ဓားထိုးခံရကာ မကြာသေးမီက ဆေးရုံမှ ဆင်းလာသူ ဘောလိဝုဒ် ရုပ်ရှင်မင်းသား ဆာအိဖ် အလီခန်း မိသားစုပိုင် ရူပီး ကုဋေ ၁၅၀၀၀ တန်ကြေးရှိ အိမ်ခြံမြေများကို အစိုးရ၏ သိမ်းယူခံရမည့် အလားအလာရှိနေ

ဘောလိဝုဒ်ရုပ်ရှင်မင်းသား ဆာအိဖ် အလီခန်းသည် မွမ်ဘိုင်းမြို့၊ဘန်ဒရအရပ်ရှိ စံအိမ်တွင် ဓားပြတိုက်လုယက်သူ၏ ဓားထိုးခံရကာ Lilavati ဆေးရုံတွင် ၅ ရက်ကြာ ဆေးကုသမှု ခံယူခဲ့ရပြီးနောက် အသက်အန္တရာယ်မရှိဘဲ နေအိမ်သို့ ပြန်ရောက်လာခဲ့ပြီ ဖြစ်သည်။

ဆာအိဖ် အလီခန်းသည် မိမိအား ဆေးရုံလိုက်ပို့ခဲ့သည့် ဘေးတွဲမောင်းသူကို ရူပီး ၅၀၀၀၀ ပေးခဲ့မှုမှာလည်း ထိပ်တန်းသတင်းတစ်ပုဒ် ဖြစ်ခဲ့သည်။

အိမ်သို့ ဘေးကင်းစွာ ပြန်လာနိုင်ခဲ့မှုမှာ ဝမ်းမြောက်ဖွယ်ဖြစ်သော်လည်း အခြားတစ်ဘက်တွင် စိတ်ပျက်ဖွယ် သတင်းဆိုးတစ်ခု ရှိနေသည်။

ဆေ့ဖ်အလီခန်း၏ ပတော်ဒီမိသားစုပိုင် ရူပီး ကုဋေ ၁၅၀၀၀ ခန့် တန်ကြေးရှိသည်ဟု ခန့်မှန်းရသော အိမ်ခြံမြေတို့နှင့် ပတ်သက်သည့်အမှုကို တရားရုံးက စစ်ဆေးမှု နှစ်ပေါင်းများစွာ ဆိုင်းငံ့ထားမှုကို ယခုအခါ မဒရာ ပရာဒက်ရှ်ပြည်နယ် တရားရုံးချုပ်က ရုပ်သိမ်းလိုက်ပြီး ပြန်လည်စစ်ဆေးတော့မည် ဖြစ်သည်။

ဆာအိဖ် အလီခန်း မိသားစုပိုင် အိမ်ခြံမြေများသည် “၁၉၆၈ ခုနှစ် ရန်သူ၏ ပိုင်ဆိုင်မှု အက်ဥပဒေ” အရ သိမ်းဆည်းခံရမည့် အလားအလာရှိနေသည်။

အမှုနှင့် အကျုံးဝင်သော ဆာအိဖ်အလီခန်း မိသားစုပိုင် အိမ်ခြံမြေများမှာ ရူပီး ကုဋေ ၁၀၀၀ တန်ကြေးရှိ Pataudi Flag House အိမ်တော် (ဆာအိဖ် ကလေးဘဝ နေထိုင်ခဲ့သောနေရာ)၊ မဒရာ ပရာဒက်ရှ်ပြည်နယ်မှ Noor-Us-Sabah Palace အမည်ရှိ Luxury ဟိုတယ်၊ မဒရာ ပရာဒက်ရှ်ပြည်နယ် Bhopal မြို့ရှိ Dar-Us-salam အဆောက်အအုံ၊ Bungalow of Habibi ၊ Ahmedabad Palace နှင့် Kohefiza Property တို့ ဖြစ်ကြောင်း Money Control က ဖော်ပြသည်။

(ဆာအိဖ် အလီခန်း မိသားစုပိုင် အိမ်ခြံမြေများမှာ သိမ်းယူခံရမည့် အခြေအနေနှင့် ရင်ဆိုင်နေရသည်)

(မဒရာ ပရာဒက်ရှ်ပြည်နယ်၊ Bhopal မြို့၊ Kohefiza အရပ်မှ အဆောက်အအုံ)

သက်ဆိုင်ရာပုဂ္ဂိုလ်များသည် တရားရုံး၏ ထုတ်ပြန်ချက်အပေါ် စာရွက်စာတမ်းများဖြင့် ရက်ပေါင်း ၃၀ အတွင်း တင်ပြကန့်ကွက်နိုင်ကြောင်း မဒရာပရာဒက်ရှ်ပြည်နယ် တရားရုံးချုပ် တရားသူကြီးက ညွှန်ကြားထားသည်။

(ဆာအိဖ် အလီခန်းသည် ဆာဂျီဒါ ဆူလ်တန်၏ မြေးဖြစ်ပြီး Bhopal မြို့မှ အိမ်ခြံမြေအချို့ကို အမွေရရှိထားခြင်း ဖြစ်သည်) 

((ရန်သူ့ အိမ်ခြံမြေဥပဒေဆိုတာ ဘာလဲ))

