ဗြိတိန်တွင် ရေချိုးလျှင် ၂ မိနစ်သာချိုးရန် အိမ်ရှင်က အိမ်ငှားကို ပြောဆို

နေအိမ်မျက်နှာကြက်များ၊ နံရံများတွင် မှိုစွဲနေသည့် အိမ်များကို ငှားရမ်းရခြင်းမှသည် ခေါင်ခိုက်နေသော အိမ်လခများအထိ ယနေ့ခေတ်အိမ်ငှားတို့သည် အိမ်ရှင်ဆိုးများနှင့် ရင်ဆိုင်ရသော ဖြစ်ရပ်များရှိနေသည်။

ဗြိတိန်မှ အိမ်ငှားတစ်ဦးက အိမ်ရှင်ဖြစ်သူမှ ချမှတ်ထားသော စည်းကမ်းတစ်ခုကို လူမှုကွန်ရက်တွင် မျှဝေလာမှုမှာလည်း အံ့ဖွယ်ဖြစ်နေသည်။

အဆိုပါအိမ်ငှားသည် အိမ်ရှင်နှင့်အတူနေရသူ ဖြစ်သည်။

အိမ်ရှင်က အိမ်သို့ ပြန်ရောက်ရမည့်အချိန် သတ်မှတ်ထားသည့်အပြင် ရေချိုးချိန်ကိုလည်း ကန့်သတ်ထားသည်ဟု ဆိုသည်။

သင်တို့အနေဖြင့် ရေချိုးချိန် မည်မျှကြာမည်ဟု ခန့်မှန်းထားပါသနည်း။

တစ်မိနစ် (သို့မဟုတ်) ၂ မိနစ်ဟူသည်မှာ ရေအနည်းငယ်လောင်းရုံ၊ ဆပ်ပြာတိုက်ရုံမျှဖြင့် အချိန်ကုန်သွားနိုင်သည်။

Reddit လူမှုကွန်ရက်တွင် Tenant In The UK ဟူသော စကားပြောဝိုင်း၌ ပါဝင်ဆွေးနွေးသူတစ်ဦးက နေအိမ်တွင် နေထိုင်မှု သဘောတူညီချက်စာရွက်ကို ဓာတ်ပုံရိုက်ကာ ဖော်ပြလာသည်။

စာတွင်ဖော်ပြထားသည်မှာ “အခန်းငှားနေထိုင်သူတို့အနေဖြင့် ရုံးတက်ရက်များတွင် အိမ်သို့ ည ၁၁ နာရီ မတိုင်မီ ပြန်လာလျှင် ကူညီရာရောက်သည်။ အဘယ်ကြောင့်ဆိုလျှင် ညဘက်အိမ်ရှေ့တံခါးသို့ လူတစ်ဦး ရောက်လာလျှင် ခွေးဟောင်မည်ဖြစ်သောကြောင့်ဖြစ်သည်။ ခွေးဟောင်လျှင် အိမ်တွင်နေထိုင်သော အခြားသူများ လန့်နိုးလာနိုင်သည်။” ဟု ဆိုသည်။

သို့သော် အခန်းငှားတို့မှာ ဧည့်လုပ်ငန်းတွင် လုပ်ကိုင်သူများဖြစ်သောကြောင့် ည ၁၁ နာရီ ကာဖြူးမှာ လက်တွေ့မဆန်ချေ။

ထို့ကြောင့် မိမိတို့အခန်းများဆီသို့ ခိုးကြောင်ခိုးဝှက် ပြန်ဝင်ရခြင်းဖြင့်သာ အဆုံးသတ်ရသည်။

ထို့အပြင် စည်းကမ်းချက်စာရွက်တွင် ရေချိုးချိန်ကိုလည်း တစ်မိနစ်မှ ၂ မိနစ်ကြားသာချိုးရန် ကန့်သတ်ထားသည်။

