ဆွေးနွေးအဖြေရှာ ဥပဒေရေးရာ

iMyanmarHouse ဆီသို့ အိမ်ခြံမြေချစ်သူများ ပေးပို့လာတဲ့ ဥပဒေရေးရာမေးခွန်းများထဲမှ သုံးခုကို ဒီတစ်ပတ်အတွက် ဖြေကြားတင်ဆက်ပေးလိုက်ပါတယ်။ ဥပဒေအသိကြွယ်စေဖို့ရာ အိမ်ခြံမြေဥပဒေဆိုင်ရာ အမေးအဖြေများကို iMyanmarHouse.com မှ အပတ်စဥ် တင်ဆက်ပေးလျက်ရှိပါသည်။

⚖️ မေးခွန်း (၁) - ၁၂ ကျော်နေထိုင်ရင်အိမ်ငှါးက အိမ်ပိုင်ဖြစ်ပါသလား။

ကာလစည်းကမ်းသတ်မှာ အမှုတစ်ခုလုံးတွင် အရေးပါသော ပြသနာတစ်ရပ်ပင်ဖြစ်ပါသည်။ တရားပြိုင်မှ ဆန့်ကျင်လက်ရှိထားသည်မှ စ၍ ကာလစည်းကမ်းသတ်ကို ရေတွက်ရမည်ဖြစ်ပါသည်။ ငှားရမ်းထားသူ နှင်လိုပါက မရွှေ့မပြောင်းနိုင်သော ပစ္စည်းအား လက်ရောက်ရလိုမှုမှာ (၁၂)နှစ်အတွင်း တရားစွဲဆိုရမည်ဖြစ်ပြီး အခမဲ့ ခွင့်ပြုချက်ဖြင့် နေထိုင်သူဖြစ်ပါက ကာလစည်းကမ်းသတ် (၆)နှစ်အတွင်း တရားစွဲဆိုရမည်ဖြစ်ပါသည်။ ကာလစည်းကမ်းသတ် ကျော်လွန်ပြီးသည့်အခါမှ တရားစွဲဆိုလျှင် တရားလိုမှ တရားစွဲဆိုခွင့်မရှိပါ။ ကာလစည်းကမ်းသတ် အက်ဥပဒေပုဒ်မ-၃ အရ ကာလစည်းကမ်းသတ်ကျော်လွန်ပြီးမှ စွဲဆိုသောအမှုများအား တရားမှ ပလပ်မည်ဖြစ်ပါသည်။

တရားလိုမှာ မိမိပိုင်ဆိုင်သော အိမ်ခြံမြေ အချင်းဖြစ်ပစ္စည်းအား ပြန်လည်လက်ရောက်ရယူလိုလျှင် ကာလစည်း ကမ်းသတ်(၁၂)နှစ်အတွင်း တရားပြိုင်သည် ဆိုင်ရေးဆိုင်ခွင့်မရှိဘဲ အဆိုပါပစ္စည်းအား သိမ်းပိုက်ထားကြောင်း တရားလိုက သက်သေထူတင်ပြရမည်ဖြစ်ပါသည်။ (ဒေါ်တင်ကြည်ပါ-၆ နှင့်ဦးစိုးဝင်း ၁၉၉၀၊ မတစ(ရုံးချုပ်)၂၈)

တရားရုံး အမိန့်ဒီကရီအရ ရောင်းချခြင်းအား အတည်ပြုရာတွင် ကာလစည်းကမ်းသတ် (၁)နှစ်၊ ကုန်ပစ္စည်းပျက်စီး၊ ပျောက်ဆုံးလျှင် ကာလစည်းကမ်းသတ်မှာ (၁)နှစ် ၊ အမွေထိန်းအပေါ် တရားစွဲဆိုလိုလျှင် ကာလစည်းကမ်းသတ် (၂)နှစ် စသဖြင့် သတ်မှတ် ကာလစည်းကမ်းသတ်အတွင်း တရားစွဲဆိုရမည်ဖြစ်ပါသည်။

