ထားဝယ်အထူးစီးပွားရေးဇုန်စီမံကိန်းကို ကနဦးစီမံကိန်းနှင့် ပင်မစီမံကိန်းအဖြစ် အစိတ်ပိုင်းနှစ်ခု ခွဲခြားထားရာ ကနဦးစီမံကိန်းဖော်ဆောင်ရန် မြေငှားစာချုပ်ချုပ်ကို လာမည့်ဧပြီမတိုင်မီ ချုပ်ဆိုမည်ဟု စီးပွားရေးနှင့် ကူးသန်းရောင်းဝယ်ရေး ဒုတိယဝန်ကြီး ဦးအောင်ထူးက ဖေဖော်ဝါရီ ၁၄ ရက်က ပြောသည်။
''ကနဦးလုပ်ငန်း စီမံကိန်းအပိုင်းအတွက် မြေငှားစာချုပ်ကို ချုပ်ဆိုနိုင်ရေး အပြည်ပြည်ဆိုင်ရာ ဥပဒေအကြံပေးတွေ ငှားရမ်းပြီးဧပြီမတိုင်မီ အပြီးသတ်ချုပ်ဆိုပြီး Concession Agreement (အစိုးရနှင့် ကုမ္ပဏီကြား လုပ်ငန်းညှိနှိုင်း သဘောတူညီချက်) နဲ့အညီ မကြာမီလွှဲပြောင်းပေးရန် ဆောင်ရွက်နေပါတယ်''ဟု ၎င်းက အမျိုးသားလွှတ်တော်တွင် ပြောခဲ့သည်။
အဆိုပါ ကနဦးစီမံကိန်းအတွက် ထားဝယ်အထူးစီးပွားရေးဇုန် စီမံခန့်ခွဲမှုကော်မတီနှင့် ထိုင်းပိုင် အီတာလျံထိုင်းကုမ္ပဏီတို့ကြား ၂ဝ၁၅ ခုနှစ်၊ သြဂုတ်လဆန်းတွင် ချုပ်ဆိုခဲ့သော သဘောတူစာချုပ်အရ လုပ်ငန်းများ မစတင်မီ ရက် ၂၁ဝ အတွင်း ကြိုတင် ဖြည့်ဆည်းရမည်များကို ဆောင်ရွက်ရန် သဘောတူခဲ့သော်လည်း အချိန်ပေးရန် လိုအပ်သဖြင့် ထပ်မံညှိနှိုင်းကာ လာမည့် ဧပြီ ၃ဝ ရက်အထိ ထပ်မံသက်တမ်းတိုးလိုက်ခြင်းဖြစ်သည်။
ထားဝယ်အထူးစီးပွားရေးဇုန် ကနဦးစီမံကိန်းအတွက် အကျယ်အဝန်းမှာ ဧက ၁ဝ,၃ဝဝ ကျော်ရှိပြီး၊ ဧက ၉,၈၉၅ မှာ လျော်ကြေးပေးရမည်ဟု ဆိုသည်။ အဆိုပါဧကများအနက် ၉၁၂ ဒသမ ၆၅ ဧကအတွက် လျော်ကြေးငွေကျပ် ၇ ဒသမ ၄၈၇ ဘီလျံပေးချေခဲ့ပြီးဖြစ်ကာ ကျန် ၃,၄၂၄ ဒသမ ၂၆ ဧကအတွက်လည်း ကျပ် ၃၈ ဒသမ ၁၆၁ ဘီလျံကို ဆက်လျော်ပေးမည်ဟု ဒုဝန်ကြီးက ဆိုသည်။
Credit: The Myanmar Times
