ဗြိတိန်တော်ဝင်မင်းသား ဟယ်ရီနှင့် ကြင်ယာတော် အမေရိကန်သရုပ်ဆောင် မီဂန်မာကယ်လ်တို့သည် မင်္ဂလာပွဲမတိုင်မီကာလက ခေတ္တအတူနေထိုင်ခဲ့ကြသည့် စံအိမ်ကြီးကို ၂ နှစ်စာချုပ်ဖြင့် ငှားရမ်းလိုက်ကြောင်း US Weekly သတင်းတစ်ရပ်တွင် ဖော်ပြသည်။
အဆိုပါစံအိမ်မှာ ဝက်စ်ဖီးလ်ဒ်လာ့ဂ်ျဟု အမည်ရပြီး အင်္ဂလန်တောင်ပိုင်း ကော့စ်ဝေ့ါစ် (Cotswolds) အရပ်တွင် တည်ရှိပြီး မင်္ဂလာပွဲမတိုင်မီက သီတင်းပတ်ကုန်အားလပ်ရက်တစ်ခုတွင် အတူနေထိုင်ခဲ့ကြဖူးသည့် နေရာလည်း ဖြစ်သည်။
လက်ရှိအားဖြင့် မင်းသားဟယ်ရီနှင့် မီဂန်မာကယ်တို့သည် အာဖရိက အရှေ့ပိုင်းသို့ ပျားရည်ဆမ်းခရီးထွက်လျက်ရှိပြီး အဆိုပါခရီးစဉ်မှ ပြန်လည်ရောက်ရှိပါက ယခုငှားရမ်းထားသည့် စံအိမ်ကြီးတွင် နေထိုင်ကြမည် ဖြစ်သည်။
မင်းသားဟယ်ရီတို့သည် ကန်ဆင်တန်နန်းတော်ဝန်းအတွင်းရှိ နော်တင်ဟမ်စံအိမ်ကြီးတွင် အမြဲအခြေချနေထိုင်ရမည်ဖြစ်သော်လည်း လက်ထပ်ပြီးစ ၎င်းတို့ဇနီးမောင်နှံနေထိုင်ရန်အတွက် ပြုပြင်မွမ်းမံမှုများ အသေးစိတ်ပြန်လည်ပြုလုပ်လျက်ရှိခြင်းကြောင့် ယခုကဲ့သို့ အိမ်ငှားနေထိုင်ခဲ့ရခြင်းလည်း ဖြစ်သည်။ ကန်ဆင်တန်နန်းတော်ရှိ စံအိမ်တွင် အိပ်ခန်းပေါင်း ၂၁ ခန်းအထိ ပါဝင်သည်။
သို့ရာတွင် ယခုငှားရမ်းလိုက်သည့် စံအိမ်ကြီးကို သီတင်းပတ်ကုန်ပိုင်း အားလပ်ရက်အပန်းဖြေရာနေရာအဖြစ် အသုံးပြုဖွယ်ရှိသည်ဟူသည့် ခန့်မှန်းချက်များလည်း ရှိသည်။
မီဂန်မာကယ်သသည် ကော့စ်ဝေါ့စ်အရပ်ကို နှစ်သက်ပြီး ယခုစံအိမ်ကြီးကို ပထမဆုံးစတင်ရောက်ရှိချိန်မှာပင် နှစ်သက်မြတ်နိုးသွားခဲ့သည်ဟု ဆိုသည်။
အဆိုပါစံအိမ်ကြီးတည်ရှိရာ ခြံဝန်းကြီးအတွင်း မင်္ဂလာပွဲသို့ လာရောက်သည့် အခြားဧည့်စုံတွဲတစ်တွဲလည်း နေထိုင်သွားခဲ့ရာ ဒေးဗစ်ဘက်ခမ်းနှင့် ဗစ်တိုးရီးယားဘက်ခမ်းတို့ ဖြစ်လေသည်။
ဘုရင်မကြီးသည် မင်္ဂလာလက်ဖွဲ့အဖြစ် အိမ်ခြံမြေများကို ပေးအပ်လေ့ရှိသည့် အလေ့ရှိသည်။
တော်ဝင်မင်းသား ဝီလျံနှင့် ကြင်ယာတော်ကိတ်တို့သည် အဲလစ်ဇဘက်ဘုရင်မကြီး၏ သီးသန့်ပိုင်ဆိုင်မှုဖြစ်သော ဧကပေါင်း ၂၀၀၀၀ ကျော် ကျယ်ဝန်းသည့် Sandringham Estate စံအိမ်တော်ဝန်းကြီးအတွင်းရှိ အိပ်ခန်း ၁၀ ခန်းပါ Anmer Hall စံအိမ်ကို လက်ဖွဲ့ရရှိခဲ့သည်။
အဆိုပါအလေ့အထအတိုင်း မင်းသားဟယ်ရီနှင့် မီဂန်မာကယ်တို့လည်း အိမ်ခြံမြေလက်ဖွဲ့ရဖွယ်ရှိသည်။
တရားဝင်ထုတ်ဖော်ကြေညာချက်များမရှိသေးသော်လည်း Sandringham Estate စံအိမ်တော်ဝန်းကြီးအတွင်းတွင်ပင် တည်ရှိသော York Cottage စံအိမ်ကို လက်ဖွဲ့အဖြစ် ရဖွယ်ရှိသည်ဟု ခန့်မှန်းထားကြသည်။
ယခုငှားရမ်းလိုက်သည့် စံအိမ်မှာ လန်ဒန်မြို့မှ မိနစ် ၉၀ ခရီးသာရှိပြီး နွေးထွေးကာ နေသာသည့်နေရာကို လိုချင်သောကြောင့် ယခုနေရာကို ရွေးချယ်လိုက်ခြင်းဖြစ်သည်ဟုလည်း ဆိုသည်။
Credit: iMyanmarHouse.com
(iMyanmarHouse.com Team မှ ရေးသား ဖော်ပြသည်။)
