စင်္ကာပူမှ စံအိမ်ကြီးတစ်လုံးကို မလေးရှားဘဏ်သူဌေးကြီးတစ်ဦး၏ သမီးက စံချိန်တင်ဈေးနှုန်း စင်္ကာပူဒေါ်လာ ၉၄ သန်းနီးပါးပေးကာ ဝယ်ယူ

မလေးရှားမှ အကြီးမားဆုံး ဘဏ်ကြီးများအနက် တစ်ခုဖြစ်သော Public Bank ကို တည်ထောင်ခဲ့သူ၏ သမီးဖြစ်သူက စင်္ကာပူရှိ luxury စံအိမ်တစ်လုံးကို စံချိန်တင်ဈေးနှုန်းပေးကာ ဝယ်ယူသွားသည်။

အရောင်းအဝယ်ဖြစ်သွားသော အိမ်မှာ စင်္ကာပူတွင် GCB ဟု လူသိများသော ဘန်ဂလိုအိမ်အမျိုးအစားဖြစ်ပြီး စင်္ကာပူဒေါ်လာ ၉၃ ဒသမ ၉ သန်း (ကန်ဒေါ်လာ ၇၀ ဒသမ ၃ သန်း) ဖြင့် အရောင်းအဝယ်ဖြစ်ခဲ့ခြင်း ဖြစ်သည်။

စင်္ကာပူမှ နာမည်ကျော် Orchid လမ်းအနီး Tanglin Hill အရပ်တွင် တည်ရှိကာ ပြီးခဲ့သောလကမှ ဆောက်လုပ်ပြီးစီးခဲ့သော အသစ်စက်စက်စံအိမ်ဖြစ်ကြောင်း Bloomberg သတင်းဌာနက ကြည့်ရှုခွင့်ရခဲ့သည့် အိမ်ခြံမြေမှတ်တမ်းများတွင် ဖော်ပြသည်။

ဝယ်ယူသွားသူမှာ Public Bank Bhd ကို တည်ထောင်သူ တန် ဆရီ တေဟောင် ပီယို (Tan Sri The Hong Piow) ၏ သမီးဖြစ်သူ ဒီယိုနာ တေ လိရှန်း (Diona The Li Shian) ဖြစ်သည်။

မြေရှားပါးသော စင်္ကာပူတွင် GCB တို့ကို မက်မောသူ အလွန်များပြားသည်။

စင်္ကာပူတွင် GCB အိမ်အလုံးရေ ၂၈၀၀ သာရှိပြီး နိုင်ငံသားများသာ ပိုင်ဆိုင်ခွင့်ရှိသည်။

ယခုစံအိမ်တည်နေရာမှာ Orchid လမ်း ဈေးဝယ်ရပ်ကွက်နှင့် သံရုံးများရှိရာနေရာတွင် ဖြစ်သည်။

ခြံအကျယ်မှာ ၁၄၀၈ စတုရန်းမီတာ (၁၅၁၅၀ စတုရန်းပေ) ရှိသည်။

ယခု အရောင်းအဝယ်ဖြစ်သွားသော ဈေးနှုန်းအရဆိုလျှင် ၁ စတုရန်းပေလျှင် စင်္ကာပူဒေါ်လာ ၆၁၉၇ အထိ စံချိန်တင် ဈေးနှုန်းဖြစ်နေသည်။

စင်္ကာပူသတင်းစာ The Business Times က အဆိုပါအရောင်းအဝယ် စတင်ညှိနှိုင်းစဉ် ကနဦးကာလဖြစ်သော ပြီးခဲ့သောနှစ် ဇူလိုင်လအတွင်း သတင်းစတင်ဖော်ပြခဲ့သည်။

လိရှန်းသည် လက်ရှိအားဖြင့် စင်္ကာပူနိုင်ငံသူဖြစ်ပြီး ကွယ်လွန်သွားပြီဖြစ်သော သူဌေးကြီး ဟောင်ပီယို၏ သားသမီး ၄ ဦးအနက် တစ်ဦး ဖြစ်သည်။

ဟောင် ပီယိုသည် မလေးရှားရှိ အထင်ကရဘဏ်ကြီးဖြစ်သော Public Bank Bhd ကို တည်ထောင်ခဲ့သူ ဖြစ်သည်။

စင်္ကာပူမှ အိမ်ခြံမြေ Developer ဖြစ်သော Meir Homes က အဆိုပါမြေနေရာတွင် စံအိမ်သစ် တစ်လုံး ဆောက်လုပ်ပေးခဲ့ခြင်း ဖြစ်သည်။

အိမ်ခြံမြေမှတ်တမ်းများအရ ထိုမြေကွက်နေရာသည် ၂၀၂၂ ခုနှစ်အတွင်း စင်္ကာပူဒေါ်လာ သန်း ၃၀ ဖြင့် အရောင်းအဝယ်ဖြစ်ခဲ့ကြောင်း ဖော်ပြသည်။

နှစ်ထပ်အိမ်ဖြစ်ပြီး မြေအောက်ထပ်လည်း ပါဝင်ကာ စုစုပေါင်း ကြမ်းခင်းဧရိယာ ၂၇၅၆ စတုရန်းမီတာ ရှိသည်။

စံအိမ်ဆောက်လုပ်ရာတွင် ဂျပန်ဝက်သစ်ချအပြင် ဥရောပမှ တင်သွင်းလာသော ပစ္စည်းများကို သုံးထားသည်။

အလျား ၂၅ မီတာရှိ ရေကူးကန်၊ ဝိုင်သိုလှောင်ခန်းနှင့် ထိုင်ခုံ ၁၈ လုံးဆန့် ရုပ်ရှင်ရုံတို့လည်း ပါဝင်သည်။

Public Bank သည် ချေးငွေ ပမာဏအရဆိုလျှင် မလေးရှား၏ ဒုတိယအကြီးမားဆုံးဘဏ်ကြီးအဖြစ် ရပ်တည်နေသည်။

Bloomberg သတင်းဌာန၏ အချက်အလက်များအရ လိရှန်းတို့ မိသားစုသည် Public Bank ၏ ရှယ်ယာ ၂၀ ရာခိုင်နှုန်း ပိုင်ဆိုင်ထားကြောင်း သိရသည်။

အိမ်ခြံမြေ ကိစ္စအဝဝနှင့် ပတ်သက်၍ ဥပဒေအကြံပေးပညာရှင်များနှင့် ဆွေးနွေးတိုင်ပင်လိုပါက iMyanmarHouse.com (အိုင်မြန်မာဟောက်စ်ဒေါ့ကွန်း) ၏ ဖုန်းနံပါတ်များဖြစ်သော 09-268022352 , 09-966901767 သို့ ဆက်သွယ်နိုင်ပါသည်။ အသေးစိတ်ကြည့်ရန် ဤနေရာကို နှိပ်ပါ။

ရောင်းရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

ငှားရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

(iMyanmarHouse.com Team မှ ရေးသား ဖော်ပြသည်။)

Credit: iMyanmarHouse.com

Ref: Public Bank heir buys Singapore mansion for record US$70m