ရန်ကုန်တိုင်းဒေသကြီး အစိုးရအဖွဲ့မှ ရောင်းချပေးသွားမည့် တန်ဖိုးနည်း၊ တန်ဖိုးသင့် တိုက်ခန်းများ ဝယ်ယူခွင့် လျှောက်ထားသူများမှ တိုက်ခန်းဝယ်ခွင့်ရသူများ၏ တန်းစီဇယားစာရင်းကို ယနေ့ (ဇူလိုင်လ ၁၀ ရက်)တွင် ခရိုင် အထွေထွေ အုပ်ချုပ်ရေးရုံးများတွင် ကြေညာမည်ဖြစ်ကြောင်း ပြည်သူ့အိမ်ရာ ရောင်းချရေး ကော်မတီဝင်ဖြစ်သူ ဦးညီညီက ပြောကြားသည်။
အဆိုပါ တန်းစီဇယားအရ ပထမအဆင့် ဝယ်ယူခွင့်ရသူများသည် ဇူလိုင်လ ၁၁ ရက်မှစပြီး ဇူလိုင် ၂၀ ရက် နောက်ဆုံးထားကာ မြို့ပြနှင့်အိမ်ရာ ဖွံ့ဖြိုးရေးဦးစီးဌာန ရန်ကုန်တိုင်းဒေသကြီး ညွှန်ကြားရေးမှူးရုံး ဗိုလ်ချုပ်လမ်းတွင် ဆက်သွယ်ရမည်ဖြစ်ကြောင်း ၎င်းက ဆက်လက် ပြောဆိုသည်။
“ဝယ်ခွင့်ရသူတွေအတွက် တိုက်ခန်း မဲနှိုက်တာကို ဇူလိုင်လ ၂၅ ရက်နဲ့ ၂၆ ရက်မှာ မဲနှိုက်သွားမယ်။ မဲပေါက်တဲ့ အမည်စာရင်း ပါတဲ့သူတွေက အချိန်မီ လာရောက် အကြောင်းကြားဖို့တော့ လိုမယ်”ဟု ဦးညီညီက ဆိုသည်။
မဲနှိုက်ဝယ်ယူခွင့် ရရှိသူများကို လျှောက်ထားချက်အပေါ် အချက်အလက်များ စိစစ်ခြင်း၊ ဘဏ်ချေးငွေ ရယူမည့်သူများအတွက် ဘဏ်မှ စိစစ်ခြင်းများပြုလုပ်ပြီး စည်းမျဉ်းစည်းကမ်းနှင့် ကိုက်ညီသူများကို ရောင်းမည်ဖြစ်ကြောင်း အိမ်ရာစီမံကိန်းများ ရောင်းချရေး ကြီးကြပ်မှုကော်မတီထံမှ သိရသည်။
တိုက်ခန်းဝယ်ယူခွင့်ဖောင်များကို လာရောက် လျှောက်ထားသူ ၆၀၀၀ ကျော် ရှိခဲ့ပြီး တိုင်းအစိုးရအဖွဲ့မှ တန်ဖိုးနည်း၊ တန်ဖိုးသင့် တိုက်ခန်းပေါင်း ၈၆၂ ခန်းကို ရောင်းချပေးသွားမည်ဖြစ်သည်။
ရန်ကုန်တိုင်းအစိုးရရောင်းချမည့်အိမ်ရာများသည် ဒဂုံမြို့သစ် တောင်ပိုင်းရှိ အင်းဝအိမ်ရာ၊ ကောင်းစံသာအိမ်ရာ၊ ဒဂုံမြို့သစ်ဆိပ်ကမ်းမြို့နယ်ရှိ ယုဇနအိမ်ရာ အပိုင်း (၁၊ ၂)၊ ကနောင်အိမ်ရာ၊ သင်္ဃန်းကျွန်းမြို့နယ်ရှိ ကြီးပွားရေးအိမ်ရာ၊ လှိုင်သာယာမြို့နယ်ရှိ ရွှေလင်ဗန်းအိမ်ရာ၊ ထီးလှိုင်အိမ်ရာ၊ ရွှေပြည်သာမြို့နယ်ရှိ ShopHouse များနှင့် မြောက်ဥက္ကလာပမြို့နယ်ရှိ ရွှေပေါက်ကံ အိမ်ရာတို့ ဖြစ်သည်။
Credit: The Voice
