ကမ္ဘာကြီးကို တပ်လှန့်လိုက်သော လေထုညစ်ညမ်းမှု ပြဿနာ (သို့) ဗီယက်နမ်နိုင်ငံ၏မြို့တော် ဟနွိုင်းတွင် လေထုညစ်ညမ်းမှု အလွန်ဆိုးရွားနေသောကြောင့် မြို့ခံအမျိုးသမီး တစ်ဦးက နေအိမ် ၄ လုံးကို ရောင်းချကာ ထွက်ပြေးတိမ်းရှောင်

ဗီယက်နမ်နိုင်ငံ၊ ဟနွိုင်းမြို့တွင် လေထုညစ်ညမ်းမှု အလွန်ဆိုးရွားနေမှုကြောင့် ဓာတ်မတည့်မှုများ ခံစားရသော မိုင်တွစ် မီးန် (Mai Tuyet Minh) အမည်ရှိ အမျိုးသမီးသည် အိမ် ၄ လုံးကို ရောင်းချပြီး လစာအလွန်ကောင်း သော အလုပ်မှထွက်ကာ အိမ်ပြောင်းရန် ဆုံးဖြတ်လိုက်ရသည်။

အသက် ၄၅ နှစ်အရွယ်ရှိ မိုင်သည် ဟနွိုင်းမြို့တော် Son Tay အရပ်ရှိ ဆင်းရဲသားမိသားစုတွင် မွေးဖွားပြီး အလုပ်အလွန်ကြိုးစားမှုကြောင့် JW Marriott ဟိုတယ်တွင် အဝယ်တော်ဌာန အကြီးအကဲ ဖြစ်လာခဲ့သည်။

မိုင်သည် သွင်းကုန်၊ ထုတ်ကုန် ကိုယ်ပိုင်ကုမ္ပဏီ ၂ ခုလည်း တည်ထောင်ထားသည်။ သူ၏ ဝင်ငွေမှာ တစ်လလျှင် ဒေါင် သန်းရာနှင့်ချီသည်။ (ဗီယက်နမ် ဒေါင်ငွေ သန်း ၁၀၀= ကန်ဒေါ်လာ ၃၉၂၇)

ထိုသို့ ဝင်ငွေကောင်းမွန်မှုကြောင့် ဟနွိုင်းမြို့တော်ရှိ လူကြိုက်များသော နေရာများတွင် နေအိမ် ၅ လုံးအထိ ဝယ်ယူနိုင်ခဲ့သည်။

“ဟနွိုင်းမှာ ရေရှည်နေထိုင်ဖို့ အရင်က စီစဉ်ထားတာပါ။ ဘာကြောင့်လည်းဆိုရင် ဟနွိုင်းမှာက ကျေးလက်ထက် ဝင်ငွေပိုရဖို့ အခွင့်အလမ်းတွေရှိတယ်လို့ ကျွန်မ ယုံကြည်ထားလို့ပါ” ဟု မိုင်က ပြောသည်။

သို့သော် ဟနွိုင်း၏ လေထုညစ်ညမ်းမှုကြောင့် ၂၀၁၅ ခုနှစ်တွင် ကျန်းမာရေးပြဿနာ ရင်ဆိုင်ခဲ့ရပြီး သည်းခြေအိတ် ထုတ်ပစ်ခဲ့ရသည်။

ယင်းနောက်ပိုင်း ၂ နှစ်တာအတွင်း ဓာတ်မတည့်မှုကြောင့် အရေပြား ယောင်ရမ်းကာ အနီပိန့်များ ထခဲ့သည်။

“ကျွန်မရဲ့ ခန္ဓာကိုယ်ဟာ လေထုညစ်ညမ်းမှု တိုင်းတာတဲ့ ပစ္စည်းတစ်ခုလို ဖြစ်နေပါတယ်” ဟု မိုင်က ပြောသည်။

“ကျွန်မ အရေပြား ယားယံလာပြီဆိုရင် နောက်နေ့မှာ AQI (လေထုညစ်ညမ်းမှုညွှန်းကိန်း) ဟာ ခရမ်းရောင် ဖြစ်နေတတ်ပါတယ်။ ဒါက လေထုညစ်ညမ်းမှု အလွန်ဆိုးရွားနေတဲ့ အခြေအနေပါ။ လေထုညစ်ညမ်းမှု ဆိုးရွားလေလေ ကျွန်မရဲ့ အရေပြား ဓာတ်မတည့်မှု အခြေအနေ ဆိုးလေလေပါပဲ”

မိုင်သည် ဓာတ်မတည့်သည့် ရောဂါကုသသော ဆေး antihistamine ကို အမြဲသောက်နေရပြီး ဆေးရပ်လိုက်သည်နှင့် ဓာတ်မတည့်ရောဂါ ပြန်ဖြစ်လာသည်။

