ဗဟုသုတ | Posted by စည်သူအောင်
● အမည်- Floating Hotel
● ဗိသုကာအဖွဲ့- More Architecture ● အကျယ်အဝန်း- စတုရန်းမီတာ ၈၀၀၀ ● စတင်ဆောက်လုပ်သည့်ကာလ- ၂၀၂၃ ခုနှစ် ● ဓာတ်ပုံမှတ်တမ်း- Kris Provoost ● ဆောက်လုပ်သည့် ကန်ထရိုက်တာ- Zhejiang Dadongwu ဆောက်လုပ်ရေးကုမ္ပဏီ တရုတ်ပြည်သည် စက်မှုနှင့် မြို့ပြအသွင်ပြောင်းလဲမှု ဆယ်စုနှစ်များစွာ အင်တိုက်အားတိုက် လုပ်ဆောင်ခဲ့ရာ ကမ္ဘာ့စီးပွားရေးအင်အားကြီးနိုင်ငံအဖြစ်သို့ ရောက်ရှိလာခဲ့သည်။
ငွေရွှင်သော လူလတ်တန်းစားများ အလွန်တရာများပြားလာနေရာ ပြည်တွင်း ခရီးသွားလုပ်ငန်းမှာလည်း အလွန်ဖွံ့ဖြိုးလာသည်။
တရုတ်ပြည်တွင် မြို့ပြနေ ချမ်းသာကြွယ်ဝသူများစွာမှာ မြို့ပြ၏အပြင်ဘက် အတွေ့အကြုံသစ်များ ရှာဖွေရန် ကျေးလက်ဒေသများသို့ အပန်းဖြေခရီးသွားလာကြသည်။
သဘာဝတရားဆီသို့ ပြန်လာနေကြသူများအတွက် ကျေးလက်ဒေသများတွင် ခေတ်မီဆန်းပြားသော ဟိုတယ်များ ဆောက်လုပ်လာကြသည်။
ထိုသို့သော ဟိုတယ်များတွင် တရုတ်ပြည် အနောက်မြောက်ပိုင်း Zhejiang ပြည်နယ်၊ Huzhou မြို့၊ Anji အရပ် မှ ထူးဆန်းသောဟိုတယ်လည်း ပါဝင်သည်။
ရှန်ဟိုင်းမှ မော်တော်ကားဖြင့်သွားလျှင် ၃ နာရီခရီးအကွာတွင် ရှိသည်။
အဆိုပါဟိုတယ်ကို More Architecture ဗိသုကာအဖွဲ့က ဒီဇိုင်းရေးဆွဲပေးခဲ့ခြင်းဖြစ်ပြီး တောင်များ၏ အပေါ်ဆီတွင် မိုးပျံပူဖောင်းသဖွယ် လေထဲ၌ လွင့်တက်နေသည့်ဟန် မှတ်ထင်ရသည်။
ဟိုတယ်အဆောက်အအုံမှာ တောင်ပေါ်ဝါးတောအလယ်တွင် တည်ရှိပြီး သဘာဝတရားနှင့် သဟဇာတဖြစ်စွာ ပေါင်းစည်းနေသည်။
Anji ၏ တောင်ဘက် Dachangping တောင်ပေါ်ဒေသတွင် ပထမဆုံးအဆောက်အအုံလည်း ဖြစ်သည်။
ကမ္ဘာပေါ်တွင် မြို့ပြအသွင်ပြောင်းလဲမှု အကြီးမားဆုံး လုပ်ဆောင်နေသည့်နေရာဖြစ်သော ယန်စီ မြစ်ဝကျွန်းပေါ်တခွင်တွင် ဤဝါးတောများ ပေါများသောဒေသမှာ စိမ်းလန်းစိုပြည်သည့် အိုအေစစ်တစ်ခု ဖြစ်နေသည်။
လှိုင်းတွန့်သဖွယ် ပုံဖော်ထားသော အမိုးအောက်တွင် ဗိသုကာပညာရှင်တို့က မှန်များဖြင့် ကာရံထားသော နေရာ ၄ ခု ထည့်သွင်းပေးထားရာ Lobby ၊ Yoga room ၊ စားသောက်ဆိုင်၊ မင်္ဂဆောင်နှင့် ပါတီပွဲများကျင်းပရာ ပွဲခန်းမနေရာတို့ဖြစ်ပြီး တောင်ကြား၏ အံ့မခန်းရှုမျှော်ခင်းများကို အပေါ်စီးမှ တွေ့မြင်ရသည်။
ဟိုတယ်၏ ပင်မ amenities များ အောက်ဘက်ဆီတွင် ဟိုတယ်ခန်း ၁၈ ခန်းရှိသည်။ တည်းခိုမည့် ဧည့်သည်တော်များအနေဖြင့် မိမိတို့အခန်းများရှိရာသို့ အပြင်ဘက်ရှိ လှေကားမှတဆင့် တက်ရမည် ဖြစ်သည်။
ဟိုတယ်ရှိ စင်္ကြန်များကို နံရံများဖြင့် ကာရံထားခြင်းမရှိရာ သဘာဝ ပတ်ဝန်းကျင်နှင့် အမြဲထိတွေ့ ကြည့်ရှုခွင့် ရရှိနေမည် ဖြစ်သည်။
အိပ်ယာနှင့် စားပွဲများ အပါအဝင် သစ်သား ပရိဘောဂများကိုလည်း More Architecture က ဒီဇိုင်းရေးဆွဲ ပေးခဲ့ခြင်း ဖြစ်သည်။
ခုံစောင်းများနှင့် အရက်ဘားတို့ကိုမူ တာရာဇိုကို အသုံးပြုကာ ပြုလုပ်ထားသည်။
သံမဏိကော်လံတိုင်များဖြင့် ဟိုတယ်အဆောက်အအုံကို တောင်၏အပေါ် ၈ မီတာခန့် ပင့်မြှောက်ပေးထားရာ အဆောက်အအုံအောက်ဘက်တွင် နေရာလွတ်များစွာ ရှိစေသည်။
ထိုနေရာတွင် ရေကူးကန်နှင့် အဝတ်လဲခန်းတို့ ထားရှိသည်။
အဆောက်အအုံကို အပေါ်သို့ တင်ထားပေးခြင်းကြောင့် အဆောက်အအုံအောက်တွင် သဘာဝနှင့် အတားအဆီးမရှိ ထိတွေ့ခွင့်ရစေသည်။
အိမ်ခြံမြေ ကိစ္စအဝဝနှင့် ပတ်သက်၍ ဥပဒေအကြံပေးပညာရှင်များနှင့် ဆွေးနွေးတိုင်ပင်လိုပါက iMyanmarHouse.com (အိုင်မြန်မာဟောက်စ်ဒေါ့ကွန်း) ၏ ဖုန်းနံပါတ်များဖြစ်သော 09-268022352 , 09-966901767 သို့ ဆက်သွယ်နိုင်ပါသည်။ အသေးစိတ်ကြည့်ရန် ဤနေရာကို နှိပ်ပါ။
ရောင်းရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။
ငှားရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။
(iMyanmarHouse.com Team မှ ရေးသား ဖော်ပြသည်။)
Credit: iMyanmarHouse.com
Ref: Inside the incredible floating hotel 'carved out of a mountain' (archdaily)