၁၉၆၈ ခုနှစ် ရန်သူ့အိမ်ခြံမြေဥပဒေဆိုသည်မှာ အိန္ဒိယ၏ ရန်သူအဖြစ် မှတ်ယူရသောနိုင်ငံများ၊ အထူးသဖြင့် ပါကစ္စတန်နှင့် တရုတ်နိုင်ငံများသို့ ရွှေ့ပြောင်းသွားခဲ့ကြပြီးနောက် အိန္ဒိယတွင် ကျန်ရစ်ခဲ့သော အိမ်ခြံမြေများကို အစိုးရက စီမံခန့်ခွဲရန် ပြဌာန်းထားခြင်းဖြစ်သည်။

အထူးသဖြင့် ပါကစ္စတန်-အိန္ဒိယစစ်ပွဲနှင့် တရုတ်-အိန္ဒိယစစ်ပွဲများအပြီးတွင် အဆိုပါနိုင်ငံသားများက အိမ်ခြံမြေများကို ထားရစ်ကာ သက်ဆိုင်ရာ နိုင်ငံများသို့ ရွှေ့ပြောင်းသွားသူများကို ရည်ညွှန်းခြင်း ဖြစ်သည်။

၁၉၆၅ ခုနှစ် အိန္ဒိယ-ပါကစ္စတန် စစ်ပွဲအပြီးတွင် ယခုဥပဒေကို ပြဌာန်းခဲ့ခြင်းဖြစ်ပြီး အိန္ဒိယအပေါ် ရန်လိုသည့် နိုင်ငံများ၏ နိုင်ငံသားများ ပိုင်ဆိုင်သော အိမ်ခြံမြေများကို ရန်သူ့အိမ်ခြံမြေဟု ရည်ညွှန်းခြင်း ဖြစ်သည်။

ထိုသို့သော အိမ်ခြံမြေများကို အိန္ဒိယအစိုးရ အဖွဲ့အစည်းတစ်ခုဖြစ်သော “ရန်သူ့အိမ်ခြံမြေများ ထိန်းသိမ်းစောင့်ရှောက်ရေးအဖွဲ့” ထံ အပ်နှင်းရသည်။

၂၀၁၇ ခုနှစ်တွင် ရန်သူ့အိမ်ခြံမြေဟူသော အနက်အဓိပ္ပာယ်ဖွင့်ဆိုမှုကို ချဲ့ထွင်ခဲ့ပြီး ဥပဒေအရ အမွေဆက်ခံသူများကိုလည်း အဆိုပါအိမ်ခြံမြေများ ပိုင်ဆိုင်ခွင့် တားမြစ်ခဲ့သည်။ ထို့ကြောင့် ယင်းသို့သော အိမ်ခြံမြေများသည် နောက်ဆုံးပိုင်ရှင်၏ နိုင်ငံသားနှင့် ပိုင်ဆိုင်မှု လက်ပြောင်းလက်လွှဲ ဖြစ်စေကာမူ အစိုးရ၏ ထိန်းချုပ်မှုအောက်တွင်သာ ရှိနေသည်။

(ဘာကြောင့် ဆာအိဖ် အလီခန်းရဲ့အိမ်ခြံမြေတွေ အကျုံးဝင်နေတာလဲ))

မဂိုအင်ပါယာခေတ်က Bhopal မြို့၏ နောက်ဆုံး Nawab (မြို့စားအဆင့်) ဖြစ်သူ ဟာမီဒူလာ ခန်းတွင် သမီး ၃ ဦး ထွန်းကားသည်။

သမီးကြီးဖြစ်သူ အဘီဒါ ဆူလ်တန်မှာ ၁၉၅၀ ပြည့်နှစ်တွင် ပါကစ္စတန်သို့ ပြောင်းရွှေ့သွားသည်။

ဒုတိယသမီးဖြစ်သူ ဆာဂျီဒါ ဆူလ်တန်မှာ အိန္ဒိယတွင် ကျန်ရစ်ခဲ့ကာ အဆိုပါအိမ်ခြံမြေတို့၏ အမွေဆက်ခံသူ ဖြစ်လာသည်။

ဆာဂျီဒါသည် Nawab ဖြစ်သူ Iftikhar Ali Khan Pataudi နှင့် လက်ထပ်ခဲ့သည်။ ဆာအိဖ် အလီခန်းမှာ ဆာဂျီဒါ၏ မြေးဖြစ်ပြီး အိမ်ခြံမြေများကို အမွေဆက်ခံခဲ့ခြင်း ဖြစ်၏။

သို့သော် အိန္ဒိယအစိုးရက ပါကစ္စတန်သို့ အဘီဒါ ဆူလ်တန် ရွှေ့ပြောင်းသွားမှုကို ထောက်ပြကာ ဆာအိဖ် အလီခန်း မိသားစုပိုင် အိမ်ခြံမြေများကို ရန်သူ့အိမ်ခြံမြေဟု သတ်မှတ်ခဲ့ခြင်း ဖြစ်သည်။

အိမ်ခြံမြေ ကိစ္စအဝဝနှင့် ပတ်သက်၍ ဥပဒေအကြံပေးပညာရှင်များနှင့် ဆွေးနွေးတိုင်ပင်လိုပါက iMyanmarHouse.com (အိုင်မြန်မာဟောက်စ်ဒေါ့ကွန်း) ၏ ဖုန်းနံပါတ်များဖြစ်သော 09-268022352 , 09-966901767 သို့ ဆက်သွယ်နိုင်ပါသည်။ အသေးစိတ်ကြည့်ရန် ဤနေရာကို နှိပ်ပါ။

ရောင်းရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

ငှားရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

(iMyanmarHouse.com Team မှ ရေးသား ဖော်ပြသည်။)

Credit: iMyanmarHouse.com

Ref: Saif Ali Khan's family faces potential loss of ₹15,000 crore properties to government acquisition