အမေရိကန်သမ္မတ ဒေါ်နယ်ထရမ့်၏ အစ်မရင်းတော်စပ်သူက ဖလော်ရီဒါနေအိမ်ကို ကန်ဒေါ်လာ ၂၄ သန်းဖြင့် ဝယ်ယူမည့်သူ ပေါ်ပေါက်လာသည်။
ဒေါ်နယ်ထရမ့်၏ အစ်မ မေရီအန်နီ ထရမ့် ဘာရီသည် ပြည်ထောင်စု အယူခံခုံရုံးတရားသူကြီးဟောင်းတစ်ဦးလည်း ဖြစ်သည်။
ရောင်းချတော့မည့်နေအိမ်မှာ ဖလော်ရီဒါပြည်နယ်တွင် တည်ရှိပြီး သမ္မတဒေါ်နယ်ထရမ့်၏ ဆောင်းရာသီအိမ်ဖြူတော်ဟု
နာမည်ကျော်သည့် မာရာလာဂို အပန်းဖြေစခန်းနှင့် ကပ်လျက်တည်ရှိသည်။
စတုရန်းပေ ၈၂၇၀ ကျယ်ဝန်းသည့် အဆိုပါနေအိမ်ကို ကန်ဒေါ်လာ ၂၃ ဒသမ ၉ သန်းဖြင့် ရောင်းချမည်ဟု ဆိုသည်။
၁၉၅၆ ခုနှစ်က ဆောက်လုပ်ခဲ့သည့်နေအိမ်ဖြစ်ပြီး အိပ်ခန်း ၈ ခန်းပါဝင်သည့် အဆိုပါနေအိမ်ကို ပြီးခဲ့သည့် ဒီဇင်ဘာလကတည်းက အရောင်းဈေးကွက်တင်ထားခဲ့ခြင်းဖြစ်ကာ ထိုစဉ်ကခေါ်ဈေးမှာ ကန်ဒေါ်လာ ၂၂ ဒသမ ၉ သန်းဖြင့် စတင်ဈေးခေါ်ရောင်းချခဲ့ခြင်း ဖြစ်သည်။
နောက်ပိုင်း ဒီဇင်ဘာလအတွင်းတွင်ပင် ကန်ဒေါ်လာ ၂၃ ဒသမ ၉ သန်းသို့ တစ်သန်းဈေးမြှင့်ခဲ့ကြောင်း အိမ်ခြံမြေဈေးကွက် မှတ်တမ်းများတွင် ဖော်ပြသည်။
နေအိမ်အတွင်း စံမီဧည့်ခန်း၊ နေစာလှုံခန်း၊ စာကြည့်တိုက်၊ ပင်လယ်ဘက်သို့ မျက်နှာမူသည့် လသာဆောင်၊ ရေကူးကန်တစ်ခုတို့ ပါဝင်ကြောင်း ဈေးကွက်တင်ခဲ့သည့် Christian Angle Real Estate ၏ ကြော်ငြာတွင် ဖော်ပြထားသည်။
မစ္စက် ဘာရီသည် အသက် ၈၀ အရွယ်ရှိပြီဖြစ်ပြီး ယခုနေအိမ်ကို ၂၀၀၄ ခုနှစ်အတွင်း ကန်ဒေါ်လာ ၁၁ ဒသမ ၅ သန်းဖြင့် ဝယ်ယူခဲ့ခြင်းဖြစ်ကာ ပင်လယ်ကမ်းခြေမျက်နှာစာ ၁၉၄ ပေ ပါဝင်သည်။
ဝယ်လက်အမည်နှင့် အရောင်းအဝယ်ဖြစ်ခဲ့သည့်ဈေးနှုန်းများကိုမူ တရားဝင်ထုတ်ဖော်ကြေညာသေးခြင်း မရှိချေ။
Credit: iMyanmarHouse.com
(iMyanmarHouse.com Team မှ ရေးသား ဖော်ပြသည်။)
