လန်ဒန်မြို့ အရှေ့ပိုင်းရှိ ကော်ဖီဆိုင်ကြီးမှာ သရဲလွန်စွာခြောက်သောကြောင့် ဆိုင်ဝန်ထမ်းက တစ်ဦးတည်း အလုပ်မလုပ်လိုကြောင်း ပြောဆို

အင်္ဂလန်နိုင်ငံ၊ လန်ဒန်မြို့ကြီးတွင် သရဲတစ္ဆေဇာတ်လမ်းများ မရှိသည့်နေရာဟူ၍ မရှိ။

သို့သော် သိမ်းမြစ်၏ မြောက်ပိုင်း လန်ဒန်အရှေ့ပိုင်း East End အရပ်သည် ပရလောကဇာတ်လမ်းများဖြင့် နာမည်ကြီးပြီး မည်သူမဆို ကျောချမ်းဖွယ်ဖြစ်ရပ်များစွာ ရှိနေသည်။

East End သည် ရှေးအခါက ပြည့်တန်ဆာများကို လည်ပင်းဓားဖြင့်လှီးကာ ဗိုက်ဖောက်သတ်ခဲ့သော စိတ္တဇ လူသတ်သမား Jack the Ripper က လူသတ်မှုများ ကျူးလွန်ခဲ့ရာနေရာဖြစ်သည်။

ထိုသို့ နာမည်ဆိုးဖြင့် ကျော်ကြားခဲ့မှုများ၊ သရဲခြောက်သည့် တောအုပ်များ၊ အရက်ဆိုင်များ၊ မီးရောင်မှိန်ဖျဖျ လမ်းများ၏ သရဲခြောက်သည့်ဖြစ်ရပ်များကြောင့် လန်ဒန်အရှေ့ပိုင်းတွင် နေထိုင်သူများအနေဖြင့် ထိုနေရာများ သို့ သွားရန် နှစ်ကြိမ်ပြန်စဉ်းစားတတ်ကြသည်။

Jack the Ripper က ရက်ရက်စက်စက် လူသတ်မှုများ ကျူးလွန်ခဲ့သော လန်ဒန်အရှေ့ပိုင်း Whitechapel ခရိုင်ရှိ မြူဆိုင်းသော မှုန်ရီရီလမ်းများအနီးတွင် တည်ရှိသော ကော်ဖီဆိုင်လေးတစ်ခုသည်လည်း လွန်စွာ သရဲခြောက်ကြောင်း နာမည်ကြီးနေပြီး ထိုဆိုင်မှာ ဝန်ထမ်းမှာ တစ်ဦးတည်း အလုပ်မလုပ်ဝံ့သည့် အခြေအနေ ဆိုက်နေသည်။

ကော်ဖီဆိုင်၏ အမည်မှာ Pret A Manger ဟုအမည်ရပြီး ပြင်သစ်ဘာသာအားဖြင့် စားရန်အသင့်ဟု အဓိပ္ပာယ်ရသည်။

တည်နေရာမှာ Bethnal Green လမ်း၊ အမှတ် ၁၂၁ တွင်ဖြစ်၏။

ထိုဆိုင်သည် ကျောချမ်းဖွယ်ဇာတ်လမ်းများ အမျိုးမျိုးအဖုံဖုံရှိနေရာ တိုက်ဆိုင်မှုမဟုတ်နိုင်တော့ချေ။

ကော်ဖီဆိုင်၏ လက်ထောက်မန်နေဂျာအဖြစ် တာဝန်ထမ်းဆောင်နေသူ အသက် ၂၈ နှစ်အရွယ် မိန်းကလေး Ginger Rivas သည် ညနက်ပိုင်း အလုပ်ချိန်များတွင် ခြောက်ခြားဖွယ်ဖြစ်ရပ်များနှင့် ရင်ဆိုင်ခဲ့ရပြီးနောက် သူ၏ အလုပ်နေရာမှာ သရဲခြောက်ကြောင်း ထုတ်ဖော်ပြောကြားလာသည်။

(လက်ထောက်မန်နေဂျာ Ginger Rivas မှာ ပရလောကသားတို့နှင့် ရင်ဆိုင်ခဲ့ရသည်။ ဓာတ်ပုံ-Zeena Event photography)

(တစ်ခုသော ညနက်ပိုင်းတွင် CCTV ကင်မရာများ တဖျတ်ဖျတ်ဖြစ်နေသည်ကို တွေ့လိုက်ရပြီးနောက် Ginger Rivas တစ်ယောက် ကြက်သီးဖြန်းဖြန်းထခဲ့ရသည်။ ဓာတ်ပုံ-Zeena Event photography)

၂၀၂၂ ခုနှစ်၊ တစ်ခုသော ဆောင်းဦးကာလ၏ ညပိုင်း အမှောင်ထုအောက်တွင် Ginger သည် ဆိုင်ဝန်ထမ်းတစ်ဦးနှင့်အတူ ဆိုင်ပိတ်နေ၏။

“လုပ်ဖော်ကိုင်ဖက်တစ်ယောက်နဲ့အတူ မီးဖိုဆောင်ရှိတဲ့ မြေအောက်ခန်းမှာ ကျွန်မ အလုပ်လုပ်နေခဲ့ပါတယ်။ အဲဒီအချိန်မှာ CCTV မျက်နှာပြင်တွေက တဖျတ်ဖျတ်ဖြစ်နေတာကို သတိထားမိခဲ့ပါတယ်။” ဟု Ginger က ပြောပြသည်။

