နိုဘယ်ဆုရှင် ကဗျာဆရာကြီး တီ-အက်စ်-အဲလိယက်နေထိုင်ခဲ့သည့် လန်ဒန်တိုက်ခန်း ပေါင် ၁၀ သိန်းနီးပါးဖြင့် ရောင်းချရန် အရောင်းဈေးကွက်ဝင်လာကြောင်း အင်္ဂလန်အခြေစိုက် အိမ်ခြံမြေသတင်းဝက်ဘ်ဆိုက်တစ်ခုတွင် ဖော်ပြသည်။
လန်ဒန်မြို့လယ်၊ ဝက်စ်မင်နစ္စတာမြို့၊ မာရီလီဘုန်းခရိုင်၊ ကရောဖို့ဒ်စံအိမ်အမှတ် ၁၈ တွင် တည်ရှိသည့် တိုက်ခန်းဖြစ်သည်။
တီ-အက်စ်-အဲလိယက်သည် ကရောဖို့ဒ်အဆောက်အအုံရှိ တိုက်ခန်းသို့ ဇနီးဖြစ်သူ ဗီဗီယန် ဟိတ်ခ်ျ-ဝုဒ်နှင့်အတူ ၁၉၁၆ ခုနှစ်၊ မတ်လတွင်းရွှေ့ပြောင်း နေထိုင်ခဲ့သည်။
သူ၏နာမည်ကျော် ကဗျာတစ်ပုဒ်ဖြစ်သော The Love Song of J Alfred Prufrock ကဗျာကို ရေးသားပြီးနောက် မကြာမီတွင် အဆိုပါအခန်းသို့ ပြောင်းရွှေ့နေထိုင်ခဲ့ခြင်း ဖြစ်သည်။
ထိုကာလက နေအိမ်ခန်းတည်ရှိရာ အနီးတစ်ဝိုက်မှာ နေပျော်ဖွယ်ရာမရှိသောအရပ်ဖြစ်ပြီး အနီးတွင် ဆင်းရဲသားရပ်ကွက်များ၊ ဈေးဆိုင်ငယ်များ ဝန်းရံနေသည်။ကရောဖို့ဒ်အဆောက်အအုံမှ လမ်းလျှောက်သွားလျှင် အောက်စဖို့ဒ်လမ်းသို့ ၅ မိနစ်ခန့်ဖြင့် ရောက်ရှိနိုင်သည်။
တီ-အက်စ်-အဲလိယက်၏ နေအိမ်ခန်းကို အရောင်းဈေးကွက်တင်ခဲ့သည်မှာ Kay & Co ကုမ္ပဏီမှ ဖြစ်သည်။
ကရောဖို့ဒ်အဆောက်အအုံမှာမူ ဆောက်လုပ်ပြီးစ ငါးထပ်တိုက်ဖြစ်ပြီး ထိုခေတ်ထိုကာလက ခေတ်ပေါ်ဟုဆိုအပ်သော အသုံးအဆောင်များစွာ ထည့်သွင်းထားသည်။
ရေပူကိုလည်း အမြဲရရှိနိုင်ရာ ထိုကာလကမူ ဇိမ်ခံပစ္စည်းတစ်ခုသဖွယ် ဖြစ်ခဲ့သည်။အဲလိယက်နှင့် ဇနီးတို့သည် ၁၉၁၈ ခုနှစ်တွင် ဘက်ကင်ဟမ်ရှိုင်းယားရှိ နေအိမ်တစ်လုံးသို့ ပြောင်းရွှေ့ခဲ့ကြသော်လည်း အဆိုပါအခန်းကို အဲလိယက် ရံဖန်ရံခါ အသုံးပြုရန် မရောင်းချဘဲ ဆက်လက်ထားရှိခဲ့သည်။
၁၉၂၀ ပြည့်လွန်ကာလများတွင်မူ ရီးဂျန့်ပန်းခြံအနီးရှိ Clarence Gardens တွင် အခန်းတစ်ခန်း ဝယ်ယူလိုက်ပြီးနောက် ယခုအခန်းကို ရောင်းထုတ်ခဲ့သည်။
နေအိမ်ခန်းတွင် အိပ်ခန်း ၂ ခန်းနှင့် ရေချိုးခန်းတစ်ခန်းပါဝင်ပြီး ကြမ်းခင်းဧရိယာမှာ ၇၁၄ စတုရန်းပေ ဖြစ်သည်။
လက်ရှိပိုင်ရှင်များက မည်သည့်အတွက် ရောင်းထုတ်သည်ဆိုခြင်းကိုမူ မသိရချေ။
Credit: iMyanmarHouse.com
(iMyanmarHouse.com Team မှ ရေးသား ဖော်ပြသည်။)