တရားလို၏ အဆိုလွှာအရ ကာလစည်းကမ်းသတ် ထင်ရှားစွာမရှိဘဲ အကြောင်းခြင်းရာ ပေါ်ပေါက်နေလျှင် တရားရုံးမှ ကာလစည်းကမ်းသတ်အက်ဥပဒေပုဒ်မ-၃ အရ အဆုံးအဖြတ်ပေးမည်ဖြစ်ကာ တရားပြိုင်မှလဲ တရားမကျင့် ထုံးဥပဒေအမိန့် ၈၊ နည်း ၂အရ ချေလွှာတွင် ကာလစည်းကမ်းသတ်ကျော်လွန်ကာ တရားစွဲဆိုခွင့်မရှိကြောင်း ခုခံတင်ပြနိုင်ကြောင်း ဖြေဆိုပေးလိုက်ပါသည်။

ပုံစံ-၁၀၅ ဆိုတာ မှတ်တမ်းတစ်ရပ်သာဖြစ်ပြီး ပိုင်ဆိုင်မှု အထောက်အထားမဟုတ်ပါ။ အကျယ်အဝန်း ဖော်ပြပါရှိကာ မြေယာများနှင့် စပ်လျဉ်း၍ လက်ဝယ်ထားရှိရန် ထုတ်ပေးခြင်းဖြစ်ပြီး တရားရုံးတင်ပြရန် ၊ သက်ဆိုင်ရာရုံးတွင် မြေကွက်အကျယ်အဝန်းအတွက် အထောက်အထားများတင်ပြရန်၊ မြေယာ အငြင်းပွှားမှု များ ဖြေရှင်းရန်၊ မှတ်ပုံတင်စာချုပ်ချုပ်ဆိုရန်၊ ဂရန်အမည်ပြောင်း လျှောက်ထားခြင်းများ ဆောင်ရွက်ရန် အတွက်ဆိုလျှင်တော့ သက်ဆိုင်ရာ မြေစာရင်းဌာနမှ သက်သေခံမြေပုံ ထုတ်ပေးမည်ဖြစ်ပါသည်။

ထို့သို့ သက်သေခံခြင်းမှာလဲ မြေယာအချက်အလက် ဦးပိုင်၊ အကွက်အမှတ်၊ မြေတိုင်းအမှတ်၊ မြေအမျိုးအစား၊ အမည်ပေါက်၊ ဧရိယာအကျယ်အဝန်းအတွက် မှတ်တမ်းအဖြစ် ထားရှိသည်များကို သက်သေခံခြင်းဖြစ်ပြီး ပုံစံ-၁၀၅ မှာ မြေပိုင်ဆိုင်မှု အထောက်အထားတော့ ဖြစ်လာမည်မဟုတ်ပါ။ သို့သော် အရောင်းအဝယ်များပြုလုပ်သည့်အခါတိုင်းတွင်တော့ အဆိုပါမြေပုံ-၁၀၅ မဖြစ်မနေ ပိုင်ဆိုင်မှုစာချုပ်စာတမ်းများနှင့် ပူးတွဲ ပါရှိရပါမည်ဖြစ်ပါသည်။

ပုံစံ-(၇)၊ပုံစံ-၁၀၅ ထွက်ရှိပြီး ရွာနှင့်နီးစပ်သည်ဆိုရုံဖြင့် ရွာတိုးချဲ့မြေအဖြစ် သတ်မှတ်၍မရနိုင်ပါ။ လယ် ယာမြေကို အခြားနည်းသုံးစွဲမည်ဆိုပါက လယ်ယာမြေဥပဒေအရ အခြားနည်းအသုံးပြုခွင့် လ/ယ-၃၀ လျှောက်ထား ဆောင်ရွက်ခြင်း ပြုရမည်ဖြစ်သောကြောင့် ရွာမြေဆိုကာ ပုံစံ-၁၀၅ ပြရုံဖြင့် မဝယ်ယူလိုက်ပါနဲ့။ ရွာမြေများနှင့် မြို့နီးစပ် လယ်ယာမြေအမျိုးအစားများအား အခြားနည်းသုံးစွဲခွင့် ခွင့်ပြုမိန့် လ/ယ-၃၀ ၊ ပုံစံ-၁၀၅ ပြသပြီး ရောင်းချခြင်းဖြစ်ပါကလဲ သက်ဆိုင်ရာမြေစာရင်းဌာနတွင် စာရွက်စာတမ်းစစ်ဆေးခြင်း၊ စုံစမ်းခြင်း ပြုပြီးမှ ဝယ်ယူသင့်ပါသည်။

