စကၤာပူရွိ ေဆာ္ဒီအာေရးဗီးယားသံရံုးအေဆာက္အအံု စကၤာပူေဒၚလာ ၁၇၅ သန္းျဖင့္ အေရာင္းေစ်းကြက္ဝင္လာ

### Zawgyi Version ###

စကၤာပူႏိုင္ငံ ေတာင္ပိုင္း နာဆင္လမ္းတြင္ တည္ရွိေသာ ေဆာ္ဒီအာေရးဗီးယားသံရံုးအျဖစ္ အသံုးျပဳခဲ့သည့္ အေဆာက္အအံုေဟာင္းကို စကၤာပူေဒၚလာ ၁၇၅ သန္းျဖင့္ အေရာင္းေစ်းကြက္တင္လာသည္။

စကၤာပူတြင္ ျခံအက်ယ္အဝန္း အနည္းဆံုး ၁၅၀၀၀ စတုရန္းေပရွိျပီး ႏိုင္ငံအတြင္း တန္ဖုိးအၾကီးဆံုးျဖစ္သည့္ good class bungalow (GCB) ဟုေခၚေသာ လူေနအိမ္မ်ား ရွိသည္။

ေဆာ္ဒီအာေရးဗီးယားသံရံုးသည္ GCB တစ္ခုျဖစ္ျပီး နာဆင္လမ္း၊ အမွတ္ ၄၀ တြင္ တည္ရွိကာ ယခင္က ေဆာ္ဒီအာေရးဗီးယားႏိုင္ငံ၏ ေတာ္ဝင္သံရံုးအျဖစ္ အသံုးျပဳခဲ့ျခင္းျဖစ္ျပီး ယခုအခါတြင္မူ ေခၚေစ်း ေဒၚလာ ၁၇၅ သန္းျဖင့္ တင္ဒါေခၚယူလာျခင္း ျဖစ္သည္။

စုစုေပါင္း အက်ယ္အဝန္း စတုရန္းေပ ၅၈၇၈၄ ရိွရာ ၁ စတုရန္းေပလွ်င္ စကၤာပူေဒၚလာ ၂၉၇၇ အထိ က်သင့္ေနျခင္းျဖစ္သည္။

အေရာင္းေစ်းကြက္တင္ေပးသည္မွာ CBRE ကုမၸဏီမွျဖစ္ျပီး ျပီးခဲ့ေသာ ေအာက္တိုဘာ ၁၆ ရက္ (ဗုဒၶဟူးေန႔) က အေရာင္းေစ်းကြက္ တင္ခဲ့ျခင္း ျဖစ္သည္။

နာဆင္လမ္းရွိ ခမ္းနားလွေသာ စံအိမ္ၾကီးမ်ားသည္ မၾကာေသးမီလမ်ားအတြင္း စံခ်ိန္တင္ေစ်းႏႈန္းမ်ား ရရွိခဲ့ေၾကာင္း CBRE ၏ မွတ္တမ္းမ်ားတြင္ ေဖာ္ျပသည္။

နာဆင္လမ္းရွိ စတုရန္းေပ ၈၄၅၄၃ က်ယ္ဝန္းေသာ GCB စံအိမ္တစ္လံုးကို ေဖ့စ္ဘုတ္ ပူးတြဲတည္ေထာင္သူ အက္ဒြါးဒို ဆာဗီရင္ထံ ေဒၚလာ သန္း ၂၃၀ (သို႔မဟုတ္) ၁ စတုရန္းေပလွ်င္ ၂၇၂၁ ေဒၚလာျဖင့္ ေရာင္းခ်ခဲ့ရဖူးသည္။

ေရာင္းခ်သြားသူမွာ Wing Tai Holdings ကုမၸဏီဥကၠဌ သူေဌးၾကီး ခ်န္းေဝကြမ္းႏွင့္ ၎၏ဇနီး ဟယ္လင္တို႔ ရွယ္ယာပါဝင္ေသာ Winright Investment မွ ျဖစ္သည္။

(အဆိုပါသတင္းကို iMyanmarHouse.com ဝက္ဘ္ဆိုက္ၾကီးတြင္ ေရးသားတင္ျပခဲ့ျပီးျဖစ္ရာ https://www.imyanmarhouse.com/news/read/847768  အင္တာနက္လင့္ခ္တြင္ ျပန္လည္ဖတ္ရႈႏိုင္ပါသည္)

CBRE ၏ ေဖာ္ျပခ်က္အရ ေဆာ္ဒီအာေရးဗီးယားသံရံုးသည္ နာဆင္လမ္းရွိ အေဆာက္အအံုမွ လြန္ခဲ့ေသာ ၁၀ ႏွစ္ကတည္းက ေျပာင္းေရႊ႕ခဲ့ျခင္းျဖစ္ျပီး အေဆာက္အအံု၏ ပိုင္ရွင္မွာ အလြန္တရာၾကြယ္ဝခ်မ္းသာလွသူတစ္ဦးျဖစ္သည္ဟု ဆိုသည္။

