မရွှေ့ပြောင်းနိုင်သော ပစ္စည်း ဖြစ်သည့် အိမ်ခြံမြေ၊ တိုက်ခန်းများ ရောင်းဝယ်ရာတွင် အမွေဆိုင် သား သမီးများက ကန့်ကွက်ခြင်းသည်မြန်မာ့ဓလေ့ထုံးတမ်း ဥပဒေအရ တရားမဝင်ကြောင်း ဥပဒေပညာရှင်များက ပြောသည်။
အိမ်ခြံမြေ၊ တိုက်ခန်း၊ ကွန်ဒို၊ ကား အစရှိသည့် ပိုင်ဆိုင်မှုများကို မိဘနှစ်ပါး သက်ရှိထင်ရှား ရှိနေစဉ် အတွင်း ထုခွဲရောင်းချခြင်းအပေါ်သားသမီးများက ကန့်ကွက်ခြင်း၊ အနှောင့်အယှက်ပေးခြင်းတို့မှာ မြန်မာ့ဓလေ့ ထုံးတမ်းဥပဒေနှင့် မကိုက်ညီသည့်အပြင် သက်ဆိုင်သူများအနေဖြင့် ဥပဒေပါ ပြဋ္ဌာန်းချက်များကို သိရှိမှုအား နည်းခြင်းကြောင့် ပိုင်ဆိုင်မှုဆိုင်ရာပြဿနာများ၊ မိသားစုဝင်အချင်းချင်း အပြန်အလှန် တရားစွဲမှုများ ဖြစ်ပွားရခြင်းဖြစ်ကြောင်း ဥပဒေပညာရှင်များထံမှ သိရသည်။
မိဘပိုင် အိမ်ခြံမြေကို ရောင်းချရာတွင် သားသမီးများက တားမြစ် ကန့်ကွက်ခြင်း၊ ငွေကြေးတောင်းခံ ခြင်းတို့ ပြုလုပ်လာခဲ့ခြင်းကြောင့်အရောင်းအဝယ် ပျက်ပြားရသည့် ဖြစ်စဉ်များ အိမ်ခြံမြေအရောင်းအဝယ် ဈေးကွက်အတွင်း များပြားစွာဖြစ်ပွားခဲ့ကြောင်း၊ နောင်လည်း ဖြစ်ပွားနေဦးမည်ဖြစ်ကြောင်း၊ မိဘနှစ်ပါး သက်ရှိထင်ရှားရှိစဉ် ရောင်းဝယ်မှုများကို သားသမီးများက ဥပဒေကြောင်းအရ ကန့်ကွက်ပိုင်ခွင့် ရှိမရှိနှင့် ပတ်သက်၍ အိမ်ခြံမြေအကျိုးဆောင်များကိုယ်တိုင် နားလည်သိရှိမှုအားနည်းလျက်ရှိကြောင်း သင်္ဃန်းကျွန်း မြို့နယ် ပြည်သူ့လွှတ်တော်ကိုယ်စားလှယ် ဦးသိန်းညွန့်က ပြောသည်။
”ဗုဒ္ဓဘာသာမှာ လင်သေရင်မယား၊ မယားသေရင် လင် ဆိုပြီးပြဋ္ဌာန်းထားတယ်။ မိဘနှစ်ပါး ပိုင် ဆိုင်မှုက မိဘနဲ့ပဲ ဆိုင်တယ်။ သူအသက်ရှိစဉ်မှာ ကြိုက်သလို စီမံခန့်ခွဲခွင့် ရှိတယ်။ သေသွားရင် မိဘရဲ့ ပိုင်ဆိုင်မှုကို သားသမီးတွေပဲ ရတယ်။ ဗုဒ္ဓဘာသာမှာက သေတမ်းစာရေးခွင့်မရှိဘူး။ ခရစ်ယာန်မှာတော့ ရှိတယ်။ မိဘသေရင် မိဘပိုင်ဆိုင်တာကို သားသမီးတွေ ဆက်ခံခွင့်ရှိတယ်။ မြန်မာ့ဓလေ့ထုံးတမ်းဥပဒေ မှာ ဒါကို အတိအလင်းပြဋ္ဌာန်းထား တယ်။ မိဘသက်ရှိထင်ရှားရှိစဉ်မှာ တော့ သူပိုင်တဲ့အိမ်ခြံမြေ သူ့သဘောနဲ့ သူရောင်းတာကို သားသမီးတွေကန့်ကွက်နေတာတွေက မှားနေတယ်။ ကိုယ့်အတွက် မိဘစေတနာရှိ အောင်နေပြီး ကြိုးစားဖို့ပဲ လိုတယ်”ဟု ၎င်းက ပြောသည်။
မိဘများ ကွယ်လွန်ပြီးနောက် ပိုင်းတွင် ကျန်ရစ်သူ အမွေဆိုင်သားသမီးများအနေဖြင့် ပိုင်ဆိုင်မှုတန်ဖိုး ပိုမိုရရှိစေခြင်းငှာ တရားတပေါင် ဖြစ်ပွားကြရာတွင် အမှုသက်တမ်း ရှည်လျားသဖြင့် အချိန်ကုန်၊ လူပန်းဖြစ်ပြီး အားလုံးအကျိုးမရှိ ဖြစ်ရ ကြောင်း၊ ထို့ကြောင့် အမွေဆိုင်သားသမီးအချင်းချင်း ညှိနှိုင်းပြီးသဘောတူမှုဖြင့် ခွဲဝေခြင်းသည်သာ အကောင်းဆုံးဖြစ်ကြောင်း မဏ္ဍိုင်ဥပဒေ အကယ်ဒမီမှ တရားလွှတ်တော်ရှေ့နေ လုပ်သက် နှစ် ၂ဝ ကျော်ရှိသည့် ရှေ့နေ ဦးမောင်မောင်ဝင်းကပြောသည်။
