ဒူဘိုင်းတွင် ၂၀၁၆ အတွင်း နေအိမ်ခန်းသစ်ပေါင်း ၁၄၆၀၀ စံချိန်တင် ဈေးကွက်ဝင်ခဲ့ပြီး ၂၀၁၇ အတွင်းတွင်လည်း နေအိမ်ခန်းသစ်ပေါင်း ၁၁၀၀၀ မှ ၁၅၀၀၀ အထိ ဆက်လက်ဝင်ရောက်မည်ဖြစ်ခြင်းကြောင့် အိမ်ခြံမြေငှားရမ်းခ ကျဆင်းမည်ဖြစ်ကြောင်း နိုင်ငံတကာ အိမ်ခြံမြေအတိုင်ပင်ခံအဖွဲ့ JLL က ထုတ်ပြန်သည်ဟု အရှေ့အလယ်ပိုင်းအခြေစိုက် အိမ်ခြံမြေသတင်းဝက်ဘ်ဆိုက်တစ်ခုတွင် ဖော်ပြသည်။
JLL ၏ ၂၀၁၆ အိမ်ခြံမြေသုံးသပ်ချက် အစီရင်ခံစာတွင် ၂၀၁၆ ခုနှစ်အတွင်း ဒူဘိုင်း၌ နေအိမ်သစ်ပေါင်း ၃၁၀၀၀ ခန့် အရောင်းဈေးကွက်ဝင်လာမည်ဟု ခန့်မှန်းခဲ့သော်လည်း ၁၄၆၀၀ သာ အရောင်းဈေးကွက်ရောက်ခဲ့သည်။
“နေအိမ် ၃၁၀၀၀ အရောင်းဈေးကွက်ရောက်မယ်လို့ ခန့်မှန်းခဲ့ပေမယ့် တကယ်အပြီးသတ်ပြီး ဈေးကွက်ရောက်တဲ့ ပမာဏက ခန့်မှန်းချက်ရဲ့ ၃၅ ရာခိုင်နှုန်းကနေ ၅၀ ရာခိုင်နှုန်းကြားပဲရှိခဲ့ပါတယ်။ ဒီနှစ်အတွက်တော့ စုစုပေါင်း ၁၁၀၀၀ ကနေ ၁၅၀၀၀ ကြား ဈေးကွက်ရောက်မယ်လို့ ခန့်မှန်းပါတယ်” ဟု JLL ၏ သုတေသန အကြီးအကဲ ခရစ်ပလန့်က ပြောကြားသည်။
သို့ရာတွင် ၂၀၁၆ နှစ်စပိုင်း၌ နေအိမ်ခန်းသစ်ပေါင်း ၂၆၀၀၀ ကျော် ဆောက်လုပ်ရန် ရည်မှန်းခဲ့ပြီး ၁၄၀၀၀ ကျော် အပြီးသတ်ခဲ့ခြင်းမှာ ရှေးယခင်နှစ်များနှင့် နှိုင်းယှဉ်လျှင် ပိုမိုနီးစပ်သည့် အပြီးသတ်မှုဖြစ်ကြောင်းလည်း ၎င်းက ပြောကြားသည်။
၂၀၁၇ ခုနှစ်အတွင်း အေကိုယာစီမံကိန်းမှ နေအိမ်ခန်းပေါင်း ၃၃၀၀၊ ဒူဘိုင်းမရီနာမှ ၂၈၀၀ ၊ ဒူဘိုင်းအားကစားမြို့တော်မှ ၂၅၀၀၊ ဒူဘိုင်းဆီလီကွန်အိုအေစစ်မှ ၁၈၀၀ ၊ မေဒန်မှ ၁၈၀၀ နှင့် ဒူဘိုင်းဆောက်သ်မှ ၅၅၀ ဈေးကွက်ဝင်လာမည်ဟု ခန့်မှန်းထားသည်။
နေအိမ်ခန်းရောင်းလိုအားမြင့်တက်မှုများကြောင့် ၂၀၁၇ အတွင်း
အိပ်ခန်း ၂ ခန်းပါ လူနေခန်းများ ငှားရမ်းခ ကျဆင်းလိမ့်မည်ဟုလည်း ဟောကိန်းထုတ်သည်။
၂၀၁၆ ခုနှစ်အတွင်း ဒူဘိုင်းဆင်ခြေဖုံးဒေသများတွင် နေအိမ်ငှားရမ်းခများ ၄ ရာခိုင်နှုန်းကျဆင်းခဲ့သည်ဟု ဆိုသည်။
Credit: iMyanmarHouse.com
(iMyanmarHouse.com Team မှ ရေးသား ဖော်ပြသည်။)
