ဗဟုသုတ | Posted by အေးမြတ်သူ
တရုတ်ပြည်တွင် လေယာဉ်မယ်တစ်ဦးက အလုပ်မှ ထွက်ကာ ဝက်မွေးမြူရေးလုပ်ကိုင်ရာ ၂ လအတွင်း ကန်ဒေါ်လာ ၂၈၀၀၀ ဝင်ငွေရရှိသည့်ဖြစ်ရပ် ပြည်မကြီး လူမှုကွန်ရက်တွင် နာမည်ကြီးနေ
တရုတ်ပြည်တွင် လေယာဉ်မယ်တစ်ဦးသည် အလုပ်မှ ထွက်ကာ ဇာတိမြို့သို့ ပြန်သွားခဲ့ပြီး ဝက်မွေးမြူရေးလုပ်ကိုင်ရာ ၂ လအတွင်း ယွမ် ၂၀၀၀၀၀ (ကန်ဒေါ်လာ ၂၈၀၀၀) ရရှိခဲ့သည်။
ယန်ယန်ရှီ အမည်ရှိ အသက် ၂၇ နှစ်အရွယ် မိန်းကလေးသည် တရုတ်ပြည် အရှေ့မြောက်ပိုင်း ဟေးလုံကျန်ပြည်နယ်ရှိ ကျေးလက် မိသားစု တစ်ခုတွင် မွေးဖွားခဲ့သူ ဖြစ်သည်။ တက္ကသိုလ်မှ ဘွဲ့ရပြီးနောက်ပိုင်း ရှန်ဟိုင်း လေကြောင်းလိုင်းတွင် လေယာဉ်မယ်အဖြစ် ၅ နှစ်တာ လုပ်ကိုင်ခဲ့သည်။
ထိုသို့ လုပ်ကိုင်ခဲ့စဉ်အတွင်း လစာမှာ ယွမ် ၂၈၀၀ (ကန်ဒေါ်လာ ၃၈၀) သာ ရရှိခဲ့ကြောင်း ယန်က ပြောသည်။
(ယန်ယန်ရှီသည် မိသားစုနှင့်အတူ နေထိုင်နိုင်ရန် လေယာဉ်မယ်အလုပ်မှ နှုတ်ထွက်ခဲ့သည်။ ဓာတ်ပုံ-Weibo)
ပြည်မကြီး သတင်းဌာန တစ်ခုဖြစ်သော Jiupai News သို့ ပြောသည်မှာ ရှန်ဟိုင်းတွင် နေထိုင်စဉ်ကာလအတွင်း တန်ဖိုးကြီးအိမ်များ ဝယ်ယူရန်အတွက် မိဘများထံမှ မကြာခဏ ငွေကြေး တောင်းခံခဲ့ကြောင်း ပြောသည်။
နောက်ပိုင်းတွင်မှ ယန်ယန်ရှီ သိလာသည်မှာ မြို့ပြတွင် သမီးဖြစ်သူ ကျော့ကျော့မော့မော့ နေထိုင်နိုင်ရေးအတွက် မိဘများမှာ အသုံးအစွဲ ချွေတာခဲ့ရသည့်အပြင် ငွေအလုံးအရင်း ကြွေးတင်နေသည်ကို သိလာခဲ့သည်။
မိခင်ဖြစ်သူမှာ အဆီကျိတ်များ လျှို့ဝှက်စွာ အကြိမ်ကြိမ် ခွဲထုတ်နေရသည်ကို သိလာပြီးနောက်ပိုင်း ၂၀၂၂ ခုနှစ်၊ အောက်တိုဘာလတွင် လေယာဉ်မယ်အလုပ်မှ ထွက်ကာ အိမ်သို့ပြန်ရန် ယန်ယန်ရှီ ဆုံးဖြတ်ခဲ့သည်။
“မိဘတွေက ကျွန်မကို အမြဲတမ်း သတင်းကောင်းပဲ ပြောတယ်။ သတင်းဆိုးဆိုရင် လျှို့ဝှက်ထားတယ်။ အခုချိန်မှာ သူတို့နဲ့ အတူနေချင်ပါတယ်။ နေအိမ်ရဲ့ အဝေးမှာ မနေချင်ပါဘူး”ဟု ယန်ယန်ရှီက ပြောသည်။
၂၀၂၃ ခုနှစ် ဧပြီလတွင် ယန်ယန်ရှီသည် ဆွေမျိုးတစ်ဦး၏ ဝက်ခြံကို ဝယ်ယူလိုက်ပြီး ဝက်များ စတင်မွေးမြူခဲ့သည်။