ဝယ္ယူမည့္ ဝယ္လက္အေနျဖင့္ သံရံုးအေဆာက္အအံုေဟာင္းေနရာတြင္ GCB အေဆာက္အအံုသစ္ ၃ ခု ျပန္လည္တည္ေဆာက္ႏိုင္သည္။

အေဆာက္အအံုတည္ရွိရာ ျခံဝန္းမ်က္ႏွာစာသည္ မီတာ ၇၀ (၂၂၉ ဒသမ ၆ ေပ) ခန္႔ရွိျပီး ၁၄၈၆၇ စတုရန္းေပ၊ ၁၅၇၇၉ စတုရန္းေပႏွင့္ ၂၈၁၃၈ စတုရန္းေပ အသီးသီးရွိေသာ ကပ္လ်က္ေျမကြက္ ၃ ခုျဖင့္ ေပါင္းစပ္ထားသည္။

လက္ရွိအားျဖင့္ စကၤာပူတြင္ GCB ေနအိမ္စာရင္းတြင္ ေျမကြက္ေနရာေပါင္း ၂၈၀၀ ခန္႔ရွိေၾကာင္း ျမိဳ႕ျပျပန္လည္ဖြံ႔ျဖိဳးေရး အာဏာပိုင္ဌာန၏ အခ်က္အလက္မ်ားတြင္ ေဖာ္ျပသည္။

အမွတ္ ၄၀ ၊ နာဆမ္လမ္း အေဆာက္အအံုေနရာသည္ GCB အေဆာက္အအံုတည္ရွိရာ ေနရာမ်ားအနက္ နာမည္အေက်ာ္ဆံုးျဖစ္ျပီး ျခံဝန္းအမ်ားစုတြင္ သံရံုးမ်ား၊ မဟာမင္းၾကီးရံုးမ်ား၊ စီးပြားေရးလုပ္ငန္းရွင္ သူေဌးၾကီးမ်ားႏွင့္ အလြန္တရာၾကြယ္ဝခ်မ္းသာေသာ မိသားစုမ်ား ေနထိုင္လ်က္ရွိၾကသည္။ တင္ဒါပိတ္မည့္ေန႔မွာ ႏိုဝင္ဘာလ ၁၄ ရက္ ညေန ၃ နာရီ ျဖစ္သည္။

Credit: iMyanmarHouse.com (iMyanmarHouse.com Team မွ ေရးသား ေဖာ္ျပသည္။)

### Unicode Version ###

စင်္ကာပူနိုင်ငံ တောင်ပိုင်း နာဆင်လမ်းတွင် တည်ရှိသော ဆော်ဒီအာရေးဗီးယားသံရုံးအဖြစ် အသုံးပြုခဲ့သည့် အဆောက်အအုံဟောင်းကို စင်္ကာပူဒေါ်လာ ၁၇၅ သန်းဖြင့် အရောင်းဈေးကွက်တင်လာသည်။

စင်္ကာပူတွင် ခြံအကျယ်အဝန်း အနည်းဆုံး ၁၅၀၀၀ စတုရန်းပေရှိပြီး နိုင်ငံအတွင်း တန်ဖိုးအကြီးဆုံးဖြစ်သည့် good class bungalow (GCB) ဟုခေါ်သော လူနေအိမ်များ ရှိသည်။

ဆော်ဒီအာရေးဗီးယားသံရုံးသည် GCB တစ်ခုဖြစ်ပြီး နာဆင်လမ်း၊ အမှတ် ၄၀ တွင် တည်ရှိကာ ယခင်က ဆော်ဒီအာရေးဗီးယားနိုင်ငံ၏ တော်ဝင်သံရုံးအဖြစ် အသုံးပြုခဲ့ခြင်းဖြစ်ပြီး ယခုအခါတွင်မူ ခေါ်ဈေး ဒေါ်လာ ၁၇၅ သန်းဖြင့် တင်ဒါခေါ်ယူလာခြင်း ဖြစ်သည်။

စုစုပေါင်း အကျယ်အဝန်း စတုရန်းပေ ၅၈၇၈၄ ရှိရာ ၁ စတုရန်းပေလျှင် စင်္ကာပူဒေါ်လာ ၂၉၇၇ အထိ ကျသင့်နေခြင်းဖြစ်သည်။

