တစ်နှစ်လျှင် သိန်း ၄၈၀ ကျော်သာ ရရှိနေသော ရန်ကုန်မြို့ အောင်ဆန်းအားကစားကွင်းရှိ ဆိုင်ခန်း ၃၀၀ ထံမှ ငှားရမ်းခ တိုးကောက်ရန် စီစဉ်နေကြောင်း လူမှုရေးဝန်ကြီး ဦးနိုင်ငံလင်းက ပြောကြားသည်။
အဆိုပါကွင်းကို ဘောလုံးနှင့် ပြေးခုန်ပစ်ပြိုင်ပွဲများ အဆင့်မြှင့်တင် ကျင်းပနိုင်သည့်အထိ ဆောင်ရွက်ရန် စီမံချက် ရေးဆွဲထားပြီး ဆိုင်ခန်း ၃၂၁ ခန်းမှ တစ်နှစ်လျှင် ငှားရမ်းခအနေနှင့် ကျပ်သိန်း ၄၈၀ ကျော်သာ ရရှိနေခြင်းကြောင့် ခေတ်ကာလနှင့် လျော်ညီသည့် အခွန်နှုန်းထား တစ်ရပ်တိုးနိုင်ရန် စီစဉ်ခြင်းဖြစ်ကြောင်း ၎င်းက ဆက်လက် ပြောကြားသည်။
အဆိုပါ ဆိုင်ခန်းတစ်ခန်း ငှားရမ်းခနှင့်ပတ်သက်၍ ပျမ်းမျှတွက်ချက်မှုအရ တစ်ဆိုင်လျှင် ကျပ် ၁၂,၄၉၅ ကျော်သာ ရရှိနေခြင်း ဖြစ်သည်။
“နိုင်ငံတော်ဘဏ္ဍာငွေ ပိုရအောင် ဆိုင်ခန်းငှားရမ်း အခွန်နှုန်း တိုးကောက်မယ်။ ကစားကွင်းပြင်ဆင်ပြီးရင်တော့ အဆင့်မြင့်တန်း ဘောလုံးပွဲနဲ့ ပြေးခုန်ပစ်ပွဲတွေ ကျင်းပသွားမယ်”ဟု ၎င်းကဆိုသည်။
မတ်လ ၆ ရက် ရန်ကုန်တိုင်း လွှတ်တော်အစည်းအဝေးတွင် မင်္ဂလာတောင်ညွှန်မြို့နယ်၊ လွှတ်တော်ကိုယ်စားလှယ် ဦးလှဌေး၏ အောင်ဆန်း အားကစားကွင်းကို မည်ကဲ့သို့ ပြုပြင်ဆောင်ရွက်သွားမည်နှင့် ပြုပြင်ပြီးပါက ဘောလုံးအားကစားနှင့် ပြေးခုန်ပစ် အားကစားပြိုင်ပွဲများ အဆင့်မြှင့် ကျင်းပပေးရန် အစီအစဉ် ရှိ/မရှိ အပါအဝင် အားကစားကွင်းပတ်လည်ရှိ ဆိုင်ခန်းများကို မည်သည့်နှုန်းထားနှင့် မည်ကဲ့သို့ ငှားရမ်းထားရှိပြီး မည်သည့်ဌာနက ရရှိကြောင်း သိရှိလိုသည်ဆိုသော မေးခွန်းအပေါ် လူမှုရေးဝန်ကြီး ဦးနိုင်ငံလင်းက ပြန်လည် ဖြေကြားခြင်းဖြစ်သည်။
လက်ရှိတွင် အောင်ဆန်း အားကစားကွင်း ပြုပြင်ဆောင်ရွက်ရန် ပြည်ထောင်စု အစိုးရအဖွဲ့၏ ဥပဒေ လုပ်ထုံးလုပ်နည်းအရ အားကစားနှင့် ကာယပညာ ဦးစီးဌာနရုံးချုပ်သို့ အဆင့်မြှင့်တင်ရေး စီမံချက်နှင့်ပတ်သက်သည့် အစီအစဉ်ကို တင်ပြထားကြောင်း လူမှုရေးဝန်ကြီးက ဆက်လက် ပြောကြားသည်။
“သမိုင်းအစဉ်အလာရှိတဲ့ အောင်ဆန်း အားကစားကွင်းကြီးနဲ့ ပတ်သက်တဲ့ စီမံဆောင်ရွက်မှု အခြေအနေကို အသေးစိတ် သိအောင် မေးလိုက်တာပါ”ဟု လွှတ်တော်ကိုယ်စားလှယ် ဦးလှဌေးက ဆိုသည်။
Credit: The Voice