ပုံစံ-၁၀၆ မှာ မြေရာဇဝင် အတိုချုပ် မှတ်တမ်းပင်ဖြစ်ပါသည်။ စည်ပင်သာယာရေးကော်မတီတွင် မြေပုံ လျှောက်ထား ထုတ်ယူခြင်းဖြစ်ပါက ပုံစံ-၁၀၅/၁၀၆ တွင် မြို့ပြစီမံကိန်းနှင့် မြေစီမံခန့်ခွဲမှုဌာနမှုး လက်မှတ်ပါရှိရမည်ဖြစ်ပြီး အခြားမြို့နယ်များတွင် ပုံစံ-၁၀၅/၁၀၆ ထုတ်ယူခြင်းဖြစ်ပါက သက်ဆိုင်ရာမြို့နယ်၊မြေစာရင်းဌာနမှူး၏ လက်မှတ် ပါရှိရမည်ဖြစ်ပါသည်။

ပုံစံ(၇)ထွက်ရှိသည့် လယ်မြေ၊ လယ်ယာမြေ၊ ဥယျာဉ်ခြံမြေများတွင် မြေပုံ/မြေရာဇဝင်-၁၀၅/၁၀၆ ပူးတွဲ ထွက်ရှိသလို လူနေထိုင်ခွင့်ပြုသည့် ဘိုးဘွားပိုင်မြေ၊ မြေပိုင်မြေ၊ ဂရန်မြေများတွင်လဲ မြေပုံ/မြေရာဇဝင်- ၁၀၅/ ၁၀၆ ပူးတွဲပါရှိပါသည်။ လယ်ယာမြေပုံစံ-၇ ထွက်ရှိသည့် မြေအမျိုးအစားများတွင်လဲ R, R1, R2, R3, R4, RG, RP, M,Y,D, G ဟူ၍ရှိရာ ဧရိယာအကျယ်အဝန်းအား စစ်ဆေးမည်ဆိုပါက ပုံစံ-၁၀၅ အား ကြည့်ရှုရမည်ဖြစ်ကြောင်း ဖြေဆိုရေးသား ပေးလိုက်ပါသည်။

⚖️ မေးခွန်း (၃) - စလစ်မြေနှင့် ပါမစ်မြေ ဘာတွေ ကွာခြားပါသလဲ။

စလစ်မြေဆိုသည်မှာ သက်ဆိုင်ရာမြေစာရင်းဌာနများက အကွက်ချကာ မြေချစလစ်ချပေးသောမြေကို ခေါ်ဆို ခြင်းဖြစ်ပါသည်။ သက်ဆိုင်ရာမြေစာရင်းဌာနသို့ သွားရောက်စစ်ဆေးကာ ဝယ်ယူခြင်းဖြစ်ပါက အရောင်းအဝယ်စာချုပ် ချုပ်ဆိုပြီးလျှင် အိမ်ဆောက်လုပ် နေထိုင်ခွင့်ရှိလဲပါသည်။ အမည်ပေါက်ပြောင်းလဲခြင်းမရဘဲ ပါမစ်မြေအဖြစ် ပြောင်းလဲပြီး မှ ဂရန်အမည်ပေါက် လျှောက်ထားနိုင်ပါသည်။

ပါမစ်မြေကို ဝယ်ယူမည်ဆိုပါက (၁)လအတွင်း အိမ်ဆောက်လုပ်ရမည်ဖြစ်ပြီး ဂရန်ပြောင်းလဲ လျှောက်ထားလိုပါ က မြို့တော်စည်ပင်သာယာရေးကော်မတီတွင် ပါမစ်အမည်ပေါက်ပိုင်ရှင်နှင့် ဂရန်အမည်ပေါက် လျှောက်ထားမည်သူတို့ ချုပ်ဆိုထားသော အရောင်းအဝယ်စာချုပ်ပြသရန် လိုအပ်ပါသည်။ အိုးအိမ်မှ ထုတ်ပေးထားသော ပါမစ်ဆိုပါက အိုးအိမ် ရုံးတွင် စာရွက်စာတမ်း သွားရောက်စစ်ဆေးနိုင်ပြီး စည်ပင်ရုံးတွင် ပြောင်းထားသော ပါမစ်ဖြစ်ပါက စည်ပင်ရုံးတွင် သွားရောက် စစ်ဆေးရပါသည်။

