အမေရိကန်ပြည်ထောင်စု၊ လော့စ်အိန်ဂျလိမြို့တွင် Clippers ဘတ်စ်ကက်ဘော ကလပ်အသင်းအတွက် ဘတ်စ်ကက် ဘောကွင်းသစ်ကြီး ဆောက်လုပ်
ရန် စီစဉ်နေခြင်းကို ဒေသခံတို့က ကန့်ကွက်လျက်ရှိပြီး တန်ဖိုးသင့်လူနေ
ခန်းများသာ ဆောက်လုပ်ရန် တောင်းဆိုလျက်ရှိကြောင်း လော့စ်အိန်ဂျလိ
အခြေစိုက် အိမ်ခြံမြေသတင်းဝက်ဘ်ဆိုက်တစ်ခုတွင် ဖော်ပြသည်။
တည်နေရာမှာ ကယ်လီဖိုးနီးယားပြည်နယ်၊ လော့စ်အိန်ဂျလိခရိုင်၏
အနောက်မြောက်ဘက်ရှိ အင်ဂဲလ်ဝုဒ်အမည်ရှိ မြို့နယ်တွင် ဖြစ်သည်။
အများပြည်သူပိုင် မြေနေရာတွင် Clippers အတွက် ဘတ်စ်ကက်ဘောကွင်း
သစ်ဆောက်လုပ်မည့် စီမံကိန်းများ ရပ်တန့်ရန် တောင်းဆိုကြပြီး အင်ဂဲလ်ဝုဒ်အုပ်ချုပ်ရေးအဖွဲ့ကို ပြီးခဲ့သည့်အင်္ဂါနေ့က တရားစွဲဆိုလိုက်ကြသည်။
အဆိုပါမြေနေရာတွင် NBA ဘတ်စ်ကက်ဘော အသင်းကို နေရာပေးသည်
ထက် တန်ဖိုးသင့်အိမ်ယာများ ဆောက်လုပ်သည့် နေရာဖြစ်လာစေရန်
ရည်ရွယ်ကာ တရားစွဲဆိုခြင်း ဖြစ်သည်။
အင်ဂဲလ်ဝုဒ်မြို့က ပိုင်ဆိုင်သည့် အဆိုပါမြေနေရာတွင် The Clippers
အသင်းက အိမ်ကွင်းဆောက်လုပ်လိုလျက်ရှိခြင်းဖြစ်သည်။
အမေရိကန်အမျိုးသားဘောလုံးအဖွဲ့ချုပ် NFL ၏ ဘောလုံးကွင်းကြီး
တည်ဆောက်နေသည့် နေရာနှင့်လည်း နီးကပ်စွာ တည်ရှိသည်။
အင်ဂဲဝုဒ်မြို့နယ်ဖွံ့ဖြိုးစေရန် ရည်ရွယ်ကာ ဖွဲ့စည်းထားသည့် Uplift Inglewood အဖွဲ့ဝင်တစ်ဦးဖြစ်သူ ဝုဒရိုး ကာရီက ပြောကြားရာတွင်
“ကျွန်တော်တို့မြို့က လမ်းကြောင်းအမှားကို ဦးတည်နေတယ်။မြို့ကလူကြီးတွေဟာ အိမ်ခြံမြေဈေးနှုန်း အလျင်အမြန် မြင့်တက်လာတာ ကို ရင်ဆိုင်နေရာတဲ့ ဒေသခံအလုပ်သမားလူတန်းစားတွေကို လစ်လျူရှုထားပြီး အားကစားအသင်းပိုင်ရှင် ဘီလျံနာတွေကို မျက်နှာသာ ပေးနေပါတယ်” ဟု သုံးသပ်ပြောကြားသည်။
လက်ရှိအားဖြင့် အင်ဂဲလ်ဝုဒ်အရပ်တွင် လူနေခန်းတစ်ခန်း၏ ပျှမ်းမျှငှားရမ်း
ခမှာ တစ်လလျှင် ကန်ဒေါ်လာ ၁၂၅၀ ခန့်ရှိပြီး ပြီးခဲ့သည့်နှစ်ကထက် ၆ ရာခိုင်နှုန်းခန့် မြင့်တက်လာသည်။
ကယ်လီဖိုးနီးယား မြေယာအက်ဥပဒေအရ အများပိုင်မြေများကို ရောင်းချရန် (သို့မဟုတ်) ပေးကမ်းရန် စီစဉ်မည့် မြို့များသည် ဦးစွာအားဖြင့် အဆိုပါမြေနေရာပေါ်တွင် တန်ဖိုးသင့်လူနေအိမ်ရာများ ဆောက်လုပ်ရန် ကမ်းလှမ်းမှုများကို ရှာဖွေရမည်ဟု ပြဌာန်းထားသည်။
Credit: iMyanmarHouse.com
(iMyanmarHouse.com Team မှ ရေးသား ဖော်ပြသည်။)
