ကမ္ဘာကျော် ရုပ်ရှင်ဇာတ်ကားကြီးများဖြစ်ကြသည့် Lethal Weapon နှင့် The Matrix Trilogy ဇာတ်ကားများ၏ ထုတ်လုပ်သူ ပိုင်ဆိုင် သည့် လော့စ်အိန်ဂျလိ ဇိမ်ခံစံအိမ်ကြီးကို ဝယ်ယူသွားသူမှာ ကမ္ဘာကျော်သူဌေးကြီး လာရီ အယ်လစ်ဆင်ဖြစ်ကြောင်း သတင်းများ ထွက်ပေါ်လာသည်။
လာရီ အယ်လစ်ဆင်သည် The Oracle ကုမ္ပဏီကို တည်ထောင်သူဖြစ်ပြီး ကယ်လီဖိုးနီးယားပြည်နယ်၊ လော့စ်အိန်ဂျလိမြို့ ၊ မာလီဘူးအရပ်ရှိ ပင်လယ်ကမ်းခြေစံအိမ်ကြီးကို ကန်ဒေါ်လာ ၃၈ သန်းဖြင့် ဝယ်ယူလိုက်ခြင်းဖြစ်သည်ဟု ဆိုသည်။
ရောင်းချသူ ဂျိုအယ်လ် ဆေးလ်ဗားသည် အမေရိကန်ရုပ်ရှင်ထုတ်လုပ်သူတစ်ဦးဖြစ်ပီး ကမ္ဘာကျော်အက်ရှင်ဇာတ်လမ်းများဖြစ်သော Lethal Weapon ဇာတ်ကားများ၊ The Matrix Trilogy ၊ Die Hard ဇာတ်ကားများ၏ ပထမဆုံးဇာတ်ကား ၂ ခုနှင့် Predator ဇာတ်ကားဖြင့် နာမည်ကျော်သည်။
လာရီ အယ်လစ်ဆင်သည် The Oracle ကုမ္ပဏီနှင့် အချိတ်အဆက်ရှိသော ကုမ္ပဏီတစ်ခုမှတစ်ဆင့် ယခုနေအိမ်ကြီးကို ဝယ်ယူခဲ့ခြင်း ဖြစ်သည်။
မှတ်တမ်းများအရ ယခုနေအိမ်သည် ၂၀၁၆ ဧပြီလအတွင်း ကန်ဒေါ်လာ ၅၇ ဒသမ ၅ သန်းဖြင့် အရောင်းဈေးကွက်သုိ့ ဝင်ရောက်လာခဲ့ဖူးသည်ဟု ဆိုသည်။
တည်နေရာမှာ လော့စ်အိန်ဂျလိမြို့ ၊ မာလီဘူးအရပ်၊ ပစိဖိတ်ကမ်းရိုးတန်းအဝေးပြေးလမ်းမကြီးပေါ်တွင် တည်ရှိသည်။
၂ ထပ်အိမ်ဖြစ်ပြီး အိပ်ခန်း ၅ ခန်း၊ ရေချိုးခန်း ၆ ခန်း၊ စားဖိုမှူးအဆင့်ကိုင်တွယ်နိုင်သည့် မီးဖိုဆောင်၊ သီးခြားဆောက်လုပ်ထားသည့် ဧည့်ဂေဟာအိမ်တစ်လုံးတို့ ပါဝင်ပြီး အဆိုပါဒေသအနီးဝန်းကျင်တွင် တင်းနစ်ကွင်းပါသည့် တစ်ခုတည်းသောနေအိမ်လည်း ဖြစ်သည်။
ဈေးကွက်တင်သည့် Hilton & Hyland ကုမ္ပဏီမှ အကျိုးဆောင် ဂျူဒီ ဖက်ဒါက ပြောကြားရာတွင် ယင်းနေအိမ်သည် ရုပ်ရှင်ထုတ်လုပ်သူ ၃ ဦးနှင့် ဆက်နွှယ်မှုများရှိခဲ့သည့် ဂန္ထဝင်စံအိမ်ကြီးဖြစ်ကြောင်း ပြောကြားသည်။
ဂျိုအယ်လ် ဆေးလ်ဗားသည် ယင်းနေအိမ်ကို ရုပ်ရှင်ထုတ်လုပ်သူ ရောဘတ် ချားတော့ဖ်ထံမှ ၂၀၀၃ ခုနှစ်အတွင်း ကန်ဒေါ်လာ ၁၄ ဒသမ ၃၇၅ သန်းဖြင့် ဝယ်ယူခဲ့သည်။
ရောဘတ်ချားတော့ဖ် ထုတ်လုပ်ခဲ့သည့် ဇာတ်ကားများအနက် Rocky နှင့် Raging Bull တို့မှာ နာမည်ကျော်သည်။
ချားတော့ဖ်က ယင်းနေအိမ်ကို The Exorcist ဝတ္ထုကြီးရေးသားသည့် စာရေးဆရာ ဝီလျံ ပီတာ ဘလက်တီထံမှ ဝယ်ယူခဲ့ကြောင်း အိမ်ခြံမြေမှတ်တမ်းများတွင် ဖော်ပြသည်။
ဘလက်တီသည် အဆိုပါဝတ္ထုကိုပင် ကိုယ်တိုင်ဇာတ်ညွှန်းရေးသားကာ ၁၉၇၃ ခုနှစ်တွင် ကိုယ်တိုင်ထုတ်လုပ်ခဲ့သည်။
Credit: iMyanmarHouse.com
(iMyanmarHouse.com Team မှ ရေးသား ဖော်ပြသည်။)
