ဒီဇိုင်းပြန်လည်ပြင်ဆင်ရေးဆွဲရမည့် ဒလတံတားစီမံကိန်းအတွက် လိုအပ်သည့် ငွေကြေးပိုင်းဆိုင်ရာကို စီမံကိန်းနှင့် ဘဏ္ဍာရေးဝန်ကြီးဌာနမှ ကူညီထောက်ပံ့ပေးမည်ဟုသိရပြီး ဒလတံတား ဒီဇိုင်းပြင်ဆင် ရေးဆွဲရမည့် ကုန်ကျစရိတ်အတွက် ကိုရီးယားနိုင်ငံ၏ စီးပွားဖွံ့ဖြိုးရေးရန်ပုံငွေ EDCF ဖြင့် ပြန်လည်ညှိနှိုင်းသွားမည်ဖြစ်ကြောင်း ဆောက်လုပ်ရေးဝန်ကြီးဌာန တံတားဦးစီးဌာမှသိရသည်။
ဒလတံတားစီမံကိန်းအတွက် ဒီဇိုင်းပြောင်းလဲရမည့်အစီအစဉ်ပေါ်လာသည့်အတွက် ဒီဇိုင်းပြန်လည် ပြင်ဆင်ရေးဆွဲမည့်ကိစ္စနှင့် စီမံကိန်းအတွက် တိုးမြင့်လာမည့် ကုန်ကျစရိတ်များကိစ္စများကို ဆောက်လုပ် ရေးဝန်ကြီးဌာန၊ ပို့ဆောင်ရေးနှင့် ဆက်သွယ်ရေးဝန်ကြီးဌာန၊ စီမံဘဏ္ဍာဝန်ကြီးဌာနတို့ ၃ ပွင့်ဆိုင်တွေ့ဆုံကာ ညှိနှိုင်းဆွေးနွေးပြီး ယင်းသို့ဆုံးဖြတ်ခဲ့ခြင်းဖြစ်ကြောင်း တံတားဦးစီးဌာမှ တာဝန်ရှိသူက ပြောသည်။
'ဒီဇိုင်းပြောင်းတဲ့ကိစ္စကို consultant နဲ့ ပြန်ပြီးတွက်တဲ့အချိန်မှာ တည်ဆောက်မယ့်ကုမ္ပဏီနဲ့လည်း ညှိနေတာပေါ့။ အမြန်ဆုံး အဆုံးသတ်နိုင်အောင်လည်း ကြိုးစားနေတယ်။ တက်လာတဲ့ ငွေကြေး ပမာဏအတွက် ဆောက်လုပ်ရေး၊ ပို့ဆောင်ဆက်သွယ်ရေး၊ စီမံဘဏ္ဍာဝန်ကြီးတွေ သုံးပွင့်ဆိုင်ဆွေးနွေးပြီး တတ်နိုင်သလောက် support လုပ်ပေးဖို့ ဒီအဖြေကို ထုတ်လိုက်တာ။ Stakeholder အားလုံး အဆင်ပြေ အောင်ဆိုပြီးတော့ ဆွေးနွေးကြတာ။ နောက် EDCF ကိုလည်းလိုတဲ့ ငွေကြေးပမာဏ ပြန်ညှိနှိုင်းမယ်။ ထပ်တိုး ချေးငွေအနေနဲ့များ သူတို့ပေးနိုင်မလားပေါ့''ဟု ၎င်းက ပြောသည်။
ဒီဇိုင်းပြန်လည်ပြင်ဆင်ရာတွင် အသစ်ပြန်လည်ရေးဆွဲရခြင်းမဟုတ်ဘဲ ရှိပြီးသားဒီဇိုင်းကို အနည်းငယ်ပြင်ဆင် ရေးဆွဲမည်ဖြစ်၍ ၄ လနှင့် ၆ လခန့်သာ ကြာမြင့်မည်ဟုသိရသည်။ ဒလဘက်ကမ်းနှင့် ဘုန်းကြီး လမ်းဘက်ခြမ်းရှိ ရန်ကုန်မြစ်အကျယ်သည် မီတာ ၅၀၀ ခန့်ကျယ်ပြီး ဒီဇိုင်းပြင်ဆင်ရာတွင် ၃၂၀ မီတာ အကျယ်မှ ရေလယ်တိုင် ၂ တိုင်၏ အကွာအဝေးကို တတိုင်လျှင် ၂၅ မီတာစီ (ကမ်းဘက်) နောက်ဆုတ် ပေးရမည်ဖြစ်ပြီး ချဉ်းကပ်တံတားကို အပြောင်းအလဲ ပြုလုပ်မည်မဟုတ်ကြောင်း သိရသည်။
''ဒလတံတားကတော့ ပေါ်လစီပိုင်းက ဖြတ်လိုက်ပြီ။ သမ္မတရုံးကတော့ စာမထွက်သေးဘူး။ ခန်းဖွင့်ကို နည်းနည်း ချဲ့မယ်။ ပင်မတံတားကနေ ၃၂၀ မီတာကို ၃၇၀ မီတာချဲ့ပေးရမယ်။ သင်္ဘောလမ်းကြောင်း ပိုကျယ်သွားတာပေါ့။ အဲဒါလည်း နောက်ဆုံးပိတ်အစည်းအဝေး ဆုံးဖြတ်ချက်ပေါ့။ အဲဒီကနေ အမြန်ဆုံး စနိုင်အောင်လုပ်နေတယ်။ အဲတော့ ဒီဇိုင်းပြင်ရမှာပေါ့။ အရင် ၃၂၀ မီတာနဲ့ ဆွဲထားပြီးသား ဒီဇိုင်းကို ၃၇၀ မီတာနဲ့ ရေလယ်ခန်းဖွင့်၊ သင်္ဘောလမ်းကြောင်းကို ပြင်ပေးရမယ်'' ဟုဆိုသည်။
လက်ရှိအချိန်တွင် ဒီဇိုင်းပြင်ဆင်မှုအတွက် ကုန်ကျစရိတ် အမျိုးမျိုးထွက်ပေါ်နေသော်လည်း အသေးစိတ်ညှိနှိုင်း တွက်ချက်မှုများ ပြုလုပ်ရမည်ဖြစ်၍ ယင်းကုန်ကျစရိတ်ပမာဏကို အတည်မပြုနိုင်သေးကြောင်း သိရသည်။ တံတားတည်ဆောက်ရန် ကိုရီးယားသမ္မတနိုင်ငံ၏ EDCF Loan (ကိုရီးယားနိုင်ငံ စီးပွားရေးဖွံ့ဖြိုးမှုရန်ပုံငွေ)မှ ချေးငွေကန်ဒေါ်လာသန်း ၁၃၀ အပါအ၀င် အမေရိကန်ဒေါ်လာ ၁၆၈ ဒသမ ၁၇၄ သန်း ကုန်ကျမည်ဖြစ်သည်။ တံတားအမျိုးအစားမှာ သံမဏိကြိုးဆိုင်း တံတားအမျိုးအစား၊ အမြင့် ၄၉ မီတာ၊ အကျယ် ၁၅၁ မီတာ၊ ပင်မတံတားအရှည် ၁၉၃၆ ပေရှိပြီး စုစုပေါင်းတံတားအရှည် ၆၁၄၃ ပေ၊ လေးလမ်းသွားတံတား ဖြစ်သည်။ တည်ဆောက်ရေး ကာလ ၃၉ လ သတ်မှတ်ထားပြီး ၂၀၁၈ ခုနှစ် နှစ်ကုန်ပိုင်းတွင် စတင်မည်ကြောင်း သိရသည်။
Credit: News Watch
