တရုတ်ပြည်၊ ဟိုင်နန်ကျွန်းအခြေစိုက် HNA ကုမ္ပဏီသည် လွန်ခဲ့သော ၂ နှစ်က ဝယ်ယူထားခဲ့သည့် အမေရိကန်ပြည်ထောင်စု၊ မင်နီဆိုးတားပြည်နယ်အခြေစိုက် Radisson Hospitality ဟိုတယ်အုပ်စုကို ရှန်ဟိုင်းမြို့ အခြေစိုက် Jin Jiang International Holdings ထံ ကန်ဒေါ်လာ ၂ ဘီလီယံဖြင့် ရောင်းချရန် စီစဉ်လျက်ရှိကြောင်း Radisson ကုမ္ပဏီ၏ ထုတ်ပြန်ချက်တစ်ရပ်တွင် ဖော်ပြသည်။
Jin Jiang International Holdings သည် တရုတ်နိုင်ငံပိုင် ဟိုတယ်အုပ်စုဖြစ်ပြီး အခြားရင်းနှီးမြှုပ်နှံသူများနှင့် လက်တွဲကာ Radisson Hospitality ဟိုတယ်အုပ်စုကို ကန်ဒေါ်လာ ၂ ဘီလီယံဖြင့် ဝယ်ယူရန် စီစဉ်ခြင်းဖြစ်ပြီး ဝယ်ယူမှုလုပ်ငန်းစဉ်တွင် အဆင့်များစွာ ပါဝင်မည်ဟု ဆိုသည်။
HNA ကုမ္ပဏီသည် တစ်ချိန်ကမူ ကမ္ဘာ့ထိပ်တန်း ဟိုတယ်အုပ်စုကြီးဖြစ်ခဲ့၏။
သို့ရာတွင် အကြွေးများစွာ တင်ရှိမှုကြောင့် ၂၀၁၇ နှစ်ကုန်ပိုင်းမှစတင်ပြီး ကမ္ဘာတစ်ဝန်းရှိ ဟိုတယ်များအားလုံး အပါအဝင် အိမ်ခြံမြေများစွာကို ရောင်းထုတ်လျက်ရှိရာ ယခုအရောင်းအဝယ်မှာ ၎င်းတို့၏ နောက်ဆုံးလက်ကျန်ကို ရောင်းထုတ်လိုက်ခြင်းလည်း ဖြစ်သည်။
HNA ကုမ္ပဏီသည် ၂၀၁၆ ခုနှစ်မှ စတင်ပြီး ဟီလ်တန်ဟိုတယ်၊ စပိန်မှ NH Hotels နှင့် Radisson ၏ ယခင်ကုမ္ပဏီဖြစ်သော Carlson Rezidor Hotels တို့၏ ရှယ်ယာများကို ကန်ဒေါ်လာ ၉ ဘီလီယံအထိ သုံးစွဲကာ ဝယ်ယူခဲ့သည်။
HNA ကုမ္ပဏီက ပြန်လည်ပေးဆပ်ရမည့် အကြွေးပမာဏမှာ ကန်ဒေါ်လာ ၁၀၀ ဘီလီယံနီးပါးရှိသောကြောင့် ယခုကဲ့သို့ ပိုင်ဆိုင်မှုအားလုံး ရောင်းထုတ်ရလျက်ရှိခြင်းလည်း ဖြစ်သည်။
Jin Jiang က Radisson ၏ ရှယ်ယာ ၅၁ ရာခိုင်နှုန်းကို ဝယ်ယူမည့်အပြင် ယင်းကုမ္ပဏီတွင် HNA Sweden က ပိုင်ဆိုင်ထားသည့် ရှယ်ယာ ၁၈ ဒသမ ၅ ရာခိုင်နှုန်းကိုလည်း ဝယ်ယူရန် သဘောတူခဲ့သည်ဟု ဆိုသည်။
ယခုအရောင်းအဝယ်အရ Jin Jiang သည် Radisson group ၏ အမှတ်တံဆိပ်များဖြစ်သော Radisson, Radisson Blu, Radisson Red, Park Inn and Country Inn & Suites တို့ကို ထိန်းချုပ်ခွင့်ရရှိမည် ဖြစ်သည်။
Jin Jiang သည် တရုတ်ပြည်တွင်းနှင့် ကမ္ဘာတစ်ဝန်းတွင် ဟိုတယ်ပေါင်း ၆၇၀၀ ကျော် ပိုင်ဆိုင် (သို့မဟုတ်) လုပ်ကိုင်လျက်ရှိသည်။
HNA သည် Radisson group ကို ၂၀၁၆ ခုနှစ်အတွင်း Carlson Rezidor ထံမှ ကန်ဒေါ်လာ ၂ ဘီလီယံဝန်းကျင်ဖြင့် ဝယ်ယူခဲ့ခြင်းဖြစ်သည်။
Credit: iMyanmarHouse.com
(iMyanmarHouse.com Team မှ ရေးသား ဖော်ပြသည်။)
