တရုတ်ပြည်တွင် ၅၇ ထပ်မြင့်မားသော မိုးမျှော်တိုက်ကြီးကို ၁၉ ရက်အတွင်း ဆောက်လုပ်ခဲ့ပုံ

တရုတ်ပြည်တွင် အထပ်ပါင်း ၅၇ ထပ်ပါဝင်သော ပေ ၇၀၀ နီးပါးမြင့်မားသည့် မိုးမျှော်တိုက်ကြီးကို ဆောက်လုပ်ရေး အထူးနည်းလမ်းများသုံးပြီး ၁၉ ရက်အတွင်း အပြီးဆောက်လုပ်ခဲ့ခြင်းမှာ ကမ္ဘာ့အံ့ဖွယ် စွမ်းဆောင်မှု ဖြစ်ခဲ့သည်။

တရုတ်ပြည်အလယ်ပိုင်း ဟူနန်ပြည်နယ်၏မြို့တော် ချန်ရှားသည် Zhou မင်းဆက်ခေတ်ကတည်းက တည်ရှိခဲ့သော ရှေးဟောင်းမြို့တော် ဖြစ်သည်။

ချန်ရှား၏ ကမ္ဘာလှည့်ခရီးသည်များ အများဆုံးလာရောက်သည့်နေရာမှာ Mawangdui အမည်ရှိ ဟန်မင်းဆက်၏ ဂူသင်္ချိုင်းများ ဖြစ်သည်။

ထို့အပြင် ချန်ရှားသည် တရုတ်ပြည်၏ ခေါင်းဆောင်ကြီး မော်စီတုန်း ကွန်မြူနစ်ပါတီသို့ မဝင်မီကာလက စာပေလေ့လာသင်ယူခဲ့ပြီး ကြီးပြင်းခဲ့သောနေရာအဖြစ်လည်း လူသိများသည်။

ထိုသို့ ကြီးမားသည့် နောက်ခံသမိုင်းများရှိသော ချန်ရှားတွင် ကမ္ဘာ့စံချိန်တင် သမိုင်းရေးထိုးမည့် အဆောက်အအုံကြီးတစ်ခု ပေါ်ပေါက်လာသည်။

ချန်ရှားမြို့၊ အမှတ် ၃ Broad လမ်းတွင် တည်ရှိသော ၅၇ ထပ် အဆောက်အအုံကြီးကို J57 Mini Sky City ဟု အမည်ပေးထားသည်။

J57 ကို သံမဏီသက်သက်ဖြင့် ဆောက်လုပ်ထားပြီး ကွန်ကရစ်တိုင်များ မပါဝင်ချေ။ အဆောက်အအုံ၏ ၉၀ ရာခိုင်နှုန်းကို စက်ရုံတွင် ကြိုတင်ထုတ်လုပ်ပြီးမှ ဆောက်လုပ်ထားခြင်းဖြစ်ရာ ၁ ရက်လျှင် အထပ် ၃ ထပ်အထိ ပြီးစီးအောင် ဆောက်လုပ်နိုင်စွမ်းရှိခဲ့သည်။

(J57 ဟု အမည်ပေးထားသော ၅၇ ထပ်အဆောက်အအုံကြီးကို ၁၉ ရက်အတွင်း ဆောက်လုပ်ခဲ့သည်)

(ဆောက်လုပ်ရာတွင် အသုံးပြုထားသော နည်းစနစ်မှာ လူ့သမိုင်း၏ အကြီးကျယ်ဆုံး တီထွင်မှုများတွင် တစ်ခုအပါအဝင်ဖြစ်ကြောင်း အဆောက်အအုံကြီးကို ဆောက်လုပ်သော ကုမ္ပဏီက ပြောသည်။)

(အခန်းပေါင်း ၈၀၀ ပါဝင်သည်)

အသင့်ထုတ်လုပ်ပြီး အစိတ်အပိုင်းများဖြင့် ဆောက်လုပ်ခြင်းမှာ အဆောက်အအုံတစ်လုံးကို မျက်စိတမှိတ်အတွင်း ဆောက်လုပ်နိုင်နေသည့် ခေတ်ပေါ် နည်းလမ်းတစ်ခု ဖြစ်သည်။

