စစ်ကိုင်းစက်မှုဇုန်ရှိမြေကွက်များထဲမှ လုပ်ငန်းအကောင်အထည်ဖော်မထားသည့် မြေကွက်လွတ်စာရင်းများကို စတင်စာရင်းကောက်ယူနေကြောင်း စစ်ကိုင်းစက်မှုဇုန်စီမံခန့်ခွဲမှုကော်မတီ ဥက္ကဌဦးကိုကိုမြင့်က ပြောသည်။
''မကြာသေးခင်ရက်ပိုင်းကပဲ စတင်ကောက်ယူနေတာဖြစ်ပါတယ်။ ဒီလိုကောက်ယူဖို့အတွက် စစ်ကိုင်းခရိုင် စက်မှုဇုန်စီမံခန့်ခွဲရေးကော်မတီကနေ ညွှန်ကြားတာပါ။ ကောက်ယူပြီးရင်တော့ တိုင်းဒေသကြီးအစိုးရနဲ့ ခရိုင်စီမံခန့်ခွဲမှုကော်မတီကို တင်ပြပေးရမှာပါ'' ဟု ၎င်းက ပြောသည်။
အဆိုပါစက်မှုဇုန်မြေကွက်များစာရင်း ကောက်ယူရေးအဖွဲ့ကို ယခုလ ၁၅ ရက်က စတင်ဖွဲ့စည်းခဲ့ကြောင်း၊ စာရင်းများကို ယခုလအတွင်း အပြီးကောက်ယူနိုင်ရန် ဆောင်ရွက်သွားမည်ဖြစ်ကြောင်း သိရသည်။
လက်ရှိစာရင်းများအရ စစ်ကိုင်းစက်မှုဇုန်တွင် လက်ရှိလည်ပတ်နေသည့် စက်ရုံ၊ အလုပ်ရုံ ၃၉ ရုံ၊ ခေတ္တရပ်နားထားသည့် စက်ရုံ ၁၅ ရုံ စုစုပေါင်း စက်ရုံ၊ အလုပ်ရုံပေါင်း ၅၄ ရုံ၊ စက်မှုဇုန်မြေဧကမှာ ၉၆ဝ ဒသမ ၃၂ ဧက ရှိကြောင်း သိရသည်။
''မြေစာရင်းတွေ လာကောက်သွားတာ ဟုတ်ပါတယ်။ ဘာလုပ်မယ်ဆိုတာလဲ ဘယ်သူမှ မသိကြဘူး''ဟု စစ်ကိုင်းစက်မှုဇုန်တွင် ပရိဘောဂလုပ်ငန်း တည်ထောင်ထားသည့် လုပ်ငန်းရှင်တစ်ဦးက ပြောသည်။
လုပ်ငန်းအကောင်အထည်အရှိပဲ မြေကွက်လွတ်များရှိရာ စစ်ကိုင်းစက်မှုဇုန်ကို ၁၉၉၇ ခုနှစ်၊ ဒီဇင်ဘာ ၁၁ ရက်တွင် စတင်တည်ထောင်ခဲ့ကြောင်းနှင့် အဆိုပါစက်မှုဇုန်တွင်လည်ပတ်နေသည့် စက်ရုံအများစုမှာ အိမ်သုံးပစ္စည်းစက်ရုံ၊ မော်တော်ကားပစ္စည်းစက်ရုံ၊ စားသောက်ကုန်စက်ရုံ၊ သံရည်ကျိုစက်ရုံ၊ သစ်အခြေခံစက်ရုံတို့ဖြစ်သည်။
Credit: The Myanmar Times
