တရုတ်အချမ်းသာဆုံးစာရင်းဝင် သူဌေးကြီးဂျက်မသည် ဒေါ်နယ်ထရမ့်နှင့် ဆွေးနွေးခဲ့ရာတွင် အမေရိက၌ လာမည့် ၅ နှစ်အတွင်း အလုပ်အကိုင်နေရာပေါင်း တစ်သန်း ဖော်ဆောင်ရန်အတွက် ကတိပြုခဲ့သည်ဟု CNBC သတင်းတစ်ရပ်တွင် ဖော်ပြသည်။
သူဌေးကြီးဂျက်မသည် ၂၀၁၄ ခုနှစ်အတွင်း တရုတ်နိုင်ငံ၏ အချမ်းသာဆုံးပုဂ္ဂိုလ်အဖြစ် ရပ်တည်ခဲ့သော်လည်း Forbes မဂ္ဂဇင်းကြီး၏ မကြာသေးမီက ထုတ်ပြန်ချက်အရ ၂၀၁၆ ခုနှစ် တရုတ်နိုင်ငံ၏ အချမ်းသာဆုံးပုဂ္ဂိုလ် ၂၀ ဦးစာရင်းတွင် ဒုတိယနေရာသို့ ကျဆင်းသွားသည်ကို တွေ့ရပြီး ပထမနေရာတွင် အိမ်ခြံမြေ သူဌေးကြီးဝမ်ကျန်းလင် ရပ်တည်လျက်ရှိသည်။
ဒေါ်နယ်ထရမ့်က ပြောကြားရာတွင် ၎င်းသည် အလီဘာဘာ e-commerce အုပ်စု၏ အမှုဆောင်ဥက္ကဌ ဂျက်မနှင့် အလွန်ကောင်းမွန် သည့်တွေ့ဆုံဆွေးနွေးမှုတစ်ရပ် ပြုလုပ်ခဲ့ပြီး အမေရိကတွင် အလုပ်အကိုင်နေရာသစ်ပေါင်း တစ်သန်းဖော်ဆောင်ရန် ဆွေးနွေးခဲ့ ကြသည်ဟု အတည်ပြု ပြောကြားသည်။
ဂျက်မ၏ Alibabaကုမ္ပဏီမှာ အင်တာနက် ကူးသန်းရောင်းဝယ်ရေး လုပ်ငန်းဖြစ်ပြီး ယခုအခါတွင် အထည်အလိပ်၊ ဝိုင်နှင့် သစ်သီးဝလံ ထုတ်ကုန်များနှင့် စပ်လျဉ်းပြီး ဈေးကွက် ချဲ့ထွင်သွားမည်ဖြစ်ကာ အမေရိကနှင့် အရှေ့တောင်အာရှနိုင်ငံများအကြား ကုန်သွယ်မှုကို အထူးပြုသွားမည်ဟု ဆိုသည်။
“အမေရိကရဲ့ အနောက်အလယ်ပိုင်းမှာ ရှိတဲ့ စီးပွားရေး လုပ်ငန်းငယ်လေးတွေ တစ်သန်းကို အကူအညီပေးဖို့ ကျွန်တော်တို့ ဆွေးနွေးခဲ့ကြပါတယ်။ အမေရိကန် လယ်သမားတွေနဲ့ စီးပွားရေး လုပ်ငန်းငယ်တွေဟာ အလီဘာဘာ ပလက်ဖောင်းကနေ တစ်ဆင့် အမေရိကန်ကုန်စည်တွေကို တရုတ်နဲ့ အာရှစားသုံးသူတွေထံ အရောက်ပို့နိုင်အောင် ကူညီပေးသွားမှာ ဖြစ်ပါတယ်”ဟုဂျက်မကပြောကြားသည်။
ဂျက်မနှင့် ဒေါ်နယ်ထရမ့်တို့ တွေ့ဆုံဆွေးနွေးပြီးနောက် အလီဘာဘာ၏ ရှယ်ယာတန်ဖိုးများ တစ်ရာခိုင်နှုန်း မြင့်တက်သွားခဲ့သည်။ ဂျက်မနှင့် ဒေါ်နယ်ထရမ့်တို့သည် နယူးယောက်ရှိ ထရမ့်တာဝါတွင် တွေ့ဆုံဆွေးနွေးခဲ့ခြင်း ဖြစ်သည်ဟု ဆိုသည်။
ဂျပန်နည်းပညာကုမ္ပဏီ Softbank ကလည်း ဒေါ်နယ်ထရမ့်နှင့် တွေ့ဆုံပြီးနောက်ပိုင်း အမေရိကတွင် အလုပ်အကိုင်နေရာ ၅၀၀၀၀ ဖန်တီးပေးမည်ဟု ကတိကဝတ် ပြုထားသည်ဟု ဆိုသည်။
Credit: iMyanmarHouse.com
(iMyanmarHouse.com Team မှ ရေးသား ဖော်ပြသည်။)