ရေကို အချိန်ကြာကြာချိုးလျှင် ငွေကုန်ကြေးကျများကြောင်း၊ ရေကို ချွေတာရမည်ဖြစ်ကြောင်း ဖော်ပြထားသည်။

“သောက်ခွေးက ဦးထုပ်တစ်လုံး ပြုတ်ကျသံကြားရင်တောင် ထဟောင်နေတာ” ဟု အိမ်ငှားဖြစ်သူက ပြောသည်။

အဆိုပါအိမ်ငှားသည် Reddit တွင် @PotentialWoodpecker1 အမည်ဖြင့် သုံးစွဲသူ ဖြစ်သည်။

“ကျွန်တော်တို့ ရေချိုးတာ နေ့စဉ်ကန့်သတ်ချက်ကို ကျော်လားဆိုတာ အိမ်ရှင်က ရေမီတာကို သိမ်းငှက်မျက်လုံးနဲ့ စောင့်ကြည့်ပါတယ်”

“သူ..အိမ်မှာရှိနေတဲ့အချိန် ရေချိုးရတာ တော်တော်စိတ်ပျက်ဖို့ကောင်းပါတယ်။ ဒါကြောင့် ကျွန်တော်က သူအလုပ်သွားတဲ့အချိန်ကျမှ ရေချိုးပါတယ်”

(အခန်းငှားနေထိုင်သူတို့အား ၂ မိနစ်သာ ရေချိုးရန် ကန့်သတ်ထားသည်။ ဓာတ်ပုံ-Getty Images)

“ဒါတွေ ဖတ်ရတဲ့အချိန်မှာ တချို့သူတွေက တွေးကြမယ်…အိမ်ရှင်မှာ အကြောင်းတစ်ခုခုရှိနေလို့ ငွေကို ခြိုးခြံချွေတာနေတယ်လို့ တွေးနိုင်တယ်။ ဒါပေမယ့် သူ့မှာ အိမ်တွေ အများကြီးပိုင်ထားပြီး Airbnb ကနေ အငှားချထားပါတယ်။ ဆွစ်ဇာလန်မှာရှိတဲ့ အဲလ်ပ်တောင်တန်းကို သူ့ကလေးတွေနဲ့ အပန်းဖြေခရီး မကြာခဏ ထွက်တတ်တယ်”

“လူတစ်ယောက်ရဲ့ ရေချိုးချိန်ကိုတောင် ကန့်သတ်တဲ့..ငွေကို ခြစ်ခြုတ်နေတဲ့သူ တခါမှ မတွေ့ဖူးခဲ့ပါဘူး။ တစ်မိနစ်…နှစ်မိနစ်ပဲ ရေချိုးရတယ်ဆိုတာ အိမ်လို့ မခံစားရဘဲ ထောင်ကျနေသလို ဖြစ်နေပါတယ်”

“ကျွန်တော်အိမ်ငှားတယ်ဆိုတာ အိမ်မှာရှိတဲ့ facility တွေကို အသုံးပြုဖို့လည်း ပါဝင်ပါတယ်။ ကျွန်တော့်ကို ဒီလိုဆက်ဆံတာ တော်တော် မတရားပါဘူး”

အိမ်ခြံမြေ ကိစ္စအဝဝနှင့် ပတ်သက်၍ ဥပဒေအကြံပေးပညာရှင်များနှင့် ဆွေးနွေးတိုင်ပင်လိုပါက iMyanmarHouse.com (အိုင်မြန်မာဟောက်စ်ဒေါ့ကွန်း) ၏ ဖုန်းနံပါတ်များဖြစ်သော 09-268022352 , 09-966901767 သို့ ဆက်သွယ်နိုင်ပါသည်။ အသေးစိတ်ကြည့်ရန် ဤနေရာကို နှိပ်ပါ။

ရောင်းရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

ငှားရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

(iMyanmarHouse.com Team မှ ရေးသား ဖော်ပြသည်။)

Credit: iMyanmarHouse.com

Ref: Renters told to limit showers to two minutes by their landlord (metro)