်တည်းမှာပင် အိမ်ခြံမြေဝယ်ယူမှုများကို တင်းကျပ်သည့် ကန့်သတ်မှုများ ပြုလုပ်လာခြင်းကြောင့် အိမ်ခြံမြေသစ် အရောင်းအဝယ်ပမာဏမှာလည်း ကျဆင်းလာနေသည်။
အမျိုးသားစာရင်းအင်းဗျူရို၏ ထုတ်ပြန်ချက်အရ တရုတ်နိုင်ငံ၏ အိမ်ခြံမြေကဏ္ဍ ရင်းနှီးမြှုပ်နှံမှုမှာ ယခင်နှစ်အလားတူကာလနှင့် နှိုင်းယှဉ်လျှင် ကျဆင်းသွားခဲ့ပြီး ယခင်နှစ်က ဖွံ့ဖြိုးမှု ၁၀ ဒသမ ၂ ရာခိုင်နှုန်းရှိခဲ့ရာမှ ယခုနှစ်တွင် ၉ ဒသမ ၇ ရာခိုင်နှုန်းသာ ရှိတော့ သည်ဟု ဆိုသည်။
လေလံဖျက်သိမ်းလိုက်သည့် မြေနေရာ ၂ ခုဖြစ်သော ရှန်ဟိုင်းမြို့၊ ဘောက်ရှန်အရပ်ရှိ မြေကွက်များမှာ ယွမ်ငွေ ၂ ဒသမ ၆၅ ဘီလီယံ ( ကန်ဒေါ်လာ သန်း ၃၉၀) တန်ကြေးရှိသည်။
ယင်းအနက် စတုရန်းမီတာ ၅၆၇၉၄ ကျယ်ဝန်းသော ပထမမြေကွက်တစ်ကွက်ကို ကြမ်းခင်းဈေး ယွမ်ငွေ ၂ ဒသမ ၆၃ ဘီလီယံဖြင့် ရောင်းချရန် စီစဉ်ခဲ့ပြီး စတုရန်းမီတာ ၂၀၀၄ ကျယ်ဝန်းသော ကူးသန်းရောင်းဝယ်ရေးဆိုင်ရာ မြေကွက်ကိုမူ ယွမ်ငွေ ၁၂ ဒသမ ၀၃ သန်းဖြင့် ရောင်းချရန် စီစဉ်ခဲ့သည်။
Credit: iMyanmarHouse.com
(iMyanmarHouse.com Team မှ ရေးသား ဖော်ပြသည်။)
