အခုနောက်ပိုင်း ရွှေထည်တွေကို ချက်ချင်းလက်ငင်း မဝယ်နိုင်တဲ့သူတွေအတွက် အဆင်ပြေနိုင်ဖို့ မဲစုတဲ့စနစ်အတိုင်း ရောင်းချလာတာတွေ ရှိပါတယ်။
အွန်လိုင်းမှာ ရွှေတွေကို အရစ်ကျရောင်းချသူ မအိအိဖွေးက 'ရွှေတွေကို လက်ငင်းမဝယ်ချင်တဲ့သူတွေအတွက်ကိုတော့ အစ်မတို့ဘက်ကနေ ဘယ်လိုလုပ်ပေးပြီး ရောင်းချတယ်ဆိုရင် အဆင်ပြေနိုင်လဲ စဉ်းစားလိုက်တော့ မဲနဲ့ဆိုရင်တော့ ပိုအဆင်ပြေနိုင်တယ်ဆိုပြီး အနည်းဆုံး (၁၀)ယောက်မဲပေါ့၊ အဲဒါလေးစုပြီး တစ်ယောက်ကို (၅၀၀၀)၊ (၁၀,၀၀၀)လောက်နဲ့ လက်စွပ်လေးတွေ၊ နားကပ်လေးတွေကို ရောင်းတယ်၊ အဲဒီလိုမျိုးတွေ ရောင်းတယ်ဆိုတော့ နံပါတ်အရင်ကျတဲ့သူတွေက အရင်ယူ အဲဒီလိုမျိုးပေါ့၊ တစ်သုတ်မှာ ရောင်းတဲ့ပစ္စည်းကတော့ အတူတူပဲရောင်းတယ်' လို့ ပြောပါတယ်။
အွန်လိုင်းမှာ မဲစနစ်တွေနဲ့ရောင်းချတဲ့အခါမှာ ငွေကို တစ်လုံးတည်း မပေးရဘဲ အနည်းဆုံး ကျပ် (၅၀၀၀)ကနေ (၂၀,၀၀၀)လောက်အထိသာ ပေးရတာပါ။ နံပါတ်အရင်ကျတယ်ဆိုရင်လည်း အရင်ရနိုင်ပါတယ်။ အများဆုံး (၁၀)လလောက်သာ ပေးရတာကြောင့် ဝယ်သူတွေအတွက် ပိုပြီး အဆင်ပြေနိုင်တယ်လို့ ဆိုပါတယ်။ အွန်လိုင်းမှာ မဲစနစ်နဲ့ရောင်းချတာတွေက ငွေကို တစ်လုံးတစ်ခဲတည်း မပေးရဘဲ ခွဲသွင်းနိုင်တာကြောင့် အဆင်ပြေနိုင်မှာပါ။ အားနည်းချက်ကတော့ ရွှေဆိုင်ကြီးတွေမှာလို ကိုယ်စိတ်ကြိုက် ရွေးဝယ်နိုင်မှာ မဟုတ်ပါဘူး။ အွန်လိုင်းမှာ ရောင်းချနေတဲ့ ပစ္စည်းတစ်ချို့ကိုသာ ဝယ်ယူနိုင်သာကြောင့် ရွေးချယ်ဖို့ နည်းပါးသွားမှာ ဖြစ်ပါတယ်။
Credit: The Modern
