အမေရိကန်ပြည် ကယ်လီဖိုးနီးယားပြည်နယ်တွင် စပျစ်ခင်း ဧက ၄၀ ပါသော ဧက ၂၀၀၀ ကျယ်ဝန်းသည့် ခြံကြီး ကန်ဒေါ်လာ သန်း ၁၀၀ ဖြင့် အရောင်းဈေးကွက်ဝင်လာ

အမေရိကန်ပြည်၊ ကယ်လီဖိုးနီးယားပြည်နယ် ၊ ဆန်ဖရန်စစ္စကိုမြို့၏ မြောက်ဘက် Napa ခရိုင်သည် တောင်စောင်းစပျစ်ခြံများ ဖြန့်ကျက်တည်ရှိသော Napa Valley ဝိုင်ထုတ်လုပ်ရေးဒေသကြီးကြောင့် နာမည်ကြီးသည်။

Napa Valley တွင် Malbec, Merlot နှင့် အခြားစပျစ်မျိုးကွဲများ ဧက ၄၀ ခန့် စိုက်ပျိုးထားပြီး စုစုပေါင်း ခြံအကျယ် ဧက ၂၀၀၀ ရှိသော ခြံကြီးတစ်ခု ကန်ဒေါ်လာ သန်း ၁၀၀ ဈေးခေါ်ကာ အရောင်းဈေးကွက် ဝင်နေသည်။

Wall Street Journal ၏ ဖော်ပြချက်အရ Glendale Ranch အမည်ရှိ အဆိုပါခြံကြီးသည် ၁၉၃၈ ခုနှစ် ကတည်းက မိသားစုတစ်ခုတည်းက ပိုင်ဆိုင်ထားခဲ့ခြင်းဖြစ်သည်ဟု ဆိုသည်။

St.Helena မြို့အနီးတွင် တည်ရှိပြီး ခြံကြီးအတွင်း နေအိမ် ၄ လုံး၊ အလုပ်ရုံတစ်ခု၊ ဝိုင်ထုတ်လုပ်သည့်ရုံ၊ စိုက်ပျိုးရေးလုပ်ငန်းအတွက် အဆောက်အအုံနှင့် ရှည်လျားသော လမ်းကွန်ရက်များ ပါဝင်သည်။

(စုစုပေါင်း ခြံအကျယ် ဧက ၂၀၀၀ ရှိပြီး ဧက ၄၀ မှာ ဝိုင်ထုတ်လုပ်ရေးအတွက် အသုံးပြုထားသည်။ ဓာတ်ပုံ-Tim Carl)

(ဤဒေသတွင် ဤမျှကျယ်ဝန်းသော ခြံကြီး အရောင်းဈေးကွက်တွင် ဝယ်ယူရရှိနိုင်ခြင်းမှာ ရှားပါးသည်။ ဓာတ်ပုံ- Utkan Kokaturk)

လက်ရှိပိုင်ရှင် အမျိုးသမီး Lindsey Wiseman က ယခုခြံကြီးကို ၂၀၂၀ ပြည့်နှစ်တွင် စတင်ပိုင်ဆိုင်ခဲ့ခြင်း ဖြစ်သည်။

၎င်းက Wall Street Journal သို့ ပြောသည်မှာ ဝယ်ယူမည့် ဝယ်လက်အနေဖြင့် ယခုခြံကြီးကို ခွဲခြမ်းစိတ်ဖြာခြင်း မပြုဘဲ လက်ရှိအနေအထားအတိုင်း ဆက်လက်လည်ပတ်သွားမည်ဟု မျှော်လင့်ကြောင်း ပြောသည်။

အသက် ၄၁ နှစ်အရွယ်ရှိ Lindsey သည် ခင်ပွန်းဖြစ်သူ အင်ဒရူး ဂရင်း၊ သားငယ် ၂ ဦးတို့နှင့်အတူ အပြောကျယ်လှသော ခြံဝန်းကြီးတွင် ပျော်ရွှင်စွာ နေထိုင်ဖြတ်သန်းခဲ့ကြသည်။

ခြံဝန်းကြီးအတွင်း ရေကူးကန်များ၊ ရေကန်များလည်းပါဝင်ကာ ပြင်ပကမ္ဘာမှ သီးခြားလွတ်မြောက်နေသည့် နေရာတစ်ခုသဖွယ်ဖြစ်ကာ ကလေးများအတွက် ဆော့ကစားရန် နေရာများစွာလည်း ရှိသည်။

သို့သော် Lindsey တို့မိသားစုသည် အင်္ဂလန်တွင် နေထိုင်လိုသောကြောင့် ယခုခြံကြီးကို ရောင်းချရန် စီစဉ်ရခြင်း ဖြစ်သည်။

ခင်ပွန်းဖြစ်သူ အင်ဒရူး ဂရင်းမှာ အင်္ဂလန်နိုင်ငံသား ဖြစ်သည်။

ဤခြံကြီးတွင် ၁၈၈၀ ပြည့်လွန်ကာလများမှစတင်ကာ ဝိုင်ထုတ်လုပ်ခဲ့သည်ဟု ယူဆရသည်။

အမေရိကန်ပြည်တွင် အရက်သေစာရောင်းချမှုများ ပိတ်ပင်ခဲ့သည့် ကာလအတွင်းတွင်မူ ဝိုင်ထုတ်လုပ်မှု ရပ်တန့်ခဲ့သည်။

၁၉၇၀ ပြည့်လွန်နှောင်းပိုင်းကာလများတွင်မူ ဝိုင်ထုတ်လုပ်မှု ပြန်လည်စတင်ခဲ့သည်။ လက်ရှိကာလတွင် စပျစ်စိုက်ပျိုးသည့် ရာသီဆိုလျှင် ခြံကြီးအတွင်း အလုပ်လုပ်ကိုင်သည့် အလုပ်သမား ၅၀ ဦးခန့် ရှိသည်။

(ဝိုင်ထုတ်လုပ်ရာနေရာ။ ဓာတ်ပုံ-Lindsey Wiseman)

(ချစ်စဖွယ်ကောင်းသော ပင်မနေအိမ်။ ဓာတ်ပုံ-Sasha Moravec)

(နှစ်လိုဖွယ်ကောင်းသော ဆင်ဝင်နေရာ။ ဓာတ်ပုံ-Sasha Moravec)

(မီးလင်းဖိုပါသော ဧည့်ခန်း။ ဓာတ်ပုံ-Sasha Moravec)

(open plan ခင်းကျင်းထားသော ဧည့်ခန်းနှင့် ညစာစားခန်း။ ဓာတ်ပုံ-Tim Carl)

(တစ်ခုသော မီးဖိုဆောင်။ ဓာတ်ပုံ- Tim Carl)

(ရေကန်ငယ်၊ ရေကန်ကြီးများစွာ ပါဝင်သည်။ ဓာတ်ပုံ- Tim Carl)

(ကလေးများအတွက် စူးစမ်းလေ့လာရန် နေရာများစွာရှိသည်။ ဓာတ်ပုံ- Tim Carl)

Ref: Rare 2,000-acre ranch in Napa Valley with 40 acres of working vineyards lists for $100M (nypost) Photo Credit-Sasha Moravec, Tim Carl, Utkan Kokaturk