အိမ်ခြံမြေနဲ့ ပတ်သတ်တဲ့ မှတ်ပုံတင်ခြင်းအကြောင်းနဲ့ သိရှိထားသင့်တဲ့ ဥပဒေပုဒ်မနဲ့ပြဌာန်းချက်တွေကို ဖော်ပြပေးလိုက်ပါတယ် ။
မှတ်ပုံတင်ဥပဒေပုဒ်မ ၁၇ အရ တန်ဖိုးငွေကျပ် ၁၀၀ နဲ့ အထက်ရှိတဲ့ စာရွက်စာတမ်းတွေကို မှတ်ပုံမတင်ဘဲ မနေရတဲ့ စာချုပ်စာတမ်းအဖြစ် သတ်မှတ်ထားပါတယ် ။
မှတ်ပုံတင်ရမယ့် အချိန်ကာလ သတ်မှတ်ထားတာကတော့ သေတမ်းစာမှအပ တခြားစာချုပ်စတင်ချုပ်ဆိုခဲ့တဲ့ နေ့ကစပြီး လေးလအတွင်း မှတ်ပုံတင်ရပါမယ် ။ ဒါကိုတော့ စာချုပ်စာတမ်း မှတ်ပုံတင် အက်ဥပဒေ ပုဒ်မ ၂၃ မှာ သတ်မှတ်ထားတာဖြစ်ပါတယ် ။
အကြောင်းအမျိုးမျိုးကြောင့် မှတ်ပုံတင်ရန်ပျင်ကွက်ပြီး အချိန်ကျော်မှ မှတ်ပုံတင်ဖို့ တင်ပြတဲ့ စာရွက်စာတမ်းတွေကို မှတ်ပုံတင်အရာရှိက ပေးဆောင်ရမြဲဖြစ်တဲ့ မှတ်ပုံတင်ခရဲ့ ၁၀ ဆထက်မပိုတဲ့ ဒဏ်ကြေးပေးဆောင်စေပြီးမှ မှတ်ပုံတင်ခွင့်ပြုနိုင်ပါတယ် ။ ဒါကိုတော့ စာချုပ်စာတမ်း မှတ်ပုံတင်အက်ဥပဒေပုဒ်မ ၂၅ မှာ ပြဌာန်းထားပါတယ် ။
မရွှေ့ပြောင်းနိုင်တဲ့ ပစ္စည်းနဲ့ သက်ဆိုင်တဲ့ စာချုပ်စာတမ်းတွေကို အဆိုပါပစ္စည်းအားလုံးအတွက် ဒါမှမဟုတ် တစ်စိတ်တစ်ဒေသအရပ်မှာ တည်ရှိတဲ့ စာချုပ်စာတမ်း မှတ်ပုံတင်ရုံးမှာသာ မှတ်ပုံတင်ရမှာဖြစ်ပါတယ် ။ ဒါကိုတော့ စာချုပ်စာတမ်း မှတ်ပုံတင် အက်ဥပဒေပုဒ်မ ၂၈ မှာ သတ်မှတ်ထားတာဖြစ်ပါတယ် ။
Credit: The Kumudra
