သြစတေးလျနိုင်ငံ၊ ဝိတိုရိယပြည်နယ်တွင် နှစ်ပေါင်း ၁၆၇ နှစ်သက်တမ်းရှိ အကျဉ်းထောင်ကြီး အရောင်းဈေးကွက်ဝင်လာကြောင်း သြစတေးလျအခြေစိုက် အိမ်ခြံမြေသတင်းဝက်ဘ်ဆိုက်တစ်ခုတွင် ဖော်ပြသည်။
သြစတေးလျနိုင်ငံ၊ ဝိတိုရိယပြည်နယ်၊ ကိုဘာ့ဂ်ျမြို့တွင် တည်ရှိပြီး ၁၈၅၁ ခုနှစ်တွင် ဆောက်လုပ်ပြီးစီးခဲ့သည်။
၁၈၅၁ ခုနှစ်တွင်ပင် ပထမဆုံးအကျဉ်းသားအသုတ်ကို ထိန်းသိမ်းထားရှိခဲ့ပြီး ၁၉၉၇ ခုနှစ်၊ မေလ ၁ ရက်တွင် တရားဝင်ပိတ်သိမ်းခဲ့သည်။
လက်ရှိပိုင်ဆိုင်ထားသည်မှာ သြစတေးလျနိုင်ငံ၊ မဲလ်ဘုန်းအခြေစိုက် အိမ်ခြံမြေ developer ဖြစ်သော Future Estate မှ ပိုင်ဆိုင်ထားခြင်းဖြစ်သည်။
အဆိုပါအကျဉ်းထောင်ကြီးတွင် တစ်ခေတ်တစ်ခါက အလွန်ဆိုးသွမ်းခဲ့သည့် ရာဇဝင်လူဆိုးကြီးများကို ထိန်းသိမ်းထားရှိခဲ့၏။
မာ့ခ် ချော့ပါး ရိဒ်နှင့် နောက်ဆုံးကြိုးပေးကွပ်မျက်ခံခဲ့ရသည့် လူဆိုးကြီး ရော်နယ် ရိုင်ယန်တို့ကို ထိန်းသိမ်းထားခဲ့ရာနေရာ ဖြစ်သည်။
သမိုင်းဝင်အမွေအနှစ်အဖြစ် သတ်မှတ်ထားခြင်းခံရသည့် အဆောက်အအုံကြီးလည်း ဖြစ်သည်။
အကျဉ်းခန်းပေါင်း ၁၆၀ ပါဝင်သည့်အကျဉ်းထောင်ကြီးကို အချို့ကbackpacker တို့ နေထိုင်ရန်နေရာအဖြစ် အသုံးပြုရန် အဆိုပြုကြပြီး အချို့ကမူ စားသောက်ဆိုင်များ၊ ကော်ဖီဆိုင်များ၊ ဝိုင်သိုလှောင်ခန်းများအဖြစ် အသုံးပြုရန် ကမ်းလှမ်းကြသည်ဟု ဆိုသည်။
Killen Thomas မှ အမှုဆောင်အရာရှိချုပ် ဂျွန် ကမီလာရီက ယင်းအကျဉ်းထောင်ကြီးကို “အရမ်းလှပပြီး တမူထူးခြားတဲ့ကောင်ကြီး” ဟု တင်စားခဲ့သည်။
“ကျွန်တော်က အကျဉ်းခန်းတွေ ရောင်းချရာမှာ အထူးကျွမ်းကျင်သူတစ်ဦးတော့မဟုတ်ပါဘူး။ ဒါပေမယ့် ဒါကိုစိတ်ဝင်စားတဲ့ ဝယ်လက်တွေအနေနဲ့ အကျဉ်းထောင်တစ်ခုဖြစ်ခဲ့တယ်ဆိုတဲ့အချက်အပေါ်မှာ အခြေခံစဉ်းစားကြမှာ မလွဲပါဘူး” ဟု ကမီလာရီက ဆိုသည်။
နှစ်ထပ်အဆောက်အအုံဖြစ်ပြီး ထူးခြားသည်မှာ အမိုးခုံးဖြစ်သည်။
နောက်ပိုင်းတွင် ပါတီပွဲများ လက်ခံကျင်းပပေးခြင်းများ ပြုလုပ်ခဲ့ပြီး ယနေ့အခါတွင်မူ ပရလောကသုတေသီတို့ စောင့်ကြည့်လေ့လာ နိုင်ရန် စီစဉ်ပေးခြင်းများ ပြုလုပ်ပေးလျက်ရှိသည်။
အကျဉ်းထောင်ကြီး၏ မြေနေရာပိုင်နက်များကိုမူ လူနေကျေးရွာတစ်ခုအဖြစ် ပြောင်းလဲခဲ့ပြီး လူနေတိုက်ခန်းများ၊ ကော်ဖီဆိုင်များ၊ စားသောက်ဆိုင်များနှင့် နေ့ကလေးထိန်းအဆောက်အအုံများ ဆောက်လုပ်လာကြသည်။
ခေါ်ဈေးမှာ သြစတေးလျဒေါ်လာ ၄ သန်းခွဲဖြစ်သည်။
Credit: iMyanmarHouse.com
(iMyanmarHouse.com Team မှ ရေးသား ဖော်ပြသည်။)
