မြန်မာ နှစ်ဆန်း ၁ ရက်နေ့ အခါသမယ၊ သမ္မတ ဦးဝင်းမြင့်ရဲ့ နှစ်သစ်ကူး မိန့်ခွန်းထဲ လက်ရှိ ဝန်ထမ်းတွေနဲ့ အငြိမ်းစား ဝန်ထမ်းတွေ အိုးအိမ် ပိုင်ဆိုင်နိုင်မှု မရှိ ဖြစ်နေရတဲ့ အခြေအနေ အပေါ် အသိအမှတ်ပြု ပြောဆိုခဲ့ပြီး၊ ဒီပြဿနာကို ကိုင်တွယ် ဖြေရှင်း နေတယ်လို့ ဆိုပါတယ်။
ပုဂ္ဂလိက လုပ်ငန်းတွေမှာ အနည်းဆုံး လုပ်ခ တစ်ရက် ၄၈ဝဝ ကျပ် သတ်မှတ် ထားတာနဲ့ လိုက်လျော ညီထွေ ဖြစ်ဖို့၊ အရာရှိ မဟုတ်တဲ့ အစိုးရ ဝန်ထမ်း တွေကို လစာ ၂ဝ%၊ အရာရှိ အဆင့်တွေကို ၁ဝ% တိုးပေးမယ်လို့လည်း သမ္မတက ပြောသွားပါတယ်။
ဒါ့အပြင် လူ့အခွင့်အရေး ကာကွယ် မြှင့်တင်ရေး၊ သိမ်းဆည်းခံ လယ်ယာမြေတွေ မူလပိုင်ရှင် တွေကို ပြန်လည် အပ်နှံနိုင်ရေးနဲ့ မူးယစ်ဆေးဝါး နှိမ်နင်းရေး စတဲ့ ကိစ္စရပ်တွေလည်း သမ္မတက ထည့်သွင်း ပြောဆို သွားပါတယ်။
သမ္မတရဲ့ မိန့်ခွန်းထဲ ငြိမ်းချမ်းရေးကိစ္စ၊ ရခိုင်အရေးနဲ့ တိုင်းရင်းသားတွေနဲ့ ရင်ကြားစေ့ရေး စတဲ့ ကိစ္စတွေကိုတော့ မပါဝင်ခဲ့ပါဘူး။
ဒါကိုကြည့်ရင် သမ္မတက အစိုးရ အဖွဲ့တွင်း ပြုပြင် ပြောင်းလဲရေးနဲ့ လူမှုရေးဆိုင်ရာ ကိစ္စတွေကို အဓိကဆောင်ရွက်ပြီး ၊ ဒေါ်အောင်ဆန်း စုကြည်က ငြိမ်းချမ်းရေး၊ တိုင်းရင်းသား အရေး၊ ရခိုင်အရေး တို့ကို ကိုင်တွယ် ဆောင်ရွက်မယ့် သဘောလို့ မြန်မာ့ မဟာဗျူဟာနဲ့ မူဝါဒ လေ့လာရေး အဖွဲ့ ဒုတိယ ဒါရိုက်တာ ဦးနေထွန်းနိုင်က ပြောပါတယ်။
နိုင်ငံသူ နိုင်ငံသားတွေရဲ့ အခြေခံလိုအပ်ချက်တွေ ဖြစ်တဲ့ စားဝတ်နေရေးမှာ နေရေးက အဓိက လိုအပ်ချက်ဖြစ်တာကို တွေ့ရကြောင်းနဲ့ အိမ်မရှိလို့ ဖြစ်သလို နေထိုင်ကြရတဲ့ ပြည်သူတွေရဲ့ ဒုက္ခတွေ သတိပြုမိတယ်လို့ လည်း သမ္မတသစ် ဦးဝင်းမြင့်က ဆိုပါတယ်။
NLD အစိုးရ လက်ထက် ပြီးခဲ့တဲ့ ၂ နှစ် အတွင်း တိုင်းနဲ့ ပြည်နယ် အသီးသီးမှာ ဝန်ထမ်းအိမ်ရာ ၄၆၂၇ ခန်း တည်ဆောက် ပေးနိုင်ခဲ့ပြီး ကျန် ၃ နှစ်မှာလည်း အခန်း ၇၀၀၀ ကျော်ကို ထပ်မံ ဆောက်လုပ်ဖို့ စီစဉ်ထားကြောင်း သမ္မတက ပြောပါတယ်။
မြေယာ ပြဿနာတွေ အပေါ် လွှတ်တော် ဥက္ကဌ တာဝန် ယူစဉ်ကတည်းက အာရုံစိုက်မှု ရှိခဲ့တဲ့ ဦးဝင်းမြင့်ဟာ သမ္မတ နေရာကို ရောက်လာတဲ့ အခါမှာလည်း မြေသိမ်းယာသိမ်း ဖြစ်ရပ်တွေမှာ တရားမျှတမှု ဖော်ဆောင် ပေးနိုင်ရေး အပေါ် ဆက်လက် အလေးထား နေတာ တွေ့ရပါတယ်။
ဒါပေမယ့်လည်း၊ ဖြေရှင်းဖို့ ဖွဲ့စည်းထားတဲ့ အဖွဲ့ အစည်းတွေက မူလက မြေသိမ်းယူ ခဲ့တယ် ဆိုသူတွေနဲ့ ပတ်သက်နေတဲ့ အတွက် အခက်အခဲတွေ ရှုပ်ထွေးမှုတွေ အများကြီး ရှိတယ်လို့ မြန်မာ့မဟာဗျူဟာနဲ့ မူဝါဒလေ့လာရေးအဖွဲ့ဒုတိယ ဒါရိုက်တာ ဦးနေထွန်းနိုင်က ပြောပါတယ်။
အထူးသဖြင့် အမျိုးသား မြေအသုံးချမှု မူဝါဒနဲ့ လျော်ညီတဲ့ ဥပဒေတွေကို အမြန် ပြဌာန်းဖို့ လိုတယ်လို့ ဦးနေထွန်းနိုင်က ဆိုပါတယ်။
Credit: BBC