ယခုအဆောက်အအုံကြီးကို ဆောက်လုပ်ရာတွင် ချဉ်းကပ်ပုံနည်းလမ်းမှာ ထုတ်လုပ်ရေးကွက်လပ်တစ်ခုတွင် အဆောက်အအုံအစိတ်အပိုင်းများကို တပ်ဆင်ပြီး လုပ်ငန်းခွင်နေရာသို့ သယ်ဆောင်ခြင်းဖြစ်သည်။

အမြင့် ၆၈၇ ပေရှိသော မိုးမျှော်တိုက်ကြီးကို ဆောက်လုပ်ရာတွင် ကန်ဒေါ်လာ ၁ ဒသမ ၂၅ ဘီလီယံခန့် ကုန်ကျခဲ့သည်ဟု ဆိုသည်။

မိုးမျှော်တိုက်ကြီးတွင် နေထိုင်သူများ အပန်းဖြေရန်အတွက် အပန်းဖြေစရာနေရာများစွာလည်း ထည့်သွင်းပေးထားသည်။

(အဆောက်အအုံကြီးတွင် ခန်းမကြီးပေါင်း ၁၉ ခုပါဝင်ပြီး သဘာဝပတ်ဝန်းကျင်နှင့် သဟဇာတဖြစ်ကြောင်း Developer က ပြောသည်)

(အဆောက်အအုံကြီး ဆောက်လုပ်ခဲ့စဉ်က မြင်ကွင်း)

(ဆောက်လုပ်ရေးလုပ်ငန်းခွင်ကို ညဘက်တွင် တွေ့ခဲ့ရပုံ)

(မူလက အထပ်ပေါင်း ၂၂၀ အထိ ဆောက်လုပ်ရန် စီစဉ်ခဲ့သော်လည်း ဒေသတွင်း လေဆိပ်တစ်ခုနှင့် အလွန်နီးကပ်စွာ တည်ရှိသောကြောင့် အထပ်ရေ လျှော့ချခဲ့ရသည်)

(ဆောက်လုပ်ခဲ့သည့်ကုမ္ပဏီဖြစ်သော Broad Sustainable Building ကုမ္ပဏီသည် ချန်ရှားမြို့တွင်ပင် အထပ် ၃၀ အဆောက်အအုံကြီးတစ်လုံးကိုလည်း ၁၅ ရက်အတွင်း ဆောက်လုပ်ခဲ့သေးသည်)

(တရုတ်ပြည်တွင် လေထုညစ်ညမ်းမှု အခြေအနေဆိုးရွားသောကြောင့် ပုံမှန်ထက် ၄ ဆ ပိုထူသော မှန်များ အသုံးပြုဆောက်လုပ်ခဲ့သည်)

(သယ်ယူပို့ဆောင်ရေး ထရပ်ကားများကြောင့် ညစ်ညမ်းမှုလျှော့ချရေးနှင့် ဆောက်လုပ်မှု မြန်ဆန်ရေးအတွက် အသင့်ဆောက်လုပ်တပ်ဆင်သည့် နည်းလမ်းကို အသုံးပြုခဲ့သည်)

(အဆောက်အအုံ အစိတ်အပိုင်းတစ်ခုကို စက်ရုံမှ ထုတ်လုပ်သယ်ယူလာပုံ)

အိမ်ခြံမြေ ကိစ္စအဝဝနှင့် ပတ်သက်၍ ဥပဒေအကြံပေးပညာရှင်များနှင့် ဆွေးနွေးတိုင်ပင်လိုပါက iMyanmarHouse.com (အိုင်မြန်မာဟောက်စ်ဒေါ့ကွန်း) ၏ ဖုန်းနံပါတ်များဖြစ်သော 09-268022352 , 09-966901767 သို့ ဆက်သွယ်နိုင်ပါသည်။ အသေးစိတ်ကြည့်ရန် ဤနေရာကို နှိပ်ပါ။

ရောင်းရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

ငှားရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

(iMyanmarHouse.com Team မှ ရေးသား ဖော်ပြသည်။)

Credit: iMyanmarHouse.com

Ref: The incredible £1billion sky city that's 700ft tall and took just 19 days to build (dailymail) Photo Credit- Daily Mail