တရုတ်ပြည်တွင် မိုးမျှော်တိုက်ကြီးများ နှစ်စဉ်နှင့်အမျှ တစ်စထက်တစ်စ ပိုမိုများပြားလာလျက်ရှိရာ ထူးခြားသည့် ဟန်ပန်ဖြင့် အများ၏ စိတ်အာရုံတွင် စွဲထင်နေနိုင်ရန် ပိုမိုခက်ခဲလာသည်။
ထို့ကြောင့် လူတို့၏ စိတ်အာရုံတွင် ထူးထူးခြားခြား မှတ်မိနေစေရန်လည်း အပြိုင်အဆိုင်ကြိုးပမ်းလာကြလျက်ရှိသည်။
မိုးမျှော်တိုက်ကြီး၏ ထိပ်ဖျားခန့်ဆီမှ ရေတံခွန်ကြီးတစ်ခုမှ ရေများ တဝုန်းဝုန်းကျဆင်းနေမည့် နေရာမျိုးကို သင်တွေးဆဖူးပါသလား။
သို့ရာတွင် တရုတ်ပြည် အနောက်တောင်ပိုင်း ကွေ့ကျိုးပြည်နယ်၏ မြို့တော် ကွေ့ယန်မြို့ရှိ မိုးမျှော်တိုက်ကြီးတွင် ယခုအခါ အဆိုပါမြင်ကွင်းမျိုး တွေ့မြင်နိုင်ပြီ ဖြစ်လေသည်။
Liebian Building အမည်ရှိ မိုးမျှော်တိုက်ကြီး၏ နံရံထိပ် ပေ ၃၅၀ အမြင့်ဆီမှ ရေများစီးဆင်းစေကာ ရေတံခွန်ကြီးတစ်ခု ဖန်တီးလိုက်ခြင်းဖြစ်သည်။
ပေ ၄၀၀ နီးပါးရှိ အဆောက်အအုံကြီးထိပ်မှ ရေတံခွန်ကြီးမှ ရေများစတင်ထုတ်လွှတ်သောနေ့တွင် တွေ့မြင်ရသော ဒေသခံများမှာ မိုးမျှော်တိုက်ကြီး၌ အလွန်ကြောက်မက်ဖွယ်ကောင်းသည့် မတော်တဆဖြစ်ရပ်ကြီး ဖြစ်ပွားသည်ဟု ယူဆခဲ့ကြသည်။
“ဒေသခံတွေဟာ ကြီးမားတဲ့ ရေယိုစိမ့် ပေါက်ကျမှုကြီးဖြစ်ပွားတယ်လို့ ယူဆပြီး သတင်းစာတွေဆီကို ဖုန်းဆက်ခဲ့ကြတယ်။
သတင်းထောက်တွေ ရောက်ရှိသွားချိန်မှာတော့ Liebian အဆောက်အအုံကြီးရဲ့ ပိုင်ရှင်က ရေတံခွန်ကြီးတစ်ခု ဖန်တီးတာသာဖြစ်တယ် ဆိုတာ သိခဲ့ကြပါတယ်” လန်ဒန်အခြေစိုက် တိုင်းမ်သတင်းတစ်ရပ်တွင်ေ ဖ်ာပြသည်။
အလွန်ကြီးမားလှသော ရေတံခွန်ကြီး အဆက်မပြတ်စီးဆင်းနေစေရန်အတွက် တစ်နာရီလျှင် လျှပ်စစ်ဓာတ်အားခ ကန်ဒေါ်လာ ၁၁၈ ဒေါ်လာခန့် ကုန်ကျသည်ဟု ဆိုသည်။
ယင်းသို့ အကုန်အကျများပြားလွန်းသောကြောင့် အထူးပွဲလမ်းသဘင်များရှိချိန်တွင်သာ အသုံးပြုရန် ရည်ရွယ်ထားပြီး တစ်ကြိမ်လျှင် ၁၀ မိနစ်မှ မိနစ် ၂၀ ခန့်သာ အသုံးပြုရန် ရည်မှန်းထားသည်ဟု ဆိုသည်။
မိုးမျှော်တိုက်ကြီးမှာ ရေများအလုံးအရင်းကျဆင်းစေကာ ရေတံခွန်ပြုလုပ်ထားပုံ ဗွီဒီယိုဖိုင်ကို https://bit.ly/2mLNfLm အင်တာနက်လင့်ခ်တွင် ကြည့်ရှုနိုင်ပါသည်။
Credit: iMyanmarHouse.com
(iMyanmarHouse.com Team မှ ရေးသား ဖော်ပြသည်။)
