ထိုင်းနိုင်ငံမှ ကော့ဟင်ဟမ်းကျွန်း၊ အနက်ရောင်ကျောက်စရစ်ခဲများနှင့် ထူးဆန်းသော ကျိန်စာ

ကော့ဟင်ဟမ်းကျွန်း။

ကြည်နူးဖွယ်ကောင်းသလို ကျောချမ်းဖွယ် ကောင်းသောနေရာ…။

ပင်လယ်ကမ်းခြေ နေခြည်အောက်တွင် အဖြူနှင့် အနက် ကျောက်စရစ်ခဲများ ပြန့်ကျဲကာ တောက်ပနေမှုမှာ ကျောက်သံပတ္တမြားများသဖွယ် မှတ်ထင်ရသည်။

ကော့ဟင်ဟမ်းကျွန်းမှာ ရင်သပ်ရှုမောဖွယ်အလှတရားကို ပိုင်ဆိုင်ထားသော်လည်း ကျွန်း၏ ကြောက်မက်ဖွယ် ကျိန်စာကို ကျွန်းပေါ်သို့ ခြေချဖူးသူတိုင်း သိထားကြသည်။

အောင်မြင်သော ယောက်ျားတိုင်း၏ နောက်ကွယ်တွင် အမျိုးသမီးတစ်ဦးရှိသည်ဟူသော စကားကဲ့သို့ပင်။

ယခုကျွန်းတွင် သာယာရှုမောဖွယ်အလှတရားရှိသော်လည်း နောက်ကွယ်တွင် ကြောက်မက်ဖွယ် နတ်ဆိုးတို့က သင့်အား စောင့်ကြည့်နေသည်။

ကော့ဟင်ဟမ်းကျွန်းတွင် ငါးမန်းများမရှိ၊ မြွေများမရှိ။ သို့သော် ကျိန်စာတစ်ခု ရှိနေသည်။

လူမနေသော ခြောက်ခြားဖွယ် ကော့ဟင်ဟမ်းကျွန်းသို့ သွားလိုပါက လိုက်ပို့ပေးမည့် လှေတစ်စီး ရှာရန် လိုသည်။

အနီးရှိ Koh Lipe ကျွန်းတွင် လှေသမားများရှိသည်။

သို့သော် သင့်ကို လိုက်ပို့ရန် လက်ခံမှသာ သွားရောက်နိုင်မည်ဖြစ်၏။ လှေဖြင့် သွားရသောခရီးမှာ မိနစ် ၂၀ ခန့် ကြာသည်။

((ဟိုမှာ..သည်မှာ ကျောက်ခဲများက နေရာတကာ))

ကျောက်စရစ်ခဲများ အတိပြီးသော ကမ်းခြေသို့ ဆိုက်ကပ်သည်နှင့် သင်အမောပြေသွားမည် ဖြစ်သည်။

ကျွန်းပေါ်သို့ လှည့်ပတ်ကြည့်ရှုကာ လူမှုကွန်ရက်တွင် တင်ရန် ဓာတ်ပုံလှလှလေးများ ရိုက်ကူးနိုင်ပါသည်။

သို့သော် ကျွန်းပေါ်တွင် နေထိုင်လည်ပတ်သွားလာရာတွင် သတိပေးတားမြစ်ချက်များအား ပေါ့ပေါ့တန်တန် သဘောမထားရန်လိုအပ်သည်။

ကျွန်းပေါ်တွင် တွေ့ရသော ကျောက်ခဲများကို ယူဆောင်လာခြင်း မပြုမိရန် အရေးကြီးသည်။

ထိုင်းရိုးရာ တာရုတောင် နတ်မင်းက သင့်အား စောင့်ကြည့်နေသောကြောင့် သတိထားသည်မှာ ကောင်းပါသည်။

