ပြည်ပ အိမ်ခြံမြေ သတင်း | Posted by ဇာနည်ကျော်
ဘရာဇီးနိုင်ငံရှိ အမေဇုန်တောကြီး၏ အရှေ့မြောက်ဖျားပိုင်းတွင် တည်ရှိသော ဘူရီတီကူးပူ အမည်ရှိ မြို့ကလေးမှာ တဖြေးဖြေးချင်း မြေမြိုခံလာနေရသည်။
လူဦးရေ ၅၅၀၀၀ ခန့်နေထိုင်သော ဘူရီတီကူးပူမြို့လေးတွင် မီတာပေါင်းများစွာ နက်ရှိုင်းသော မြေကျွံချောက်ကြီးများမှာ ပြီးခဲ့သောလအနည်းငယ်အတွင်း မြေပြိုကျမှုများ တစထက်တစ ကြီးထွားလာနေရာ တစ်မြို့လုံး မြေအောက်ရောက်တော့မည့် အန္တရာယ်ကြီး ရင်ဆိုင်နေရသည်။
အန္တရာယ်အကြီးဆုံးနေရာများတွင် နေထိုင်သူပေါင်း ၁၂၀၀ ကို မြို့အာဏာပိုင်တို့က နေရာရွှေ့ပြောင်းပေးခဲ့ပြီး ဖြစ်သည်။
သို့သော် တစ်မြို့လုံးရင်ဆိုင်နေရသည့် ယခုပြဿနာကြီးကို မည်သို့ မည်ပုံဖြေရှင်းရမည်ဟူသော အဖြေတစ်ခု မရှိသေး။
ဘူရီတီကူးပူမြို့လေးတွင် မြေကျွံချောက်ကြီးများ၏ ပြဿနာ စတင်ခဲ့သည်မှာ ဆယ်စုနှစ် ၃ ခုခန့် ရှိခဲ့ပြီ ဖြစ်သည်။
မြေပြိုလွယ်သော သဲဆန်သည့်မြေဖြစ်နေခြင်း၊ မြို့ပြစီမံကိန်းချမှတ်မှု အားနည်းခြင်းနှင့် သစ်တောပြုန်းတီးခြင်း အစရှိသည့် အချက်များကြောင့် ဖြစ်သည်။
သို့သော် မကြာသေးမီကာလများအတွင်း မိုးသည်းထန်စွာ ရွာသွန်းမှုများကြောင့် မြေကျွံချောက်ကြီးများ၏ ပြိုကျမှုများမှာ အလွန်မြန်ဆန်လာသည်။
လွန်ခဲ့သောနှစ်အနည်းငယ်က ဘူရီတီကူးပူမြို့လေးသို့ ဦးတည်နေသည့် မြေကျွံချောက်ကြီး ၂၆ ခုရှိခဲ့သည်။
အချို့ချောက်ကြီးများမှာ ၆၅ ပေခန့် နက်ရှိုင်းလာသည်။
အဆိုပါ အခြေအနေများကြောင့် ဘူရီတီကူးပူတွင် အရေးပေါ်အခြေအနေ ကြေညာလာရသည်။
“ပြီးခဲ့သော လအနည်းငယ်အတွင်း မြေကျွံချောက်ကြီးများ၏ ပြိုကျမှုမှာ လျင်မြန်စွာ ကြီးထွားလာနေပြီး လူနေအိမ်များရှိရာသို့ တဟုန်ထိုးချဉ်းကပ်လာလျက်ရှိသည်” ဟု ဘူရီတီကူးပူတွင် အရေးပေါ်အခြေအနေ ကြေညာကြောင်း ထုတ်ပြန်ခဲ့သည့် အမိန့်စာတွင် ဖော်ပြသည်။
ယခုကဲ့သို့ မြေပြိုမှုကြီးများကို ဘရာဇီးတွင် ဗိုကိုရိုကာဟု ခေါ်ကြသည်။ တိုင်းရင်းသားမျိုးနွှယ်စုတစ်ခု၏ စကားဖြစ်ပြီး သဘာဝပတ်ဝန်းကျင်ပျက်စီးခြင်းဟု အဓိပ္ပာယ်ရသည်။
“အတော်ကြောက်စရာကောင်းပါတယ်။ မိုးအများကြီးမရွာအောင် တခါတခါ ဘုရားမှာ ကျွန်တော်ဆုတောင်း ပါတယ်။ အပြစ်တွေရှိရင် ခွင့်လွှတ်ပေးပါလို့လည်း ဘုရားဆီမှာ တောင်းပန်ပါတယ်” ဟု မြေကျွံချောက်ကြီး တစ်ခုအနီးနေထိုင်သော ဘေးကင်းလုံခြုံရေးဆိုင်ရာ နည်းပညာရှင်တစ်ဦးဖြစ်သူ Nazare Feitosa က ဘရာဇီးအခြေစိုက် Globo သတင်းဌာနသို့ ပြောသည်။
“မိုးရွာပြီဆိုရင် ဒီမှာရှိတဲ့လူတွေ အကုန်ခြောက်ခြားနေရပြီး ဘယ်သူမှ မအိပ်ရဲဘူး။ တစ်ညလုံး ငုတ်တုတ်ထိုင် ရင်း မြေပြိုသံတွေကို နားစွင့်နေရပါတယ်” ဟု ဘူရီတီကူးပူမြို့သားတစ်ဦးက ပြောသည်။
“မြေပြိုသံတွေကြားရင် ကိုယ့်အိမ်နဲ့ နီးလားဆိုတာ ထကြည့်ရပါတယ်။ တကယ်လို့ အိမ်နားမှာဆိုရင် ပြောင်းကြ ရွှေ့ကြရပါတယ်”
ပြီးခဲ့သော ဆယ်နှစ်တာအတွင်း မြေကျွံချောက်ကြီးတစ်ခု ပြိုကျမှုကြောင့် ဘူရီတီကူးပူမြို့လေးရှိ လမ်း ၃ လမ်း နှင့် နေအိမ် အလုံး ၅၀ ကျော် ဆုံးရှုံးခဲ့ရသည်။
အချို့လမ်းများမှာ တစိတ်တပိုင်း မြေပြိုကာ ပျောက်ကွယ်သွားခဲ့ပြီဖြစ်သည်။
အိမ်ခြံမြေ ကိစ္စအဝဝနှင့် ပတ်သက်၍ ဥပဒေအကြံပေးပညာရှင်များနှင့် ဆွေးနွေးတိုင်ပင်လိုပါက iMyanmarHouse.com (အိုင်မြန်မာဟောက်စ်ဒေါ့ကွန်း) ၏ ဖုန်းနံပါတ်များဖြစ်သော 09-268022352 , 09-966901767 သို့ ဆက်သွယ်နိုင်ပါသည်။ အသေးစိတ်ကြည့်ရန် ဤနေရာကို နှိပ်ပါ။
ရောင်းရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။
ငှားရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။
(iMyanmarHouse.com Team မှ ရေးသား ဖော်ပြသည်။)
Credit: iMyanmarHouse.com
Ref: Giant Sinkholes Threaten to Swallow Entire Brazilian Town (odditycentral)