အရောင်းဈေးကွက်တင်ပေးသည်မှာ CBRE ကုမ္ပဏီမှဖြစ်ပြီး ပြီးခဲ့သော အောက်တိုဘာ ၁၆ ရက် (ဗုဒ္ဓဟူးနေ့) က အရောင်းဈေးကွက် တင်ခဲ့ခြင်း ဖြစ်သည်။

နာဆင်လမ်းရှိ ခမ်းနားလှသော စံအိမ်ကြီးများသည် မကြာသေးမီလများအတွင်း စံချိန်တင်ဈေးနှုန်းများ ရရှိခဲ့ကြောင်း CBRE ၏ မှတ်တမ်းများတွင် ဖော်ပြသည်။

နာဆင်လမ်းရှိ စတုရန်းပေ ၈၄၅၄၃ ကျယ်ဝန်းသော GCB စံအိမ်တစ်လုံးကို ဖေ့စ်ဘုတ် ပူးတွဲတည်ထောင်သူ အက်ဒွါးဒို ဆာဗီရင်ထံ ဒေါ်လာ သန်း ၂၃၀ (သို့မဟုတ်) ၁ စတုရန်းပေလျှင် ၂၇၂၁ ဒေါ်လာဖြင့် ရောင်းချခဲ့ရဖူးသည်။

ရောင်းချသွားသူမှာ Wing Tai Holdings ကုမ္ပဏီဥက္ကဌ သူဌေးကြီး ချန်းဝေကွမ်းနှင့် ၎င်း၏ဇနီး ဟယ်လင်တို့ ရှယ်ယာပါဝင်သော Winright Investment မှ ဖြစ်သည်။

(အဆိုပါသတင်းကို iMyanmarHouse.com ဝက်ဘ်ဆိုက်ကြီးတွင် ရေးသားတင်ပြခဲ့ပြီးဖြစ်ရာ https://www.imyanmarhouse.com/news/read/847768 အင်တာနက်လင့်ခ်တွင် ပြန်လည်ဖတ်ရှုနိုင်ပါသည်) CBRE ၏ ဖော်ပြချက်အရ ဆော်ဒီအာရေးဗီးယားသံရုံးသည် နာဆင်လမ်းရှိ အဆောက်အအုံမှ လွန်ခဲ့သော ၁၀ နှစ်ကတည်းက ပြောင်းရွှေ့ခဲ့ခြင်းဖြစ်ပြီး အဆောက်အအုံ၏ ပိုင်ရှင်မှာ အလွန်တရာကြွယ်ဝချမ်းသာလှသူတစ်ဦးဖြစ်သည်ဟု ဆိုသည်။

ဝယ်ယူမည့် ဝယ်လက်အနေဖြင့် သံရုံးအဆောက်အအုံဟောင်းနေရာတွင် GCB အဆောက်အအုံသစ် ၃ ခု ပြန်လည်တည်ဆောက်နိုင်သည်။

အဆောက်အအုံတည်ရှိရာ ခြံဝန်းမျက်နှာစာသည် မီတာ ၇၀ (၂၂၉ ဒသမ ၆ ပေ) ခန့်ရှိပြီး ၁၄၈၆၇ စတုရန်းပေ၊ ၁၅၇၇၉ စတုရန်းပေနှင့် ၂၈၁၃၈ စတုရန်းပေ အသီးသီးရှိသော ကပ်လျက်မြေကွက် ၃ ခုဖြင့် ပေါင်းစပ်ထားသည်။ လက်ရှိအားဖြင့် စင်္ကာပူတွင် GCB နေအိမ်စာရင်းတွင် မြေကွက်နေရာပေါင်း ၂၈၀၀ ခန့်ရှိကြောင်း မြို့ပြပြန်လည်ဖွံ့ဖြိုးရေး အာဏာပိုင်ဌာန၏ အချက်အလက်များတွင် ဖော်ပြသည်။

အမှတ် ၄၀ ၊ နာဆမ်လမ်း အဆောက်အအုံနေရာသည် GCB အဆောက်အအုံတည်ရှိရာ နေရာများအနက် နာမည်အကျော်ဆုံးဖြစ်ပြီး ခြံဝန်းအများစုတွင် သံရုံးများ၊ မဟာမင်းကြီးရုံးများ၊ စီးပွားရေးလုပ်ငန်းရှင် သူဌေးကြီးများနှင့် အလွန်တရာကြွယ်ဝချမ်းသာသော မိသားစုများ နေထိုင်လျက်ရှိကြသည်။ တင်ဒါပိတ်မည့်နေ့မှာ နိုဝင်ဘာလ ၁၄ ရက် ညနေ ၃ နာရီ ဖြစ်သည်။

Credit: iMyanmarHouse.com (iMyanmarHouse.com Team မှ ရေးသား ဖော်ပြသည်။)