ငှက်ပျောသီးကြောက်သော ဆွီဒင်အစိုးရအဖွဲ့မှ အမျိုးသမီးဝန်ကြီး၊ နေအိမ်ထဲသို့ မဝင်မီ အိမ်အလုပ်သမားများက နေအိမ်ထဲတွင် ငှက်ပျောသီး ကင်းရှင်းကြောင်း နေ့စဉ် စစ်ဆေးကြည့်ရှုပေးရ

ဆွီဒင်အမျိုးသမီးဝန်ကြီးတစ်ပါး ငှက်ပျောသီး အလွန်ကြောက်သည့် အကြောင်းရပ်မှာ ဆွီဒင်တွင် တစ်နိုင်ငံလုံး ဆွေးနွေးစရာ ကိစ္စဖြစ်လာနေသည်။

ပေါက်ကြားလာသော အီးမေးလ်များအရ သူ၏ ဝန်ထမ်းတို့သည် အခန်းများအတွင်းသို့ သူ မဝင်မီတွင် ငှက်ပျောသီးကင်းရှင်းကြောင်း စစ်ဆေးပေးရသည်ဟု ဆိုသည်။

ပေါ်လီနာ ဘရန်းဘာ့ဂ် (Paulina Brandberg) (ဆွီဒင် အသံထွက်အားဖြင့် ပေါ်လီနာ ဘရောင်ဘာ့) သည် ဆွီဒင်အစိုးရအဖွဲ့မှ ကျားမ သာတူညီမျှရှိရေးနှင့် အလုပ်ခွင်ဘဝဆိုင်ရာ ဝန်ကြီးဌာန ဝန်ကြီးဖြစ်သည်။

ပေါ်လီနာက ၎င်းတွင် ငှက်ပျောသီးကြောက်သည့်ရောဂါရှိကြောင်း ယခင်ကလည်း ထုတ်ဖော်ပြောကြားခဲ့ဖူးရာ ကမ္ဘာ့အထူးဆန်းဆုံး အကြောက်ရောဂါဟု ဆိုနိုင်သည်။

နိုဝင်ဘာလလယ်ပိုင်းတွင် ပေါက်ကြားလာသော အီးမေးလ်များအရ ဝန်ကြီး၏ ဝန်ထမ်းများသည် ဝန်ကြီးနှင့် ငှက်ပျောသီး ထိပ်တိုက်မတွေ့ဆုံမိစေရန် အမြဲဂရုစိုက်စစ်ဆေးကြရသည်ဟု ဆိုသည်။

Expressen သတင်းစာမှ ဖော်ပြသော အီးမေးလ်တစ်စောင်တွင် “ဝန်ကြီးနှင့် အပေါင်းပါတစ်ဦး အစည်းအဝေးမတက်မီ အခန်းထဲတွင် ငှက်ပျောသီးနှင့် ပတ်သက်သည်များ မရှိစေရ။ ပြင်းထန်သည့် ဓာတ်မတည့်မှုကြောင့် ဖြစ်သည်” ဟု ဖော်ပြထားသည်။

အခြားအီးမေးလ်များတွင် ဖော်ပြချက်များအရ ဝန်ကြီးတက်သည့် ပွဲတိုင်းတွင် သွားလာသည့်နေရာတိုင်း၌ ငှက်ပျောသီးမရှိစေရန် ဆောင်ရွက်ရမည်ဖြစ်ကြောင်း ဖော်ပြသည်။

“ကွန်ဖရင့်ခန်းမတစ်ခုလုံးမှာ ငှက်ပျောသီးမရှိအောင် ကျွန်တော်တို့ ရှင်းလင်းစစ်ဆေးမှု ဆောင်ရွက်ထားပါမယ်” ဟု တုံ့ပြန်ဖြေကြားထားသည်ကိုလည်း တွေ့ရသည်။

ဆွီဒင်ဝန်ကြီးချုပ် Ulf Kristersson က ပြောသည်မှာ ဝန်ကြီး ပေါ်လီနာ၏ အခက်အခဲမှာ အစိုးရအဖွဲ့၏ လုပ်ငန်းဆောင်တာများကို မထိခိုက်ကြောင်း ပြောသည်။

