ရန်ကုန်မြို့ပတ်ရထားလမ်း အဆင့်မြှင့်တင်ခြင်း စီမံကိန်းအရ ၂၀၂၂ ခုနှစ်တွင် နေ့စဉ်စီးနင်းသူ ၂၆၃၀၀၀ အထိ တိုးတက်ရန် မျှော်မှန်းထားပြီး စီမံကိန်းအတွက် ဂျပန်နိုင်ငံမှ ODA ချေးငွေအပြင် ဘက်စုံသုံး ဒီဇယ်လျှပ်စစ်ရထားများကိုပါ မြန်မာနိုင်ငံအနေဖြင့် ၀ယ်ယူနိုင်ရန် မေတ္တာရပ်ခံထားကြောင်း ရန်ကုန်မြို့ပတ်ရထားလမ်း အဆင့်မြှင့်တင်ခြင်းစီမံကိန်း ပတ်ဝန်းကျင်ထိခိုက်မှု ဆန်းစစ်ခြင်းအစီရင်ခံစာ အပြီးသတ်မူကြမ်းအရ သိရသည်။
လူဦးရေနှင့် စီးပွားရေးတိုးတက်မှုအရ ရန်ကုန်တိုင်းဒေသကြီးတွင် ၂၀၃၅ ခုနှစ်၌ လူဦးရေ ၁၀ သန်းကျော်အထိ ရှိလာနိုင်သည့် အပြင် ယာဉ်ရထားဖြင့် ခရီးသွားလာမှုမှာလည်း ၉ ဒသမ ၅ သန်းအထိ တိုးတက်လာနိုင်သဖြင့် မြို့ပတ်ရထားလမ်း အဆင့်မြှင့်တင်ခြင်း စီမံကိန်းသည် မြို့ပြပို့ဆောင်ရေးအတွက် အရေးအပါဆုံးစီမံကိန်း ဖြစ်နေသည်။ မြို့ပတ်ရထား အဆင့်မြှင့်တင်ပြီးနောက် ယာဉ်ကြောပိတ်ဆို့မှု လျှော့ချနိုင်မည်ဖြစ်သလို အခြားအားသာချက်များလည်း ရှိနိုင်မည် ဖြစ်သည်။
မြို့ပတ်ရထားလမ်း အဆင့်မြှင့်တင်ရေးစီမံကိန်းအတွက် ထောက်ပံ့ပေးရန် ဂျပန်နိုင်ငံအစိုးရသို့ တရားဝင် မေတ္တာရပ်ခံထားချက်အရ ဂျပန်နိုင်ငံမှ ODA ချေးငွေ ဆောင်ရွက်ခြင်းဖြစ်ပြီး မြန်မာနိုင်ငံမှ မေတ္တာရပ်ခံထားမှုတွင် ရန်ကုန်မြို့ပတ်ရထားလမ်းရှိ မလွှကုန်းဘူတာမှ ရန်ကုန်ဘူတာကြီးအတွင်း အချက်ပြစနစ်သစ် တပ်ဆင်ခြင်းပါဝင်ပြီး ရန်ကုန်ဘူတာကြီးနှင့် (KP0+600) ကြား နှစ်ကီလိုမီတာရှိ အနောက်ဘက် အစိတ်အပိုင်းနှင့် (KP1+400) ကြား အရှေ့ဘက်အပိုင်းကို ဖယ်ထုတ်ထားပြီး ဘက်စုံသုံး ဒီဇယ်လျှပ်စစ်ရထားများ ၀ယ်ယူခြင်းတို့ ပါဝင်နေသည်။
ယင်းမေတ္တာရပ်ခံချက်အရ မြန်မာနိုင်ငံအနေဖြင့် မြို့ပြနှင့် ရထားလမ်းအလုပ်၊ ဘူတာရုံ စင်္ကြ၊ လျှပ်စစ်ဖြန့်ဖြူးရေး၊ အချက်ပြစနစ်အသစ်နှင့် ဘက်စုံသုံး ဒီဇယ်လျှပ်စစ်ရထားတပ်ဆင်ခြင်းအတွက် သိုလှောင်ရုံနှင့် အလုပ်ရုံတို့ကို မြန်မာ့မီးရထားရသုံးငွေဖြင့် မဖြစ်မနေ ကြိုတင်ဆောင်ရွက်ထားရမည် ဖြစ်သည်။ အဆိုပါ ဆောင်ရွက်မှုအတွက် လိုအပ်သည့် ပစ္စည်းအစိတ်အပိုင်းများကိုမူ JICA ထံမှ ရရှိမည်ဖြစ်ကြောင်း သိရသည်။
ရန်ကုန်မြို့ပတ်ရထားတွင် နေ့စဉ်စီးနင်းသည့် ခရီးသည်အရေအတွက်မှာ ၂၀၁၅ ခုနှစ် တွင် ၇၃၁၀၀ ရှိပြီး စီမံကိန်းမြှင့်တင်မှုအရ ၂၀၂၂ ခုနှစ်တွင် ၂၆၃၀၀၀ အထိ တိုးလာမည် ဖြစ်သလို အမြန်နှုန်းများ၊ နေ့စဉ် ရထားပြေးဆွဲနိုင်မှုများလည်း တိုးတက်လာမည်ဖြစ်ပြီး နေ့စဉ် စီးနင်းသူအရေအတွက်တွင် ၂၀၃၅ ခုနှစ်၌ တစ်နေ့လျှင် ခရီးသည် ခုနစ်သိန်းအထိ တိုးတက်လာရန် မျှော်မှန်းထားသည်။
ရန်ကုန်မြို့ပတ်ရထားလမ်း အဆင့်မြှင့်တင်ခြင်းစီမံကိန်းအရ လုပ်ဆောင်ရမည့် စီမံကိန်းအစိတ်အပိုင်းများမှာ အချက်ပြစနစ်သစ် တပ်ဆင်ခြင်း၊ ရထားတွဲဆိုင်းများ ၀ယ်ယူခြင်း၊ ရထားလမ်းများအား ပြန်လည်ချိန်ညှိခြင်း၊ လမ်းကြောင်းနှင့် ရထားလမ်းကြမ်းခင်းအလုပ်၊ ရေမြောင်းစနစ်၊ ရထားလမ်းဖြတ်တံတားများ ကြံ့ခိုင်မှုမွမ်းမံခြင်း၊ လူကူးခုံးကျော်တံတား အသစ်များ တည်ဆောက်ခြင်း၊ ရထားလမ်းဖြတ်၊ ခြံစည်းရိုးကာခြင်း၊ ဘူတာရုံအဆင့်မြှင့်တင်ခြင်း၊ အဆောက်အအုံအသေးစား တည်ဆောက်ခြင်း၊ ရထားပြုပြင်ထိန်းသိမ်းရေး အလုပ်ရုံများနှင့် လျှပ်စစ်ဖြန့်ဖြူးခြင်းစနစ်များ ပါဝင်ကြောင်း သိရသည်။
Credit: Eleven Media Group
