မန္တလေးတိုင်းဒေသကြီးအတွင်းရှိ မြို့နယ်(၈)ခုမှာ လာမယ့် (၂၀၁၈-၂၀၁၉) ဘဏ္ဍနှစ် (၆)လ ဘတ်ဂျက်မှာ နိုင်ငံ့ဝန်ထမ်းအိမ်ရာ တိုက်ခန်းပေါင်း (၂၄၈)ခန်းကို တိုင်းဒေသကြီးမြို့ပြနှင့် အိမ်ရာဖွံ့ဖြိုးရေးဦးစီးဌာနက အကောင်အထည်ဖော်ပေးသွားမှာဖြစ်ကြောင်း အဆိုပါဦးစီးဌာနမှ သိရပါတယ်။
အဲသည် အိမ်ရာတိုက်ခန်းတွေကို မန္တလေးတိုင်းဒေသကြီးအတွင်းရှိ မိုးကုတ်၊ မိတ္ထီလာ၊ ကျောက်ပန်းတောင်း၊ သာစည်၊ မလှိုင်၊ ရမည်းသင်း၊ မြင်းခြံနဲ့ ညောင်ဦးမြို့နယ်တို့မှာ တည်ဆောက်ပေးသွားမှာ ဖြစ်တယ်။
ဆက်လက်၍လည်း လက်ရှိတာဝန်ထမ်းဆောင်နေတဲ့ နိုင်ငံ့ဝန်ထမ်းတွေ၊ ကမ္ပဏီဝန်ထမ်းတွေ၊ ဝင်ငွေနည်းပြည်သူတွေနဲ့ နိုင်ငံ့ဝန်ထမ်း အငြိမ်းစားတွေအတွက် အရောင်းအိမ်ရာတွေကိုလည်း ထပ်မံတည်ဆောက်ပေးဖို့ စီစဉ်ဆောင်ရွက်နေတယ်လို့ သိရပါတယ်။
နိုင်ငံ့ဝန်ထမ်းတွေ နေရေးအဆင်ပြေစေဖို့အတွက် အိမ်ရာတွေတည်ဆောက်ပေးနေတဲ့အပြင် အရောင်းအိမ်ရာတွေကိုလည်း တည်ဆောက်ဖို့ အစီအစဉ်ရှိပါတယ်။
အဲသည် အရောင်းအိမ်ရာတွေကို အကောင်အထည်ဖော်ဆောင်ရွက်တဲ့အခါမှာ အငြိမ်းစား ဝန်ထမ်းတွေအတွက် ဦးစားပေးဆောင်ရွက် ပေးသွားမှာ ဖြစ်တယ်လို့ သိရပါတယ်။
လက်ရှိမှာ (၂၀၁၇-၂၀၁၈) ဘဏ္ဍရေးနှစ်မှာ ပြည်ထောင်စု အစိုးရ ဘတ်ဂျက်နဲ့ တိုင်းဒေသကြီးအစိုးရဘတ်ဂျက် စုစုပေါင်း ငွေကျပ် (၁၀)ဘီလျံသုံးစွဲပြီး အောင်မြေမန္တလာ နိုင်ငံ့ဝန်ထမ်းအိမ်ရာကို မန္တလေးတိုင်းဒေသကြီး ပုသိမ်ကြီးမြို့နယ် မဲကင်းကုန်းကျေးရွာအနီးရှိ မြေ(၃၃.၂၂)ဧကပေါ်မှာ တိုက်ခန်းပေါင်း(၅၀၀)တည်ဆောက်ပေးနေပါတယ်။
၎င်းတို့အနက် တိုင်းဒေသကြီး အစိုးရဘတ်ဂျက်နဲ့ တည်ဆောက်တဲ့ တိုက်ခန်းပေါင်း (၂၆၀)ဟာ (၉၅)ရာခိုင်နှုန်း ပြီးစီးနေပြီး အစိုးရဘတ်ဂျက်နဲ့ တည်ဆောက်တဲ့ တိုက်ခန်းပေါင်း (၂၄၀)က (၃၈)ရာခိုင်နှုန်း ပြီးစီးနေပြီဖြစ်တယ်လို့ သိရပါတယ်။
မန္တလေးတိုင်းဒေသကြီးအတွင်းလက်ရှိအချိန် နိုင်ငံ့ဝန်ထမ်း (၅၆,၁၂၆)ဦး ရှိပေမဲ့ ၄င်းတို့အတွက် အိမ်ရာနေရာချထားပေးနိုင်မှုမှာ (၄.၉)ရာခိုင်နှုန်းသာရှိသောကြောင့် တိုင်းဒေသကြီး အစိုးရအဖွဲ့က အိမ်ရာများ ပိုမိုတည်ဆောက်ပေးနေတာ ဖြစ်ပါတယ်။
Credit: The Kumudra
