မော်လ်ဒိုက်သို့ အပန်းဖြေထွက်မည့်သူများအနေဖြင့် ကမ္ဘာ့ပထမဆုံးရေအောက် နေအိမ်တွင် ငါးများကို ကြည့်ရင်းတစ်ညလျှင့် ဒေါ်လာ ၅၀၀၀၀ ဖြင့် အိပ်စက်နိုင်မည့် အခွင့်အလမ်းပေါ်ပေါက်လာပြီ ဖြစ်သည်။
တောင်အာရှတွင် တည်ရှိသော မော်လ်ဒိုက်ရှိ အဆိုပါရေအောက်နေအိမ်စီမံကိန်းကို ကန်ဒေါ်လာ ၁၅ သန်း အကုန်အကျခံ ဆောက်လုပ်မည်ဖြစ်ပြီး ယခုအခါ စီမံကိန်းစတင်လိုက်ခြင်းလည်း ဖြစ်သည်။
နှစ်ထပ်ဟိုတယ်အဖြစ် ဆောက်လုပ်မည်ဖြစ်ပြီး ဟိုတယ်၏ အောက်ခြေတစ်ဝက်ခန့် ( ၁၆ ဒသမ ၄ ပေ) မှာ အိန္ဒိယသမုဒ္ဒရာ ရေပြင်အောက်တွင် နစ်မြုပ်နေမည်ဖြစ်ပြီး ယခုနှစ်ကုန်တွင် အပြီးသတ်ဆောက်လုပ်မည်ဟု ဆိုသည်။
ရေအောက်ခန်းတွင် တည်းခိုမည့်ဧည့်သည်များသည် အသက်ရှူပိုက်များ၊ wetsuits များ ဝတ်ဆင်ရန် မလိုဟု ဆိုသည်။
အဆိုပါ ရေအောက်ဟိုတယ်ကို မူရာကာဟု အမည်ပေးထားပြီး ဒေသတွင်း ဒိုင်ဗီဟီဘာသာအရ သန္တာဟု အဓိပ္ပာယ်ရသည်။
ပင်လယ်ရေအောက်မြင်ကွင်းများကို ၁၈၀ ဒီဂရီ ရှုမြင်နိုင်မည်ဖြစ်ပြီး ကြယ်ငါးပွင့်ဟိုတယ်အဆင့် အိပ်ယာများ ထည့်သွင်းပေးထားမည် ဖြစ်သည်။
ပင်လယ်ရေအောက်အပိုင်းကို အခရိုင်းလစ်၊ စတီး၊ ကွန်ကရစ်တို့ဖြင့် ဆောက်လုပ်ရမည်ဖြစ်ပြီး ရေအောက်တွင် ကျယ်ဝန်းသော အိပ်ခန်း၊ ရေချိုးခန်း၊ ဧည့်ခန်းနှင့် ဒုတိယထပ်သို့ တက်မည့် ကြောင်လိမ်လှေကားတို့ ပါဝင်မည်ဟု ဆိုသည်။
တည်းခိုခကို နောက်ဆုံးအဆင့် အတည်ပြုရခြင်းမရှိသေးသော်လည်း တစ်ညလျှင့် ကန်ဒေါ်လာ ၅၀၀၀၀ ခန့် ကောက်ခံမည်ဟု ခန့်မှန်းထားကြောင်း Conrad Hotels & Resorts မှာ ဒါရိုက်တာတစ်ဦးဖြစ်သူ ကာလာ ခရော့ကက်ထ်က ပြောကြားသည်။
အဆိုပါ ဟိုတယ်တွင် ကမ္ဘာ့ပထမဆုံးရေအောက် စားသောက်ဆိုင်လည်း ဖွင့်လှစ်မည်ဖြစ်ပြီး နယူးဇီလန်မှ အင်ဂျင်နီယာကုမ္ပဏီတစ်ခု ဖြစ်သော M J Murphy Ltd ကို ငှားရမ်းထားသည်။
ဟိုတယ်တွင် လုံခြုံရေးစနစ်များလည်း များစွာထည့်သွင်းပေးထားမည်ဖြစ်ပြီး အရေးပေါ် မီးဘေးထွက်ပေါက်၊ မုန်တိုင်းနှင့် မြေငလျင်ဒဏ်တို့ကို ခံနိုင်မည့် ခိုင်မာသည့်ဖောင်ဒေးရှင်းတို့ဖြင့် ဆောက်လုပ်သွားမည်ဟု ဟိုတယ်၏ ဈေးကွက်မန်နေဂျာ သောမတ်စ် မာထရက်က ဆိုသည်။
ရေပေါ် အပေါ်ထပ်တွင် အပိုအိပ်ခန်း၊ သီးသန့် အားကစားလေ့ကျင့်ရေးခန်းမ၊ ဧည့်ခန်း၊ အရက်ဘားနှင့် မော်လ်ဒိုက်၏ သာယာသော ဆည်းဆာချိန်များကို ခံစားနိုင်မည့် လသာဆောင်တို့ ပါဝင်မည် ဖြစ်သည်။
ယခုဟိုတယ်သည် ကမ္ဘာလုံးဆိုင်ရာခရီးသွားများကို ပစ်မှတ်ထားကြောင်း ဟိုတယ်ကို ပိုင်ဆိုင်သည့် Crown Co., မှ ဒါရိုက်တာတစ်ဦး ဖြစ်သူ အာမက် ဆာလမ်က ပြောကြားသည်။
တန်ချိန် ၆၀၀ ရှိမည်ဖြစ်သည့် အဆောက်အအုံကို စင်္ကာပူတွင် ဆောက်လုပ်မည်ဖြစ်ပြီး ကရိန်းဖြင့် အထူးသင်္ဘောတစ်စင်းပေါ်သို့ တင်ဆောင်ကာ မော်လ်ဒိုက်ရှိ သမုဒ္ဒရာရေပြင်တွင် ထားရှိမည် ဖြစ်သည်။
မော်လ်ဒိုက်သည် ကမ္ဘာတစ်ဝန်းမှ ကမ္ဘာလှည့်ခရီးသွားများစွာ လာရောက်ကြသည့်နေရာဖြစ်ပြီး ပြီးခဲ့သောနှစ်အတွင်း အများဆုံးလာရောက်ကြသည်မှာ တရုတ်၊ ဂျာမနီနှင့် ဗြိတိန်နိုင်ငံတို့မှ ဖြစ်သည်ဟု ဆိုသည်။
Credit: iMyanmarHouse.com
(iMyanmarHouse.com Team မှ ရေးသား ဖော်ပြသည်။)