တာရုတောင် နတ်မင်းက ကျွန်းကို ကျိန်စာတိုက်ထားသည်ဟု ဆိုသည်။

ကျွန်းပေါ်သို့ လာရောက်လည်ပတ်သူတို့သည် ကျောက်စရစ်ခဲများ ယူဆောင်သွားပါက ထာဝရ ကျိန်စာသင့်မည်ဟု ဆိုကြသည်။

ကျွန်းပေါ်မှ ကျောက်ခဲများ ယူဆောင်သွားခြင်းသည် တာရုတောင်နတ်မင်းကို မလေးမစားပြုရာကျပြီး ဘဝတစ်သက်တာလုံး ကံဆိုးမိုးမှောင်ကြမည်ဟု ယုံကြည်ကြသည်။

မည်သူမှ ကံကြမ္မာဆိုးနှင့် ရင်မဆိုင်လိုကြချေ။

ဂရုမစိုက်ဘဲ ကျောက်စရစ်ခဲများ ယူဆောင်သွားသူတို့မှာ ကံကြမ္မာဆိုးများနှင့် ရင်ဆိုင်ကြရလေ့ရှိကြပြီး ၎င်းတို့ယူဆောင်သွားသော ကျောက်ခဲများကို ကော့ဟင်ဟမ်းကျွန်းသို့ စာတိုက်မှတဆင့် ပြန်လည်ပို့ပေးကြသည်။

မိမိတို့ ရင်ဆိုင်နေရသော ကံကြမ္မာဆိုးများ ပြယ်လွင့်စေရန် ရည်ရွယ်ကာ ကျွန်းပေါ်မှယူသွားသော ကျောက်ခဲများ ပြန်ပို့ပေးကြခြင်း ဖြစ်သည်။

ထိုင်းနိုင်ငံ အမျိုးသားပန်းဥယျာဉ်များဌာနသည် ကျောက်တုံးများ၊ ကျောက်စရစ်ခဲများ ပါဝင်သည့်အိတ်များ နှစ်စဉ် လက်ခံရရှိနေသည်။

● ကော့ဟင်ဟမ်းကျွန်း၏ တည်နေရာ ကိုသြဒိနိတ်- 6.5150, 99.2624 ● အနီးဝန်းကျင်မှ အထင်ကရနေရာများ

- Kota Mahsuri (၃၇ မိုင်) (၁၈ ရာစုနှောင်းပိုင်းက မလေးရှားနိုင်ငံ လန်ကာဝီကျွန်းတွင် နေထိုင်ခဲ့သော Mahsuri အမည်ရှိ မိန်းကလေး၏ ဂူသင်္ချိုင်းဖြစ်သည်။ ဒဏ္ဍာရီများအရ Mahsuri သည် အိမ်ထောင်ရေးဖောက်ပြန်သည်ဟု စွပ်စွဲခံရကာ ဓားဖြင့်ထိုးကာ ကွပ်မျက်ခံခဲ့ရသည်ဟု ဆိုသည်။ ယခုအခါ သူ၏ ဂူသင်္ချိုင်းမှာ ကမ္ဘာလှည့်ခရီးသည်များ လာရောက်လည်ပတ်ရာနေရာဖြစ်လာသည်)

- Langkawi Sky Bridge- (၃၈ မိုင်)

အိမ်ခြံမြေ ကိစ္စအဝဝနှင့် ပတ်သက်၍ ဥပဒေအကြံပေးပညာရှင်များနှင့် ဆွေးနွေးတိုင်ပင်လိုပါက iMyanmarHouse.com (အိုင်မြန်မာဟောက်စ်ဒေါ့ကွန်း) ၏ ဖုန်းနံပါတ်များဖြစ်သော 09-268022352 , 09-966901767 သို့ ဆက်သွယ်နိုင်ပါသည်။ အသေးစိတ်ကြည့်ရန် ဤနေရာကို နှိပ်ပါ။

ရောင်းရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

ငှားရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

(iMyanmarHouse.com Team မှ ရေးသား ဖော်ပြသည်။)

Credit: iMyanmarHouse.com

Ref: Koh Hingham: Where the good old souvenir is accompanied by a curse (medium)