ဖရဲသီးများအတွက် ရုံးပိတ်ရက်သတ်မှတ်ပေးထားသော၊ အသက် ၄၀ အောက်အမျိုးသားများ မုတ်ဆိတ်မွေး ထားခွင့်မရှိသော၊ ကမ္ဘာလှည့်ခရီးသွားများ လည်ပတ်ခြင်းမရှိသော ကမ္ဘာ့အဆန်းကြယ်ဆုံးနိုင်ငံ

ဂင်းနက်စ် ကမ္ဘာ့စံချိန်မှတ်တမ်းအဖွဲ့က စကျင်ကျောက်ဖြင့် ဆောက်လုပ်ထားသော အဆောက်အအုံပေါင်း ၅၄၃ ခုရှိနေသည့် တိုင်းပြည်တစ်ခု၏ မြို့တော်ကို ကမ္ဘာ့စံချိန်တစ်ခုအဖြစ် သတ်မှတ်ဖော်ပြခဲ့သည်။

ထိုအဆောက်အအုံများ၏ ကြမ်းခင်းဧရိယာမှာ စတုရန်းမီတာ ၄ ဒသမ ၅ သန်းရှိသည်ဟု ဆိုသည်။

ဆန်းကြယ်မှုများပြည့်နှက်နေပြီး ကမ္ဘာလှည့်ခရီးသွားများ လည်ပတ်မှုနည်းပါးသော နိုင်ငံအကြောင်း ပြောမည်ဆိုလျှင် လူအများ၏ စိတ်အာရုံတွင် မြောက်ကိုရီးယားကို သတိရလာသည်။

သို့သော် စင်စစ်ကား မြောက်ကိုရီးယားသို့ သွားရောက်လည်ပတ်နေသော ကမ္ဘာလှည့်ခရီးသည် များစွာရှိနေသည်။

ယခုနိုင်ငံမှာမူ ကမ္ဘာလှည့်ခရီးသွားလုပ်ငန်း မရှိသလောက်နီးပါး ဖြစ်၏။

ထိုသို့ဖြစ်ခြင်းမှာ တိုင်းပြည်အစိုးရက ပိတ်ပင်ထားသောကြောင့်မဟုတ်။

အထီးကျန်ဆန်ကာ၊ ဝေးလံခေါင်သီပြီး မရေရာသည့် အခြေအနေများကြောင့် ဖြစ်သည်။

ထိုနိုင်ငံကား…..တာ့ခ်မန်နစ္စတန် နိုင်ငံဖြစ်သည်။

ဗဟိုအာရှနိုင်ငံဖြစ်သော တာ့ခ်မန်နစ္စတန်သည် အံ့ဖွယ်ကောင်းအောင် လှပလွန်းသော နိုင်ငံဖြစ်သည်။

တာ့ခ်မန်နစ္စတန်ရှိ ခမ်းနားထည်ဝါလှသော အဆောက်အအုံတို့က မြင်တွေ့ခွင့်ရသူတိုင်း၏ စက္ခုပသာဒကို ဖမ်းစားနိုင်သော အလှရှိသည်။

သို့သော် တာ့ခ်မန်နစ္စတန်သည် ကမ္ဘာနှင့် အဆက်ပြတ်အထီးကျန်လျက်ရှိ၏။

ထိုနိုင်ငံ၏ အလှတရားများကို သိရှိသူနည်းပါးပြီး နိုင်ငံပြည်သူများမှာလည်း ကမ္ဘာ့အသိုက်အဝန်းနှင့် အဆက်အသွယ်မရှိချေ။

ကမ္ဘာလှည့်ခရီးသွားများ လည်ပတ်ရန် နေရာကောင်းတစ်ခုဖြစ်လာနိုင်သော်လည်း ခရီးသွားအများစု၏ ခရီးစဉ်တွင် တာ့ခ်မန်နစ္စတန် ပါဝင်လေ့မရှိချေ။

((တိုင်းပြည်ထူထောင်မှု))

တာ့ခ်မန်နစ္စတန်သည် ၁၉၂၅ ခုနှစ်မှ ၁၉၉၁ ခုနှစ်အထိ ဆိုဗီယက်ပြည်ထောင်စု၏ ပြည်နယ်တစ်ခုဖြစ်ခဲ့ပြီး ဆိုဗီယက်ပြည်ထောင်စုပြိုကွဲချိန် ၁၉၉၁ ခုနှစ်တွင် တာ့ခ်မန်နစ္စတန်နိုင်ငံဟူ၍ ပေါ်ပေါက်လာသည်။

