ပြည်ပ အိမ်ခြံမြေ သတင်း | Posted by ရွှေစင်ဝင်း
အမေရိကန်ပြည်၊ ကွန်နက်တီကပ်ပြည်နယ်ရှိ အထက်တန်းကျောင်းသူဟောင်းတစ်ဦးက စာမရေးတတ်၊ မဖတ်တတ်သော်လည်း အထက်တန်းစာမေးပွဲ အအောင်ပေးခဲ့သည့် ဆရာ၊ ဆရာမများကို တရားစွဲထားသည်။
အယ်လေးရှား အိုတိဇ် (Aleisha Ortiz) အမည်ရှိ အသက် ၁၉ နှစ်အရွယ် မိန်းကလေးက ၎င်းအပေါ် bully လုပ်ခြင်း၊ နှောင့်ယှက်ခြင်း၊ လစ်လျူရှုခြင်းများ လုပ်ဆောင်ခဲ့သော ကွန်နက်တီကပ်ပြည်နယ်၊ Hartford Public Schools ခရိုင်မှ ဝန်ထမ်းများအား နစ်နာကြေး ဒေါ်လာ ၃ သန်းရလိုကြောင်း တရားစွဲထားသည်။
အယ်လေးရှားသည် လေ့လာသင်ယူခြင်း မသန်စွမ်းမှု (learning disability) ခံစားနေရသူဖြစ်သည်။
(မှတ်ချက်။ လေ့လာသင်ယူမှု မသန်စွမ်းခြင်းဝေဒနာမှာ ဦးနှောက်နှင့် အာရုံကြောဆိုင်ရာ ပြဿနာတစ်ခု ဖြစ်သည်။ အသိဉာဏ်မှာ ပုံမှန်အတိုင်းဖြစ်သော်လည်း စာဖတ်၊ စာရေး၊ သင်္ချာ၊ ကျိုးကြောင်းဆင်ခြင်ခြင်း အစရှိသည်တို့ မလုပ်ဆောင်နိုင်ခြင်း ဖြစ်သည်)
အယ်လေးရှားက ပြောပြသည်မှာ ကျောင်းတက်ခဲ့သည့် နှစ်များစွာအတွင်း ပညာသင်ယူမှုအရင်းအမြစ်များနှင့် ထောက်ပံ့ကူညီမှုများပေးရန် တောင်းဆိုခဲ့သော်လည်း မိမိအားသင်ကြားမှုပေးသည့် အထူးပညာရေး ဆရာများက အခြားသူများရှေ့တွင် အော်ငေါက်ခြင်း၊ နှိမ့်ချဆက်ဆံခြင်းတို့သာ လုပ်ခဲ့ရာ မကြာခဏ ငိုကြွေးခဲ့ရ ကြောင်း ပြောသည်။
ယင်းနောက် စာမရေးတတ်၊ မဖတ်တတ်ဘဲ အထက်တန်းစာမေးပွဲ အောင်လက်မှတ်ရလာခဲ့သည်။
မိမိ၏ နာမည်ကို စာလုံးပေါင်းရန်ပင် အနိုင်နိုင်ဖြစ်နေကြောင်း အယ်လေးရှားက ABC သတင်းဌာန၏ လက်အောက်ခံ WTNH သတင်းဌာနနှင့် တွေ့ဆုံမေးမြန်းခန်းတွင် ပြောပြသည်။
“Hartford Public School မှာ တက်ခဲ့တဲ့ ဖြစ်ရပ်မျိုး တခြားဘယ်သူမှ မကြုံစေချင်ပါဘူး” ဟု အယ်လေးရှားက ပြောသည်။
အယ်လေးရှားသည် ပွေတိုရီကိုနိုင်ငံမှ အမေရိကန်ပြည်၊ ကွန်နက်တီကပ်သို့ ပြောင်းရွှေ့လာချိန်တွင် သူ၏ ရှိရင်းစွဲ စကားထစ်ခြင်း၊ စာဖတ်ရန် ခက်ခဲသည့် ဝေဒနာ၊ အာရုံမစူးစိုက်နိုင်သည့်ရောဂါတို့အပြင် ဘာသာစကား အတားအဆီးနှင့်လည်း ရင်ဆိုင်ရသည်။