(ဝက်ခြံတွင် တစ်ရက်တာ နေထိုင်ပြီးနောက် ယန်ယန်ရှီက ပြောသည်မှာ အနံ့များမှာ အလွန် ဆိုးရွားကြောင်း ပြောသည်။ ဓာတ်ပုံ-Weibo)
ယန်ယန်ရှီက သူ၏ ကျေးလက် မွေးမြူရေး လုပ်ငန်းတွင် နေထိုင်ဖြတ်သန်းရသည့်ဘဝကို တရုတ်ပြည်မကြီးရှိ Short Video Platform ဖြစ်သော Weibo တွင် မျှဝေလေ့ရှိသည်။
သူ၏ အကောင့်မှာ Follower ၁ ဒသမ ၂ သန်းရှိသည်။
ဝက်နှင့် အခြား မွေးမြူရေး တိရ စ္ဆာန်များ မွေးမြူခြင်း၊ ရောင်းချခြင်း လုပ်ငန်းမှ ပြီးခဲ့သော ၂ လတာအတွင်း ယွမ် ၂၀၀၀၀၀ (ကန်ဒေါ်လာ ၂၇၀၀၀) ရရှိခဲ့သည်။
ယန်ယန်ရှီက သူ၏ မွေးမြူရေးခြံကို ဆက်လက်ချဲ့ထွင်ရန်၊ ခြံထွက်ပစ္စည်းများ ရောင်းချသည့် စတိုးဆိုင်တစ်ခုဖွင့်ရန်နှင့် ဟိုတယ်တစ်ခုဖွင့်လှစ်ရန် အနာဂတ် အိပ်မက်များ ရှိသည်။
လေယာဉ်မယ်ဟောင်း ယန်ယန်ရှီ၏ ဘဝဖြတ်သန်းမှုမှာ တရုတ်ပြည်မကြီး လူမှုကွန်ရက်တွင် အလွန်နာမည်ကြီးနေသည်။
လူမှုကွန်ရက် သုံးစွဲသူတစ်ဦးက “မိဘအပေါ် သိတတ်မှုက လေးစားစရာပါပဲ။ ရဲရင့်ပြီး ထက်မြက်တဲ့ မိန်းကလေးတစ်ဦးဟာ ဘယ်လိုလုပ်ငန်းကို ရွေးချယ်သည်ဖြစ်စေ ကောင်းကောင်း ရှင်သန်ဖြတ်သန်း ဖြတ်သန်းနိုင်ပါတယ်”ဟု မှတ်ချက်ပြုသည်။
(ယန်ယန်ရှီက သူ၏ ဘဝအပြောင်းအလဲကို လူမှုကွန်ရက်တွင် ဖော်ပြခဲ့ရာ စိတ်ဝင်စားသူ အလွန်များပြားနေသည်။ ဓာတ်ပုံ-Weibo)
အိမ်ခြံမြေ ကိစ္စအဝဝနှင့် ပတ်သက်၍ ဥပဒေအကြံပေးပညာရှင်များနှင့် ဆွေးနွေးတိုင်ပင်လိုပါက iMyanmarHouse.com (အိုင်မြန်မာဟောက်စ်ဒေါ့ကွန်း) ၏ ဖုန်းနံပါတ်များဖြစ်သော 09-268022352 , 09-966901767 သို့ ဆက်သွယ်နိုင်ပါသည်။ အသေးစိတ်ကြည့်ရန် ဤနေရာကို နှိပ်ပါ။
ရောင်းရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။
ငှားရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။
(iMyanmarHouse.com Team မှ ရေးသား ဖော်ပြသည်။)
Credit: iMyanmarHouse.com
Ref: China flight attendant quits job, becomes pig farmer, earns US$28,000 in 2 months Photo Credit-Weibo