ပါမစ်မြေချထားရာတွင် မိသားစုနေထိုင်ရန်အတွက် ဓာတ်ပုံများထည့်သွင်းကာ ခွင့်ပြုချက် ချပေးထားပြီး စာရွက် စာတမ်းများပြည့်စုံမှသာ ဝယ်ယူသင့်ပါသည်။ ပါမစ်မြေမှာတစ်ကွက်လျှင် (၄၀×၆၀) မြေကွက်ဖြစ်ပြီး ထိုမြေကွက်အား နှစ်ဦးနှစ်ဖက် ပိုင်ဆိုင်နေပါက ဂရန်လျှောက်ထားလျှင် နှစ်ဦးနှစ်ဖက် သဘောတူညီမှုနဲ့ နှစ်ဦးအမည်ပေါက်ဂရန် လျှောက်ထားနိုင်ပါသည်။

ပါမစ်မြေသည် မြေစီမံခန့်ခွဲမှုဌာနတွင် အစိုးရပိုင်သာမှတ်တမ်းတည်ရှိနေသဖြင့် ဦးပိုင်နံပါတ် မထွက်သေးပေ။ ပါမစ်မြေ၊ စလစ်မြေတို့မှာ အိမ်ဆောက်လုပ်နေထိုင်ရန်အတွက် ချပေးထားသော မြေအမျိုးအစားဖြစ်ကာ မြို့သစ် မြေကွက်များ ချပေးသည့်အခါ ထုတ်ပေးလေ့ရှိပြီး သက်ဆိုင်ရာမြေစာရင်းရုံးများတွင် သွားရောက်ကာ စစ်ဆေးရန်အထူး လိုအပ်ပါသည်။

ပါမစ်မြေများအား ဂရန်လျှောက်ထားသည့်အခါများတွင် တချို့မှာ ပါမစ်ပျောက်ဖြင့် ဂရန်လျှောက်ထားခြင်းများ ရှိပြီး ဂရန်အသစ်ထုတ်ယူခြင်းနှင့် ပတ်သတ်၍ တစ်စုံတစ်ယောက်မှ ပါမစ်မူရင်းတင်ပြကာ ကန့်ကွက်လာပါက ထုတ်ပေး သော ဂရန်မူရင်းအား ပယ်ဖျက်မည်ကိုသိရှိကြောင်း စာသားပါတံဆိပ်တုံး ရိုက်နှက်ကာ ဌာနမှ လျှောက်ထားသူအား လက်မှတ်ရေးထိုးစေခြင်းများလဲ ဆောင်ရွက်ကြောင်း ဖြေဆိုပေးလိုက်ပါသည်။

လူကြီးမင်းတို့ဝေဝါးနေတဲ့ ဥပဒေဆိုင်ရာမေးခွန်းများကို အိမ်ခြံမြေဥပဒေအကြံပေးရှေ့နေများမှ အပတ်စဉ် တနင်္ဂနွေနေ့ည ၇ နာရီတိုင်းမှာ မြန်ဆန်မှန်ကန်တိကျစွာဖြင့် ဖြေကြားပေးသွားမှာဖြစ်လို့.....မေးမြန်းတိုင်ပင်လိုသမျှ iMyanmarHouse.com Page Message Box နဲ့ အောက်ဖော်ပြပါ Link မှာ မေးမြန်းနိုင်ပါကြောင်း လက်တို့လိုက်ပါရစေ။

မေးခွန်းပေးပို့ရန် Link ➡ https://www.imyanmarhouse.com/property-questions-answers-ask

အိမ်ခြံမြေ ကိစ္စအဝဝနှင့် ပတ်သက်၍ ဥပဒေအကြံပေးပညာရှင်များနှင့် ဆွေးနွေးတိုင်ပင်လိုပါက iMyanmarHouse.com (အိုင်မြန်မာဟောက်စ်ဒေါ့ကွန်း) ၏ ဖုန်းနံပါတ်များဖြစ်သော 09-268022352 , 09-966901767 သို့ ဆက်သွယ်နိုင်ပါသည်။ အသေးစိတ်ကြည့်ရန် ဤနေရာကို နှိပ်ပါ။

ရောင်းရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

ငှားရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

iMyanmarHouse.com ၏ ဥပ​ဒေအကြံ​ပေး ပညာရှင်​အဖွဲ့ မှ အထူးရေးသားဖော်ပြသည်။

Credit: iMyanmarHouse.com