“ကျောင်းတက်တဲ့ ပထမရက်တိုင်းမှာ သမီးက စာမဖတ်တတ်၊ မရေးတတ်ဘူး…အဲဒါကြောင့် ကျေးဇူးပြုမီး သမီးကို စိတ်ရှည်ပေးပါလို့ ဆရာတွေကို ပြောခဲ့ပါတယ်”
“ကျွန်မရဲ့ အခြေအနေကို သိပေမယ့် ဘယ်သူမှ မကူညီကြတာသိရတဲ့အချိန်မှာ ငိုကြွေးမိပါတယ်”
(▲ အယ်လေးရှား အိုတိဇ် (Aleisha Ortiz) အမည်ရှိ အသက် ၁၉ နှစ်အရွယ် မိန်းကလေးက ၎င်းအပေါ် bully လုပ်ခြင်း၊ နှောင့်ယှက်ခြင်း၊ လစ်လျူရှုခြင်းများ လုပ်ဆောင်ခဲ့သော ကွန်နက်တီကပ်ပြည်နယ်၊ Hartford Public Schools ခရိုင်မှ ဝန်ထမ်းများအား နစ်နာကြေး ဒေါ်လာ ၃ သန်းရလိုကြောင်း တရားစွဲထားသည်။)
(▲ အထူး ပညာရေးဆရာမ တစ်ဦးဖြစ်သူ တီလ်ဒါ ဆန်တီယာဂို (ပုံတွင်တွေ့ရသူ) သည် အယ်လေးရှားကို အခြားကျောင်းသားများနှင့် ဆရာများရှေ့တွင် အော်ငေါက်လေ့ရှိကြောင်း အယ်လေးရှား၏ တရားစွဲဆိုမှု မှတ်တမ်းတွင် ဖော်ပြသည်)
(▲ အယ်လေးရှား တက်ခဲ့သော Hartford အစိုးရအထက်တန်းကျောင်း)
အယ်လေးရှားက Hartford ပညာရေးဘုတ်အဖွဲ့၊ Hartford မြို့အုပ်ချုပ်ရေးအဖွဲ့နှင့် အထူးပညာရေးဆရာများ အနက်မှ တစ်ဦးဖြစ်သော တီလ်ဒါ ဆန်တီယာဂိုတို့ကို တရားစွဲခဲ့ခြင်း ဖြစ်သည်။
(▲ ယခု တရားစွဲဆိုမှုကြောင့် Hartford တွင် ပညာရေးစနစ်တိုးတက်လာစေရန် မျှော်လင့်ထားကြောင်း၊ အနာဂတ် ကျောင်းသားများအနေဖြင့် ယခုကဲ့သို့ မကြုံတွေ့စေလိုကြောင်း အယ်လေးရှားက ပြောသည်)
အိမ်ခြံမြေ ကိစ္စအဝဝနှင့် ပတ်သက်၍ ဥပဒေအကြံပေးပညာရှင်များနှင့် ဆွေးနွေးတိုင်ပင်လိုပါက iMyanmarHouse.com (အိုင်မြန်မာဟောက်စ်ဒေါ့ကွန်း) ၏ ဖုန်းနံပါတ်များဖြစ်သော 09-268022352 , 09-966901767 သို့ ဆက်သွယ်နိုင်ပါသည်။ အသေးစိတ်ကြည့်ရန် ဤနေရာကို နှိပ်ပါ။
ရောင်းရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။
ငှားရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။
(iMyanmarHouse.com Team မှ ရေးသား ဖော်ပြသည်။)
Credit: iMyanmarHouse.com
Ref: Former Connecticut high school student sues teachers for letting her graduate while unable to read or write Photo Credit-dailymail