ရခိုင်ပြည်နယ် ကျောက်ဖြူအထူးစီးပွားဇုန်တွင် ပထမဦးဆုံးအနေဖြင့် မေ ၂၉ ရက်က မြေ ၈၆ ဒသမ ၉ ဧကအတွက် အထွေထွေအုပ်ချုပ်ရေးဦးစီးဌာနက ကန့်ကွက်နိုင်ကြောင်း ကန့်ကွက်လွှာခေါ်ယူခဲ့ရာ ဒေသခံ ၁၀ဝ ကျော်တို့က ကန့်ကွက်လွှာ တင်ခဲ့ကြသည်ဟု ကျောက်ဖြူ အရပ်ဘက်အဖွဲ့အစည်းတစ်ခုထံမှ စုံစမ်းရရှိသည်။
"စီးပွားရေးဇုန်ကော်မတီက အဲဒီမြေဧကအတွက် သိမ်းယူလိုကြောင်း စာတင်လာတယ်။ အဲဒီတော့ လုပ်ထုံး လုပ်နည်းနဲ့အညီ ကျွန်တော်တို့က ကန့်ကွက်နိုင်ကြောင်း ကြေညာလွှာထည့်တာပါ"ဟု ကျောက်ဖြူမြို့နယ် အုပ်ချုပ်ရေးမှုး ဦးရွှေလှအောင်က ဇွန် ၂၁ ရက်က မြန်မာတိုင်း(မ်)ကို ပြောသည်။
လက်ရှိအချိန်တွင် ဒေသခံများ၏ စောဒကတက်မှုကို မြေစာရင်းဦးစီးဌာနနှင့် ညှိနှိုင်းစစ်ဆေးနေသည်ဟု ၎င်းကဆိုသည်။
ကန့်ကွက်စာတင်သည့် ဒေသခံများမှာ ကျောက်ဖြူမြို့နယ်ရှိ ချောင်းဝ၊ မင်းဒင်၊ ဇိုင်းချောင်း၊ ဒိုးမတောင်၊ ပျားတဲ ဟူသည့် ရွာငါးရွာမှ ရွာသားများဖြစ်ပြီး စာများကို ဇွန်ဒုတိယပတ် နောက်ဆုံးထားပြီး တင်ခဲ့ကြသည်ဟု ကျောက်ဖြူမြို့ခံ အရပ်ဘက်အဖွဲ့၏ တာဝန်ခံ ဦးထွန်းကြည်က မြန်မာတိုင်း(မ်)ကို ပြောသည်။
ကျောက်ဖြူအထူးစီးပွားရေးဇုန်အတွက် လျာထားမြေ သိမ်းဧရိယာမှာ ပထမအဆင့်အနေဖြင့် မြေဧက ၂၅၀ ကျော်ရှိပြီး ထိုအတွက် လျော်ကြေးပေးရမည့်ဦးရေမှာ ၇၆ ဦးရှိကြောင်း အုပ်ချုပ်ရေးမှုး ဦးရွှေလှအောင်က ဆိုသည်။"အခု ကန့်ကွက်လွှာခေါ်တဲ့ မြေသိမ်းဧရိယာက ချောင်းမြေပါ။ အစိုးရပိုင်ပါ။ အခု ကန့်ကွက်လွှာတင်တဲ့သူတွေက ပိုင်ဆိုင်မှု တစ်ယောက်မှ မပြနိုင်ပါဘူး။ ဓနိမြေတွေပါတယ်ပြောတယ်။ ရေခွန်ဆောင်ထားတာ မပြနိုင်ပါဘူး။ ချောင်းမြေဖြစ်တဲ့အတွက် ရေအခက်အခဲရှိတယ် ပြောပြန်တယ်။ ကျွန်တော်တော့ မြေစာရင်းဦးစီးကိုခေါ်ပြီး အဲဒီကိစ္စကို ရှင်းနေပါတယ်"ဟု သူကဆိုသည်။
"နောက်ထပ်လည်း မြေသိမ်းကန့်ကွက်လွှာ ထပ်ခေါ်ဖို့ရှိတယ်။ ဘယ်အချိန်လဲဆိုတာတော့ ကျွန်တော်တို့လည်း မသိပါဘူး"ဟု ၎င်းကဆက်ပြောသည်။
ကျောက်ဖြူအထူးစီးပွားဇုန်တစ်ခုလုံးအတွက် မြေဧက လေးထောင်ဝန်းကျင် နယ်နိမိတ်သတ်မှတ်ခဲ့ပြီး အဆိုပါ စီးပွားဇုန်တွင် ရေနက်ဆိပ်ကမ်း၊ စက်မှုဇုန်တို့ပါဝင်သည်။
ကျောက်ဖြူမြို့နယ် လွှတ်တော်ကိုယ်စားလှယ် ဦးဖိုးစံ ကမူ မြေသိမ်းကန့်ကွက်လွှာ ခေါ်ယူခြင်းကို မသိရှိလိုက်ကြောင်း၊ ယခု ကော်မတီအသစ်လက်ထက်တွင် ပွင့်လင်းမြင်သာမှု အားနည်းကြောင်း မှတ်ချက်ပြုသည်။
ကျောက်ဖြူမြို့နယ်တွင် ယခင်က ရေနံပိုက်လိုင်း၊ သဘာဝဓာတ်ငွေ့ပိုက်လိုင်းအတွက် မြေယာသိမ်းဆည်းမှု များရှိခဲ့ရာ ထိုစဉ်က နစ်နာခဲ့ရသကဲ့သို ထပ်မံနစ်နာရမည်ကို ဒေသခံများပူပန်လျက်ရှိသည်ဟု ဆိုသည်။
"သီလဝါဆိုရင် ဒေသခံတွေ ညှိရင်းနဲ့ တစ်ဧကလျော်ကြေး သိန်း ၃၀ဝ ဝန်းကျင်လောက် ရခဲ့တယ်ကြားတယ်။ ကျောက်ဖြူက ၁၈ သိန်းပဲရတယ်"ဟု ဒေသခံတစ်ဦးက ပြောသည်။
ယခုဒေသခံများက မြေသိမ်းကန့်ကွက်လွှာတင်သည့်ကိစ္စကို မြေစာရင်းဦးစီးဌာနက အင်္ဂလိပ်လက်ထက်က မြေပုံကို အသုံးပြုပြီး ဖြေရှင်းနေသည်ဟု ဦးထွန်းကြည်က မြန်မာတိုင်း(မ်)ကို ပြောသည်။
ရခိုင်ပြည်နယ် ကျောက်ဖြူအထူးစီးပွားဇုန်ကို တရုတ်နိုင်ငံပိုင်လုပ်ငန်းများ ပူးပေါင်းဖွဲ့စည်းထားသည့် ကွန်ဆိုတီယံလုပ်ငန်းစုဖြစ်သောChina International Trust Investment - CITIC က တင်ဒါအောင်မြင်ခဲ့ပြီး ကနဦး အစုရှယ်ယာခွဲဝေမှုတွင် တရုတ်ဘက် ၈၅ ရာခိုင်နှုန်း၊ မြန်မာဘက်က ၁၅ ရာခိုင်နှုန်းဖြင့် သတ်မှတ်ခဲ့ပြီး ယခုပြန်လည်ညှိနှိုင်းဆဲ ဖြစ်သည်။
Credit: The Myanmar Times
