တည်ဆောက်ရေးကာလထက် ကျော်လွန်သည့် ရင်းနှီးမြှုပ်နှံမှုလုပ်ငန်းများကို မြန်မာနိုင်ငံ ရင်းနှီးမြှုပ်နှံမှုကော်မရှင် (MIC) က ဒုတိယအကြိမ် ဝင်ရောက်စစ်ဆေးမည်ဖြစ်ကြောင်း ရင်းနှီးမြှုပ်နှံမှုနှင့် ကုမ္ပဏီများညွှန်ကြားမှုဦးစီးဌာနထံမှ သိရသည်။
ရင်းနှီးမြှုပ်နှံမှုလုပ်ငန်းများသည် လုပ်ငန်းလိုအပ်ချက်အရ တည်ဆောက်ရေးကာလ တစ်နှစ်နှင့်အထက် ခွင့်ပြုပေးလျက်ရှိပြီး အချို့သောလုပ်ငန်းများမှာ မြေယာအခက်အခဲ၊ ရေအခက်အခဲနှင့် ရာသီဥတုဆိုးရွားမှုများကြောင့် တည်ဆောက်ရေး ကာလထက်ကျော်လွန်ကာ လုပ်ငန်းမစတင်နိုင်သည့် စီးပွားရေးလုပ်ငန်းများရှိကြောင်း ယင်းဌာနမှ ဒုတိယညွှန်ကြားရေးမှူးချုပ် ဦးသန်းအောင်ကျော်က ပြောကြားသည်။
“ အမှန်တကယ်တော့ သူတို့တွေ ဘာအခက်အခဲရှိလဲဆိုတာ ခေါ်မေးတာ။ ဥပမာ မြေယာလိုအခက်အခဲရှိရင် MIC အနေနဲ့ လုပ်ပေးနိုင်တာကိုကူညီပြီး လုပ်ငန်းမြန်ဆန်စေရေးကို လုပ်ပေးတယ်။ တကယ်လို့ အခက်အခဲမရှိဘဲနဲ့ တကယ်မလုပ်တဲ့ သူတွေကိုတော့ လုပ်ထုံးလုပ်နည်းနဲ့ အရေးယူမှာပါ ”ဟု ၎င်းက ရှင်းပြပြောဆိုသည်။
မြန်မာနိုင်ငံ ရင်းနှီးမြှုပ်နှံမှု ကော်မရှင်အနေဖြင့် ယခုဘဏ္ဍာနှစ်အတွင်း တည်ဆောက်ရေးကာလ ကျော်လွန်သည့် ကုမ္ပဏီ ၁၁ ခုကို ဝင်ရောက်စစ်ဆေးခဲ့ပြီး ယင်းကုမ္ပဏီများ၏ အခက်အခဲကို ကူညီပေးခဲ့ကြောင်း၊ အဆိုပါအခက်အခဲဖြစ်သည့် စီးပွားရေးလုပ်ငန်းများမှာ စက်မှုလုပ်ငန်း၊ အိမ်၊ ခြံ၊ မြေလုပ်ငန်း ၊ ဆောက်လုပ်ရေးနှင့် အခြားသောကဏ္ဍများလည်း ပါဝင်ကြောင်း ယင်းကော်မရှင်ထံမှ သိရသည်။
ပြည်တွင်း ပြည်ပ ရင်းနှီးမြှုပ်နှံသည့် လုပ်ငန်းများအနေနှင့် စတင်ဝင်ရောက်သည့်ချိန်မှစ၍ မြန်မာနိုင်ငံ ရင်းနှီးမြှုပ်နှံမှုကော်မရှင်သို့ လုပ်ငန်းအခြေအနေများကို သုံးလတစ်ကြိမ် အစီရင်ခံစာ တင်ရလေ့ရှိကာ တည်ဆောက်ရေးကြန့်ကြာသည့် လုပ်ငန်းများကို စစ်ဆေးလျက်ရှိကြောင်း MIC ထံမှ သိရသည်။
Credit: The Voice
