ဩရသသားသမီး အခွင့်အရေးအကြောင်း ဥပဒေဗဟုသုတအနေဖြင့် ရေးသားဖော်ပြပေးလိုက်ပါတယ်။

ဩရသသားသမီးဆိုသည်မှာ ရင်၌ဖြစ်သော သားကြီး၊ သမီးကြီးကို ဆိုလိုပါသည်။ ဩရသမှာ တရားဝင် သားရင်း၊ သမီးရင်းဖြစ်ရန် လိုပြီး မိခင်၊ ဖခင် သေဆုံးချိန်တွင် အရွယ်ရောက်ပြီး (၁၈)နှစ် အသက်ပြည့်ပြီးသူ ဖြစ်ရပါမည်။

ဩရသမှာ သားဖြစ်လျှင် ဖခင်သေဆုံးသည့်အခါ ဩရသအခွင့်အရေးတောင်းခံနိုင်ပြီး သမီးဖြစ်လျှင် မိခင်သေဆုံးသည့်အခါ ဩရသအခွင့်အရေး စတင်တောင်ခံနိုင်ပါသည်။သို့သော် သားဖြစ်သူ ဩရသမှ မိခင်ဖြစ်သူ သေဆုံးလျှင် ဖခင်ထံမှ ဩရသအခွင့်အရေး မတောင်းခံနိုင်သလို သမီးဖြစ်သူမှလဲ ဖခင်သေဆုံးလျှင် မိခင်ထံမှ ဩရသအခွင့် အရေး မတောင်းခံနိုင်ပါ။ ဩရသမှာ ရူးသွပ်သူ၊ စိတ်ပေါ့သွပ်သူ၊ ချိနဲ့သူ မဖြစ်ရပါ။

ထို့ပြင် မိခင်ဖခင် သေဆုံးချိန်တွင် ဩရသအခွင့်အရေး တောင်းခံခြင်းမရှိခဲ့လျှင် မိခင်ဖခင် နောက်အိမ် ထောင်ပြုလျှင် ဩရသမှာ အမွေဝေစုကို တောင်းခံနိုင်ပါသည်။ ဩရသမှာ အမွေပစ္စည်း၏ လေးပုံတစ်ပုံအား ရပိုင်ခွင့်ရှိသော်လည်း အမွေဆက်ခံထိုက်သော ဩရသသားသမီးဖြစ်ရန်အတွက် သားဖြစ်လျှင် ဖခင်၏ စီးပွားရေးတွင် ကူညီသည့်သူ၊ သမီးဖြစ်လျှင် မိခင်ကိုယ်စား အိမ်မှုကိစ္စများအား ကူညီလုပ်ကိုင် ဆောင်ရွက်သူ ဝတ္တရား ကျေပွန်သူ ဖြစ်ရပါမည်။

မိဘများ မွေးဖွားသည်မှာ ဒုတိယသားဖြစ်သော်လည်း ပထမသားမှာ အရွယ်မရောက်ခင် သေဆုံးသွားပါက ဒုတိယသားမှာ ဩရသ အခွင့်အရေး ဆက်ခံရရှိပါသည်။ ဩရသမှာ မိရင်း၊ ဖရင်း အပေါ်တွင်သာ အမွေဆက်ခံရေးအတွက် ဩရသအခွင့်အရေးကို တောင်းခံနိုင်ပါသည်။ အမိ၊ အဖက နောက်အိမ်ထောင်ပြုပြီး ၎င်းသေဆုံးပြီးချိန်တွင်တော့ မိထွေး၊ ဖထွေးအပေါ်တွင် ဩရသအခွင့်အရေး မတောင်းဆိုနိုင်ပါ။

အမွေဆက်ခံခွင့်ရှိသော လင်ယောကျ်ားဖြစ်သူမှ သေဆုံးပါကလဲ ၎င်း၏အမွေဆက်ခံခွင့်အား ခွဲဝေပေးရန် မိန်းမဖြစ်သူမှ တောင်းဆိုခွင့်ရှိသည်။ အမွေခွဲဝေခြင်းမပြုရသေးလျှင် သေဆုံးလျှင် ၎င်းနှင့်သက်ဆိုင်သည့် ကျန်ရှိ အမွေဆက်ခံခွင့်ရှိသူများမှ အမွေဝေစုကို ဆက်ခံခွင့်ရှိခြင်းဖြစ်ပါသည်။ (မောင်စိတ်နှင့် မောင်ငြိမ်း (2 U.B.R (1897 -1901) P-146) မောင်ကြီးအိုနှင့် မသက်ပုံ (4Ran, P-513 (P.C)) စီရင်ထုံးတွင် သားသမီးဖြစ်သူမှ မိဘသူများထက်ဦးစွာစော၍ သေဆုံးသောအမှုဖြစ်ပြီး ကျန်ရစ်သူ ချွေးမ၊ သားမက်သည် ယောက္ခမထံမှ အမွေဆက်ခံခွင့် မရှိကြောင်း ဆုံးဖြတ်ထားပါသည်။

အမွေဆက်ခံနိုင်သော သားသမီး (၆)မျိုး ဩရသ၊ ကိတ္တိမ ၊ အပတိဌ ၊ ပုဗ္ဗက ၊ ဟေဳမ၊ ခေတ္တဇ သားသမီး ဟူ၍ရှိရာ ဩရသမရှိသည့်အခါတွင် ကိတ္တိမသားသမီးသည် မွေးစားသားသမီးဖြစ်သောကြောင့် ဩရသအခွင့်အရေး မရရှိကြောင်း ဥပဒေဗဟုသုတအနေဖြင့် ရေးသားဖော်ပြပေးလိုက်ပါသည်။

အိမ်ခြံမြေ ကိစ္စအဝဝနှင့် ပတ်သက်၍ ဥပဒေအကြံပေးပညာရှင်များနှင့် ဆွေးနွေးတိုင်ပင်လိုပါက iMyanmarHouse.com (အိုင်မြန်မာဟောက်စ်ဒေါ့ကွန်း) ၏ ဖုန်းနံပါတ်များဖြစ်သော 09-268022352 , 09-966901767 သို့ ဆက်သွယ်နိုင်ပါသည်။ အသေးစိတ်ကြည့်ရန် ဤနေရာကို နှိပ်ပါ။

ရောင်းရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

ငှားရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

iMyanmarHouse.com ၏ ဥပ​ဒေအကြံ​ပေး ပညာရှင်​အဖွဲ့ မှ အထူးရေးသားဖော်ပြသည်။

Credit: iMyanmarHouse.com