ရန်ကုန်စတော့ခ်အိတ်ချိန်း(YSX) မှာ ရှယ်ယာ အရောင်းပြုလုပ်ဖို့ နောက်ထပ် အသစ် တင်ပြထားတဲ့ အများပိုင် ကုမ္ပဏီ မရှိသေးဘူးလို့ ရန်ကုန်စတော့ခ်အိတ်ချိန်းက အမှုဆောင် အကြီးတန်း မန်နေဂျာ ဦးသက်ထွန်းဦးက ပြောပါတယ်။
လက်ရှိ ရန်ကုန်စတော့ခ်အိတ်ချိန်းမှာ (FMI) First Myanmar Investment,(MTSH) Myanmar Thilawa SEZ Holdings Public Ltd မြန်မာသီလဝါ အထူးစီးပွားရေးဇုန် ဟိုးဒင်းကုမ္ပဏီနဲ့ (MCB) Myanmar Citizens Bank Ltd မြန်မာနိုင်ငံသားများ ဘဏ် အများပိုင် ကုမ္ပဏီသုံးခုက ရှယ်ယာအရောင်းအဝယ် ပြုလုပ်နေကြတာ ဖြစ်ပါတယ်။
သည်လ ၂၀ ရက်နေ့မှာတော့ စတုတ္ထမြောက် ရှယ်ယာ အရောင်းအဝယ် ပြုလုပ်ဖို့ (FPB) First Private Bank Ltd. ပထမ ပုဂ္ဂလိကဘဏ်ကို ခွင့်ပြုထားပါတယ်။
လက်ရှိ ရန်ကုန်စတော့ခ်အိတ်ချိန်းမှာ ရှယ်ယာဈေးနှုန်းတွေက ဆက်တိုက်ကျဆင်းနေပါတယ်။ FMI ရှယ်ယာက အမြင့်ဆုံးဈေး ကျပ် ၄၁,၀၀၀ အထိ ဈေးပေါက်ခဲ့ပြီး သည်အပတ် အပိတ်ဈေးမှာတော့ ကျပ် ၁၃,၅၀၀ အထိ ကျဆင်းခဲ့ပါတယ်။ MTSH ကုမ္ပဏီကတော့ အမြင့်ဆုံးဈေး ရှယ်ယာတစ်ခုကို ကျပ် ၅၃,၀၀၀ အထိ ဈေးပေါက်ခဲ့ပေမဲ့ သည်တစ်ပတ် ရှယ်ယာ အပိတ်ဈေးမှာတော့ ကျပ် ၄၄၀၀ သာ ရှိပါတယ်။ MCB ကုမ္ပဏီကတော့ အမြင့်ဆုံးရှယ်ယာ တစ်ခုဈေးနှုန်း ကျပ် ၁၃,၅၀၀ ကနေ သည်တစ်ပတ် အပိတ်ဈေး ကျပ် ၉၂၀၀ အထိ ကျဆင်းပါတယ်။
ရန်ကုန်စတော့အိတ်ချိန်း ဖွင့်လှစ်ပြီး ကိုးလအကြာမှာ အများပိုင် ကုမ္ပဏီတွေရဲ့ ရှယ်ယာဈေးနှုန်းတွေကတော့ စံချိန်တင် ကျဆင်းနေတာ ဖြစ်ပါတယ်။
Credit: The Kumudra