လူဦးရေ၏ ၆၀ ရာခိုင်နှုန်းခန့်မှာ တူရကီလူမျိုးများဖြစ်သည်။

မြို့တော်မှာ အက်ရှ်ဂါဘက်ဖြစ်ပြီး ချစ်ခြင်းတရား၏မြို့တော်ဟု အဓိပ္ပာယ်ရသည်။

တာ့ခ်မန်နစ္စတန်သည် အလည်အပတ်လာမည့်သူများကို ပိတ်ပင်ထားခြင်းမရှိသော်လည်း ရှုပ်ထွေးသည့် ဗီဇာလုပ်ငန်းစဉ်များကြောင့် ကမ္ဘာလှည့်ခရီးသည်များ ဝင်ရောက်နိုင်ရန် စိန်ခေါ်မှုများ ရှိသည်။

ကမ္ဘာကြီးနှင့် ကာလကြာရှည်အဆက်ပြတ် အထီးကျန်နေသော တာ့ခ်မန်နစ္စတန်သည် ဆန်းကြယ်ကာ သိနားလည်ရခက်သောနိုင်ငံအဖြစ် ဆက်လက်တည်ရှိနေပြီး လည်ပတ်သူ အလွန်တရာ နည်းပါးလှသည်။

တာ့ခ်မန်နစ္စတန်သို့ အလည်အပတ်ရောက်ခဲ့သူ ကမ္ဘာလှည့်ခရီးသည်တစ်ဦးက Counting countries အမည်ဖြင့် အင်စတာဂရမ်လူမှုကွန်ရက်အကောင့်တွင် ဗွီဒီယိုဖိုင်တစ်ခု မကြာသေးမီက တင်ခဲ့ရာ အဆိုပါတိုင်းပြည်၏ တမူထူးသော ယဉ်ကျေးမှုတို့ကို တွေ့မြင်ခွင့်ရခဲ့ကြသည်။

((တာ့ခ်မန်နစ္စတန်၏ ထူးဆန်းသော စည်းမျဉ်းဥပဒေများ))

ကမ္ဘာပေါ်တွင် လည်ပတ်သူအနည်းဆုံးနိုင်ငံဖြစ်သော တာ့ခ်မန်နစ္စတန်သို့ အလည်အပတ်ရောက်သွားသူတိုင်း ထိုနိုင်ငံ၏ အံ့ဖွယ်စည်းမျဉ်းများအပေါ် မျက်လုံးပြူးကြရသည်။

တာ့ခ်မန်နစ္စတန်သို့ အလည်အပတ်ရောက်လာသူတိုင်းကို ယနေ့တိုင် COVID-19 စစ်ဆေးနေဆဲ ဖြစ်သည်။

ဟိုတယ်များမှာမူ ဈေးသက်သာသည်။ နန်းတော်တမျှ ခမ်းနားလှသော ဟိုတယ်ကြီးများတွင် တစ်ညတာ တည်းခိုခ ၅၉ ဒေါ်လာမှ ၇၁ ဒေါ်လာကြားသာ ပေးရသည်။

တာ့ခ်မန်နစ္စတန်တွင် ဖရဲသီးများအတွက် ရုံးပိတ်ရက်သတ်မှတ်ပေးထားခြင်းကဲ့သို့ ထူးဆန်းသည့် ဥပဒေများရှိသည်။

သို့သော် အလွန်ကောင်းသည့်အချက်တစ်ခုမှာ ပြည်သူများကို ရေ၊ လျှပ်စစ်မီး၊ ဓာတ်ငွေ့ အခမဲ့ဖြန့်ဖြူး ပေးထားခြင်း ဖြစ်သည်။

မကြာသေးမီကလည်း စည်းမျဉ်းတစ်ခု ချမှတ်ထားမှုရှိသည်။ နိုင်ငံအတွင်းရှိ အဖြူရောင် အဆောက်အအုံများနှင့် လိုက်ဖက်ညီစေရန်ဟုဆိုကာ မော်တော်ကားများအားလုံး အဖြူရောင်သာဖြစ်ရမည်ဟု သတ်မှတ်လာခြင်း ဖြစ်သည်။ ညစ်ပတ်ပေကျံနေသော ကားများကို မောင်းနှင်ခွင့်မပြုသည့် စည်းမျဉ်းချမှတ်ထားမှုလည်း ရှိသည်။