ထိုသို့သော ဆေးအမျိုးအစားကို အမြဲသောက်နေလျှင် အသည်းထိခိုက်မည့်အပြင် အရေပြား အခြေအနေ ပိုမိုဆိုးရွားလာမည်ဟု သူ၏ဆရာဝန်က သတိပေးခဲ့သည်။

ဓာတ်မတည့်သည့် ရောဂါ ခံစားနေရမှုကြောင့် မိုင်သည် အလုပ်တွင် အာရုံစူးစိုက်မှု မလုပ်နိုင်သည့်အပြင် မိုးလင်းပြီဆိုသည်နှင့် အိပ်ယာထလိုစိတ်ပင် ကင်းမဲ့စေခဲ့သည်။

သားဖြစ်သူ အထက်တန်းကျောင်းသားမှာလည်း ဓာတ်မတည့်ကာ နှာစေးနှာပိတ်ခြင်း ဆိုးရွားစွာဖြစ်ပွားခဲ့ပြီး မကြာခဏဆိုသလို ပဋိဇီဝဆေးများ သုံးစွဲခဲ့ရသည်။

ထို့အပြင် မိခင်ကြီး၏ ကျန်းမာရေးအခြေအနေမှာလည်း အလွန်ဆိုးရွားလာပြီး နောက်ဆုံးတွင် အဆုပ်ကင်ဆာ ရောဂါခံစားနေရကြောင်း စစ်ဆေးတွေ့ရှိခဲ့သည်။

ဖခင်ကြီးမှာလည်း ရုတ်တရက်လေဖြတ်ကာ အသက်ရှူရ အလွန်ခက်ခဲမှုကို ခံစားလာရသည်။

“ကျွန်မမှာ မပဋာမြေလူးသလိုပါပဲ။ တစ်ခုခုကို ရိုက်ခွဲပစ်ချင်စိတ်တွေ ပေါ်နေပါတယ်” “ကျွန်မစိတ်ထဲ ဘာကိုမှ စိတ်မဝင်စားတော့ဘူး။ ငွေနဲ့ ရာထူးအဆင့်အတန်းတွေက ဘာမှ အရေးမပါဘူးလို့ ခံစားလာရတယ်”

(ဟနွိုင်းမြို့တော်ရှိ Long Bien တံတားကို လေထုညစ်ညမ်းမှုကြောင့် ပေါ်ပေါက်နေသော မြူများအကြား ၂၀၂၄ ခုနှစ်၊ ဒီဇင်ဘာလ ၁၁ ရက်က တွေ့ရပုံ။ ဓာတ်ပုံ-VnExpress/ Ngoc Thanh)

ဗီယက်နမ် သဘာဝအရင်းအမြစ်နှင့် သဘာဝပတ်ဝန်းကျင်ရေးရာ ဝန်ကြီးဌာန၏ ထုတ်ပြန်ချက်အရ ဟနွိုင်းတွင် လေထုညစ်ညမ်းမှုမှာ ပြီးခဲ့သော ၁၀ နှစ်တာအတွင်း အခြေအနေဆိုးရွားလာခဲ့ကြောင်း၊ အထူးသဖြင့် အောက်တိုဘာလမှ ဧပြီလအကြား လေထုညစ်ညမ်းမှု အခြေအနေအလွန်ဆိုးရွားကြောင်း ဖော်ပြသည်။

National Enviromental Status Report (၂၀၁၆ မှ ၂၀၂၀ အထိ) တွင် ဖော်ပြချက်အရ ဟနွိုင်းရှိ လေထုတွင် ဖုန်မှုန်ပါဝင်မှု PM2.5 ရှိရာ တနိုင်ငံလုံးအတိုင်းအတာ၏ ၂ ဆရှိသည်ဟု ဆိုသည်။

၂၀၁၉ ခုနှစ်အတွင်း လေထုညစ်ညမ်းမှုညွှန်းကိန်း AQI အရ ကျန်းမာရေးနှင့် မညီညွှတ်သည့် ပမာဏရှိသော ရက်ပေါင်းမှာ တစ်နှစ်တာ၏ ၃၀ ဒသမ ၅ ရာခိုင်နှုန်း ရှိခဲ့သည်။

အိမ်ခြံမြေ ကိစ္စအဝဝနှင့် ပတ်သက်၍ ဥပဒေအကြံပေးပညာရှင်များနှင့် ဆွေးနွေးတိုင်ပင်လိုပါက iMyanmarHouse.com (အိုင်မြန်မာဟောက်စ်ဒေါ့ကွန်း) ၏ ဖုန်းနံပါတ်များဖြစ်သော 09-268022352 , 09-966901767 သို့ ဆက်သွယ်နိုင်ပါသည်။ အသေးစိတ်ကြည့်ရန် ဤနေရာကို နှိပ်ပါ။

ရောင်းရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

ငှားရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

(iMyanmarHouse.com Team မှ ရေးသား ဖော်ပြသည်။)

Credit: iMyanmarHouse.com

Ref: Woman sells 4 houses, flees Hanoi to escape haze Photo Credit- VnExpress/Ngoc Thanh