“လူတိုင်းမှာ မတူတဲ့ အကြောက်တရားတွေရှိတယ်ဆိုတာ ကျွန်တော်သိရှိနားလည်ထားပါတယ်” ဟု ဝန်ကြီးချုပ်က ပြောသည်။

ဝန်ကြီး ပေါ်လီနာက သူ၏သတင်းများနှင့် စပ်လျဉ်းပြီး The Guardian သတင်းဌာနကို မှတ်ချက်ပြုရန် ငြင်းပယ်ခဲ့သည်။

သို့သော် ပေါ်လီနာက Expressen သတင်းဌာနသို့ ပြောခဲ့သည်မှာ အဆိုပါပြဿနာကို တတ်သိနားလည်သူတို့၏ အကူအညီဖြင့် ဖြေရှင်းရန် ကြိုးပမ်းနေကြောင်း ပြောသည်။

ဆွီဒင်ပညာရေးဝန်ကြီး Johan Pehrson က ပြောသည်မှာ ဝန်ကြီးပေါ်လီနာနှင့် ပတ်သက်သည့် အီးမေးလ်များ ပေါက်ကြားမှုအပေါ် မီဒီယာက အာရုံစိုက်နေသည်မှာ မိုက်မဲကြောင်း ပြောသည်။

“သူက လစ်ဘရယ်အမာခံတစ်ယောက်ပါ။ အားနည်းတဲ့ မိန်းမသားတွေဘက်မှာ အမြဲရပ်တည်ခဲ့သူပါ။ အဲဒီအပေါ်မှာပဲ ကျွန်တော်တို့ အာရုံစိုက်သင့်ပါတယ်” ဟု Pehrson က X လူမှုကွန်ရက်တွင် ရေးသားခဲ့သည်။

အတိုက်အခံပါတီကလည်း ပေါ်လီနာဘက်မှ ရပ်တည်ကြသည်။

ဆိုရှယ်ဒီမိုကရက်ပါတီမှ ဥပဒေမူဝါဒရေးရာ ပြောရေးဆိုခွင့်ရပုဂ္ဂိုလ် Teresa Carvalho က မိမိတွင်လည်း ပေါ်လီနာကဲ့သို့ ငှက်ပျောသီးကြောက်ရောဂါရှိကြောင်း ပြောသည်။

“သူနဲ့ ကျွန်မတို့ကြားမှာ လုပ်ငန်းခွင် အခြေအနေပြဿနာနဲ့ ပတ်သက်ပြီး အကြိတ်အနယ် ဆွေးနွေးငြင်းခုံခဲ့ရမှုတွေ ရှိခဲ့ပါတယ်။ ဒါပေမယ့် ဒီကိစ္စမှာတော့ ဘုံရန်သူကို ဆန့်ကျင်ဖို့ ကျွန်မတို့ စည်းလုံးစွာ ရပ်တည်ပါတယ်” ဟု Teresa က ပြောသည်။

အိမ်ခြံမြေ ကိစ္စအဝဝနှင့် ပတ်သက်၍ ဥပဒေအကြံပေးပညာရှင်များနှင့် ဆွေးနွေးတိုင်ပင်လိုပါက iMyanmarHouse.com (အိုင်မြန်မာဟောက်စ်ဒေါ့ကွန်း) ၏ ဖုန်းနံပါတ်များဖြစ်သော 09-268022352 , 09-966901767 သို့ ဆက်သွယ်နိုင်ပါသည်။ အသေးစိတ်ကြည့်ရန် ဤနေရာကို နှိပ်ပါ။

ရောင်းရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

ငှားရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

(iMyanmarHouse.com Team မှ ရေးသား ဖော်ပြသည်။)

Credit: iMyanmarHouse.com

Ref: Banana-phobe Swedish minister’s staff insisted on ‘no traces in the room’ (theguardian)