ထို့အပြင် အသက် ၄၀ အောက် အမျိုးသားများကို မုတ်ဆိတ်မွှေး ထားခြင်းလည်း ခွင့်မပြုချေ။

((ဂင်းနက်စ် ကမ္ဘာ့စံချိန်များ))

တာ့ခ်မန်နစ္စတန်တွင် စကျင်ကျောက်ဖြင့် ဆောက်လုပ်ထားသော အဆောက်အအုံပေါင်း ၅၄၃ လုံးရှိမှုဖြင့် ဂင်းနက်စ် ကမ္ဘာ့စံချိန်မှတ်တမ်းအဖွဲ့က ၂၀၁၃ ခုနှစ်တွင် မှတ်တမ်းတင်ခဲ့သည်။

တာ့ခ်မန်နစ္စတန်၏မြို့တော် အက်ရှ်ဂါဘက်တွင်ရှိသော ကမ္ဘာ့အမြင့်မားဆုံးအလံတိုင်၊ ကမ္ဘာ့အကြီးမားဆုံး ရေတံခွန် complex တို့မှာလည်း ဂင်းနက်စ်စံချိန်တင်ထားသည်။

((တာ့ခ်မန်နစ္စတန်၏ ဗီဇာစည်းမျဉ်း))

တာ့ခ်မန်နစ္စတန်သည် ဗီဇာစည်းမျဉ်း တင်းကြပ်မှုကြောင့် ကမ္ဘာပေါ်တွင် လည်ပတ်သူအနည်းဆုံးနိုင်ငံများ၌ ပါဝင်နေခြင်း ဖြစ်သည်။

အိမ်နီးချင်း ကာဇက်စတန်၊ ဥဇဘက်ကစ္စတန်နှင့် သံတမန် ပတ်စ်ပို့ကိုင်ထားသူများမှလွဲပြီး လာရောက်လည်ပတ်သူအားလုံးနီးပါး ဗီဇာလိုအပ်သည်။

ဗီဇာလျှောက်သည့် လုပ်ငန်းစဉ်မှာ အလွန်တင်းကြပ်သည်။

လျှောက်ထားလိုသူတို့အနေဖြင့် ဖိတ်ကြားစာ (Letter of Invitation-LOI) နှင့်အတူ လျှောက်လွှာ ၃ စုံတင်သွင်းရမည် ဖြစ်သည်။

LOI မှာ တာ့ခ်မန်အစိုးရ ရွှေ့ပြောင်းနေထိုင်မှုဆိုင်ရာဝန်ဆောင်မှုဌာနက ထုတ်ပေးသည်။

LOI ရရှိရန်အတွက် တာ့ခ်မန်နစ္စတန်နိုင်ငံအတွင်းနေထိုင်သူတစ်ဦးက အာမခံ ထောက်ခံပေးမှု လိုအပ်သည်။

ထိုလုပ်ငန်းစဉ်အတွက် ရက် ၂၀ ခန့် ကြာမြင့်နိုင်သည်။ ထိုအချက်မှာ ကမ္ဘာလှည့်ခရီးသည်တို့အတွက် ပိုမိုခက်ခဲစေသည့် အချက်တစ်ခု ဖြစ်သည်။

အိမ်ခြံမြေ ကိစ္စအဝဝနှင့် ပတ်သက်၍ ဥပဒေအကြံပေးပညာရှင်များနှင့် ဆွေးနွေးတိုင်ပင်လိုပါက iMyanmarHouse.com (အိုင်မြန်မာဟောက်စ်ဒေါ့ကွန်း) ၏ ဖုန်းနံပါတ်များဖြစ်သော 09-268022352 , 09-966901767  သို့ ဆက်သွယ်နိုင်ပါသည်။ အသေးစိတ်ကြည့်ရန် ဤနေရာကို နှိပ်ပါ။

ရောင်းရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

ငှားရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

(iMyanmarHouse.com Team မှ ရေးသား ဖော်ပြသည်။)

Credit: iMyanmarHouse.com

Ref: World’s most mysterious country, very beautiful but get no tourists, many places and buildings are… (india)