”တစ်ခါတလေ အမှုက သိပ်ရှုပ်ထွေးလာရင် အမှုပြီးဖို့က ၁ဝ နှစ်လောက်အထိ ကြာတတ်တယ်။ နှစ် ၃ဝ လောက်အထိ ကြာတဲ့အမှုတွေတောင် ရှိနေတယ်။ အမွေပုံ ကုန်မှအေး ဆိုတဲ့ စကားတောင် ရှိသေးတယ်” ဟု ၎င်းက ပြောသည်။
မိဘနှစ်ပါး သက်ရှိထင်ရှားရှိနေစဉ်အတွင်း သားသမီးများကို ခွဲခြားကာ နှုတ်ဖြင့် ပေးကမ်းခဲ့မှုများ၊ စာချုပ်စာတမ်းဖြင့် ပေးကမ်းခဲ့မှုများကြောင့် မိဘများကွယ်လွန်သည့်အခါ သွေးသားရင်းချာ မောင်နှမများ အချင်းချင်း တရားတပေါင် ရင်ဆိုင်ရခြင်း၊ အမှုများ နှစ်ရှည်ကြာမြင့်ရခြင်းတို့မှာ မြန်မာဓလေ့ထုံးတမ်း ဥပဒေကို နားလည်သိကျွမ်းမှု အားနည်းသည့်အတွက် ဖြစ်ပွားရခြင်းဖြစ်ကြောင်း၊ ဗုဒ္ဓဘာသာဝင် မိဘများအနေဖြင့် နှုတ်ဖြင့် ပေးကမ်းခြင်း၊ အရပ်စာချုပ်များဖြင့် နှစ်သက်ရာသားသမီးများကို ပေးကမ်းခြင်းမှာလည်း တရားဝင်မှု မရှိကြောင်း၊ ထိုသို့ ပေးကမ်းခဲ့ခြင်းကြောင့် မိဘများကွယ်လွန်ပါက ပိုင်ဆိုင်မှုများ လက်ဝယ်ရရှိထားသည့် သားသမီးများနှင့် ကျန်မိသားစုဝင်များအကြား ပြဿနာများဖြစ်ပွားကာ တရားရုံးများတွင် အမွေပုံစီမံခန့်ခွဲမှု အတွက် ဦးတိုက်လျှောက်ထားမှုများတစ်နေ့တခြား များပြားလာခြင်းဖြစ်ကြောင်း ဥပဒေပညာရှင်များက ပြော သည်။
ကွယ်လွန်သူမိဘ၏ ကျန်ရစ်သူသားသမီးများအကြား ပိုင်ဆိုင်မှုအငြင်းပွားခြင်းကြောင့် သတင်းစာ များတွင် ကြော်ငြာထည့်သွင်းကာကန့်ကွက်ခြင်း၊ အပြန်အလှန် တရားစွဲဆိုခြင်း၊ လက်ရှိ လက်ရောက်နေထိုင် ပိုင်ဆိုင်ထားသူက အမှုမပြီးပြတ်အောင် လုပ်ပိုင်ခွင့်များအတွင်းမှ အချိန်ဆွဲခြင်းတို့ကြောင့် ဝယ်ယူသည့်သူများ အတွက် နှောင့်နှေးကြန့်ကြာမှုများနှင့်အတူ ငွေကြေးဆုံးရှုံးမှုများ တွေ့ကြုံရကြောင်း၊ ယင်းအမွေမှုများ ပြီးပြတ်ရန် နှစ်နှင့်ချီ ကြာမြင့်မည်ဖြစ်ကြောင်း၊ လက်ရောက်ပိုင် ဆိုင်ထားသူအနေဖြင့် စိတ်ကြိုက် အနေအထားမရောက်မချင်း အမှုကိုဆွဲဆန့်ထားလေ့ရှိကြောင်း၊ အမွေပုံစီမံခန့်ခွဲမှုသည် ရာဇဝတ်ကြောင်းနှင့် မဟုတ်ဘဲ တရားမကြောင်းနှင့်သာ သွားရခြင်းကြောင့် အချိန်ပေးပြီး တရားရင်ဆိုင်ခြင်းပြုနိုင်သူက တရားခွင် တွင် တစ်နည်းတစ်လမ်းအားဖြင့် အရေးသာလေ့ရှိကြောင်းသိရသည်။
”အများအားဖြင့် ပိုင်ဆိုင်ထားတဲ့သူက ခွဲမပေးချင်၊ ဒီနေရာကနေဖယ်မပေးချင်လို့ မကြာကြာအောင် သူ့ရဲ့ရှေ့နေတွေနဲ့ လုပ်ထုံးလုပ်နည်းအတိုင်း အချိ်န်ဆွဲပြီး လုပ်လာကြတယ်။ မြန်မာ့ဓလေ့ထုံးတမ်းဥပဒေ အတိုင်း မလုပ်ကြလို့ ပြဿနာတွေက မများသင့်ဘဲ များနေတာ” ဟု ဦးမောင်မောင်ဝင်းက ဆက်လက် ပြောသည်။
Credit: The Trade Times
