အင်္ဂလန်၏ နာမည်ကျော် အကျဉ်းထောင်ကြီးတစ်ခုအနီး ကပ်လျက်တည်ရှိသော အရက်ဆိုင်အဆောက်အအုံ ပေါင် ၉၉၀၀၀ ဖြင့် အရောင်းဈေးကွက်ဝင်လာကြောင်း အင်္ဂလန်အခြေစိုက် သတင်းဝက်ဘ်ဆိုက်တစ်ခုတွင် ဖော်ပြသည်။
တည်နေရာမှာ အင်္ဂလန်နိုင်ငံ၊ အနောက်တောင်ပိုင်း ကမ်းမြောင်ဒေသတွင် တည်ရှိသော ဒါဗွန်ရှိုင်းယားခရိုင်ရှိ ဒါ့ထ်မိုးရ် လွင်ပြင်တွင် တည်ရှိသည်။
အရက်ဆိုင်၏ အမည်ကို ဝေလမင်းသား “The Prince of Wales” ဟု အမည်ပေးထားပြီး နာမည်ကျော် ဒါ့ထ်မိုး အကျဉ်းထောင်ကြီးနှင့် မီတာအနည်းငယ်သာ ဝေးကွာသည်။
ဒါ့ထ်မိုးအကျဉ်းထောင်ကြီးကို ၁၈၀၅ ခုနှစ်တွင် စတင်ဖွင့်လှစ်ခဲ့ပြီး လူသတ်တရားခံ ရာပေါင်းများစွာကို ထိန်းသိမ်းထားရှိခဲ့သည်။
ဒါ့ထ်မိုးတွင် အကျဉ်းကျခံခဲ့ရသူများတွင် အလွန်ဆိုးသွမ်းလှကာ အားခွန်ဗလကောင်းခြင်းဖြင့် နာမည်ကျော်သည့် ဖရန့်ခ် မစ်ချယ်လည်း ပါဝင်သည်။
ဖရန့်ခ် မစ်ချယ်သည် ထောင်အာဏာပိုင်တို့၏ နှစ်ရှည်ပဲ့ကိုင်မှုဖြင့် တဖြည်းဖြည်းစိတ်ထားပျော့ပျောင်းလာကာ ထောင်ဒဏ်တစ်သက် ချမှတ်ထားခံရရာမှ ပြန်လည်လွတ်မြောက်လာချိန်တွင် ရန်ညှိုးရှိသူများက သေနတ်ဖြင့် ၁၂ ချက်ခန့် ပစ်ခတ်သတ်ဖြတ်ခြင်း ခံသွားရသည်။
ဝေလမင်းသားအရက်ဆိုင်တွင် စားသောက်ဆိုင်နှင့် အိပ်စက်ခန်းများ ပါဝင်ကာ လက်ရှိအားဖြင့် ဒေသတွင်း၌ ကမ္ဘာလှည့်ခရီးသည်များ လာရောက်မှု များပြားနေခြင်းမှ အကျိုးအမြတ်များစွာ ရရှိလာနိုင်သည်ဟု ခန့်မှန်းထားသည်။
ဈေးကွက်တင်ပေးခဲ့သည်မှာ ဒီဗွန်ရှိုင်းယားခရိုင်အခြေစိုက် Stonesmith အိမ်ခြံမြေကုမ္ပဏီမှ ဖြစ်သည်။
အရက်ဆိုင်အတွင်း ဂိမ်းကစားခန်း၊ မီးဖိုဆောင်၊ master bedroom ၃ ခန်း၊ အိပ်ခန်း ၂၁ ခန်းလည်း ပါဝင်ပြီး အလည်အပတ် လာရောက်သူများအနေဖြင့် တစ်ညလျှင် ပေါင် ၂၀ ဖြင့် အိပ်စက်နိုင်သည်ဟု ဆိုသည်။
အရက်ဆိုင်ဝန်းတွင် ကား ၁၄ စင်းဆန့် ကားပါကင်နေရာတစ်ခုလည်း ပါဝင်သည်။
ဝေလမင်းသား အရက်ဆိုင်ကို ပိုင်ရှင်တစ်ဦးတည်းက ၁၃ နှစ်ကြာ ပိုင်ဆိုင်ခဲ့ခြင်းဖြစ်ပြီး ယခုအခါတွင် ရောင်းထုတ်ရန် ဆုံးဖြတ်လိုက်ကြခြင်းလည်း ဖြစ်သည်။
Stonesmith အိမ်ခြံမြေကုမ္ပဏီမှ ပြောရေးဆိုခွင့်ရ ပုဂ္ဂိုလ်က ပြောကြားရာတွင် ဒါ့ထ်မိုးသို့ နှစ်စဉ်လာရောက်လည်ပတ်သူ ၆ သန်းခန့်ရှိပြီး အောင်မြင်သည့် စီးပွားရေးလုပ်ငန်းတစ်ခု လုပ်ဆောင်ရန် အခြေခံကောင်းများရှိပြီးဖြစ်ကြောင်း ပြောကြားသည်။
ကမ္ဘာလှည့်ခရီးသည်များ လာရောက်မှုမှာ တစ်နှစ်တာပတ်လုံးဖြစ်ပြီး အထူးသဖြင့် သီတင်းပတ်ကုန် အားလပ်ရက်များနှင့် နွေလများတွင်ဖြစ်ကြောင်းလည်း ၎င်းက ဖြည့်စွက်ပြောကြားသည်။
Credit: iMyanmarHouse.com
(iMyanmarHouse.com Team မှ ရေးသား ဖော်ပြသည်။)
