၂၀၁၇-၂၀၁၈ ဘဏ္ဍာရေးနှစ်အတွင်း စက်မှုလုပ်ငန်းနှင့် အိမ်၊ ခြံ၊ မြေ လုပ်ငန်းတို့တွင် ဝင်ရောက်သည့် နိုင်ငံခြားရင်းနှီးမြှုပ်နှံမှုပမာဏမှာ စုစုပေါင်းတန်ဖိုး၏ ၅၀ ရာခိုင်နှုန်းနီးပါးရှိကြောင်း ရင်းနှီးမြှုပ်နှံမှုနှင့် ကုမ္ပဏီများညွှန်ကြားမှု ဦးစီးဌာနထံမှ သိရသည်။
လက်ရှိတွင် နိုင်ငံခြား ရင်းနှီးမြှုပ်နှံမှုပမာဏမှာ အမေရိကန်ဒေါ်လာ ငါးဘီလီယံကျော်ရှိပြီး စက်မှုလုပ်ငန်းနှင့် အိမ်၊ ခြံ၊ မြေ လုပ်ငန်းများတွင်ဝင်ရောက်သည့် ရင်းနှီးမြှုပ်နှံမှုပမာဏမှာ အမေရိကန် ဒေါ်လာ ၂ ဒသမ ၇ ဘီလီယံကျော်ရှိကြောင်း ယင်းဌာနထံမှသိရသည်။
“စက်မှုလုပ်ငန်းတွေက အစတည်းက ရင်းနှီးမြှုပ်နှံမှုတိုးမြှင့်မယ့် ကဏ္ဍထဲပါတော့ များများဝင်တာပါပဲ။ အိမ်၊ ခြံ၊ မြေကတော့ ရန်ကုန်တိုင်းအစိုးရက တန်ဖိုးနည်းအိမ်ရာတွေ လုပ်တာရယ်၊ ပဲခူးတိုင်းမှာလည်း အိမ်ရာစီမံကိန်းတွေ လုပ်နေတာတွေကြောင့် ရင်းနှီးမြှုပ်နှံမှုတွေ ပိုပြီးတိုးလာတာပါ”ဟု ယင်းဌာနမှ အကြီးတန်းအရာရှိတစ်ဦးက ပြောကြားသည်။
ယခင်အစိုးရလက်ထက်က ရေနံနှင့် သဘာဝဓာတ်ငွေ့လုပ်ငန်းတွင် နိုင်ငံခြားရင်းနှီးမြှုပ်နှံမှု အများဆုံးဖြစ်သော်လည်း ယခုအချိန်တွင်မူ စွမ်းအင်ဝန်ကြီးဌာနက လုပ်ကွက်အသစ်များ ချထားပေးခြင်း မရှိသည့်အတွက် ယင်းလုပ်ငန်းတွင် ရင်းနှီးမြှုပ်နှံမှု ဝင်ရောက်ခြင်းမရှိပေ။
ယခုဘဏ္ဍာနှစ်တွင် နိုင်ငံခြားရင်းနှီးမြှုပ်နှံမှုပမာဏ အမေရိကန်ဒေါ်လာ ခြောက်ဘီလီယံကျော် ဝင်ရောက်ရန် မျှော်မှန်းထားပြီး ယခင်နှစ် ဧပြီလမှ ယခုနှစ် ဖေဖော်ဝါရီလအထိရရှိသည့် စာရင်းအရ ငါးဘီလီယံနီးပါးရှိသောကြောင့် ယခုနှစ်တွင် လျာထားချက်ထက် ကျော်လွန်နိုင်ကြောင်း ရင်းနှီးမြှုပ်နှံမှုနှင့်ကုမ္ပဏီများ ညွှန်ကြားမှုဦးစီးဌာန၏ စာရင်းများအရ သိရသည်။
“အိမ်၊ ခြံ၊ မြေက နိုင်ငံခြားရင်းနှီးမြှုပ်နှံမှုက တန်ဖိုးသင့်တွေ၊ တန်ဖိုးမြင့်တွေဆောက်တာတွေ တွေ့တယ်။ များများဆောက်ပေမယ့် လက်ရှိအနေအထားက အရောင်းအဝယ်အေးတယ်။ ဥပဒေလည်း မထွက်သေးတာပါတာပေါ့။ ရင်းနှီးမြှုပ်နှံမှုတွေ ဆက်ဝင်မယ်ဆိုရင် ဈေးကလည်း အသင့်အတင့်ရှိပြီး ဝန်ဆောင်မှုကောင်းတဲ့အိမ်ရာတွေ ပေါ်လာလိမ့်မယ်”ဟု အိမ်၊ ခြံ၊ မြေ လုပ်ငန်းရှင် ဦးမြင့်သောင်းက ပြောဆိုသည်။
Credit: The Voice