“ကျွန်မလည်း ရုံးခန်းရှိရာကိုသွားပြီး စီစီတီဗွီကို စောင့်ကြည့်တယ်။ ကျွန်မရဲ့ လုပ်ဖော်ကိုင်ဖက်က အခန်းထဲ ပြေးဝင်လာပြီး…အစ်မ အသံကြားလိုက်လား…လို့ မေးပါတယ်”

“ကျွန်မတို့ မြေအောက်ခန်းဆီ ပြန်သွားခဲ့တဲ့အချိန်မှာ အပေါ်ထပ်က ခြေသံဖွဖွ လျှောက်သံတွေ ကြားရပါတယ်။ အမျိုးသမီးတစ်ယောက် ခြေသံဖွဖွနဲ့ ချွတ်နင်းပြီး လျှောက်သလိုမျိုးပေါ့။ စီစီတီဗွီမှာတော့ လူတစ်ယောက်မှ မတွေ့ရတာကြောင့် ကျွန်မတို့ ကြက်သီးတွေ ထခဲ့ကြတယ်”

နောက်တစ်နေ့ညတွင် ထိုသို့သောဖြစ်ရပ်မျိုး ထပ်မံရင်ဆိုင်ရပြန်သည်။

(ဆန်းကြယ်သောဖြစ်ရပ်များကြောင့် Ginger က ညနက်ပိုင်း အလုပ်ဆိုင်းများဆင်းရန် ငြင်းပယ်ခဲ့သည်။ ဓာတ်ပုံ-Zeena Event photography)

“စီစီတီဗွီက ရွေ့နေပြီး မှိတ်ချည်လင်းချည်ဖြစ်နေတယ်။ ကျွန်မ မြေအောက်ခန်းထဲကို ထပ်ပြီးမသွားချင် တော့ပါဘူး။ အဲဒီနောက်ပိုင်း ဆိုင်ပိတ်ချိန် အလုပ်ဆိုင်းတွေကို မဆင်းတော့ပါဘူး”

“ဆိုင်ပိတ်ချိန်တွေမှာ ကျွန်မ အလုပ်မလုပ်တော့ပါဘူး။ တစ်ယောက်ယောက် (ဒါမှမဟုတ်) တစ်ခုခု ကိုယ့်ဘေးမှာ ရှိနေသလို ခံစားရပါတယ်။ လန်ဒန်က အဆောက်အအုံ အများစုဟာ အိမ်အိုအိမ်ဟောင်း ကြီးတွေပါ။ ဒါကြောင့် သရဲရှိနိုင်ပါတယ်”

ကော်ဖီဆိုင်လေး ဖွင့်လှစ်ထားရာ ခေတ်ဟောင်းအဆောက်အအုံကြီး၏ ဆန်းကြယ်သောဖြစ်ရပ်များမှာ ထိုမျှဖြင့် ရပ်မနေ။

ပြီးခဲ့သော ရက်သတ္တပတ်အတွင်းကလည်း Ginger သည် မနက်အစောပိုင်း အလုပ်ဆိုင်းအတွက် မြေအောက်ခန်းရှိ ရုံးခန်းတွင် ရှိနေစဉ် နောက်ဘက်တံခါးကို ကုတ်ခြစ်နေသည့် အသံတစ်ခု ကြားခဲ့ရသည်။

(Ginger သည် တစ်မနက်တွင် နောက်တံခါးဆီမှ ကုတ်ခြစ်သံကြီး ကြားခဲ့ရသည်။ ဓာတ်ပုံ-Zeena Event photography)

“အချိန်က မနက် ၄ နာရီလောက်ပေါ့။ အသံက တစ်ယောက်ယောက် အထဲကိုဝင်ဖို့ ကုတ်ခြစ်နေသလိုမျိုး။ အသံက စူးရှပြီး သတ္တုတစ်ခုပေါ်ကို လက်သည်းနဲ့ ကုတ်ခြစ်သလိုမျိုးပါ။ တကယ်ကို ထိတ်လန့်စရာကောင်းပါတယ်”

“အဲဒီကတည်းက အပြင်မှာ အဖော်တစ်ယောက်ယောက်ကို စောင့်ပြီးမှ အထဲကိုဝင်ပါတယ်။ ကျွန်မနဲ့ အတူသွားမယ့်အဖော်မရှိရင် အဲဒီထဲကို မဝင်ရဲတော့ပါဘူး” ဟု Ginger က ပြောသည်။

ပရလောကဖြစ်ရပ်များနှင့် ရင်ဆိုင်နေရခြင်းအပေါ် ဆိုင်ဝန်ထမ်းများ စိတ်မသက်မသာဖြစ်ခဲ့ကြသည်။ လွန်ခဲ့သော ၂ နှစ်ခန့်က ဝန်ထမ်းတို့သည် ဝိဉာဉ်လောကနှင့် ဆက်သွယ်နိုင်သည်ဟု အနောက်တိုင်းတွင် ယုံကြည်ထားကြသော Ouija ဆိုသည့် ဘုတ်ခုံတစ်ခု ယူဆောင်လာကာ စမ်းသပ်ခဲ့ကြသေးသည်။

သို့သော် အဖြေမရ။ မေးခွန်းများသာ ပိုတိုးလာသည်။

(Pret ကော်ဖီဆိုင်သည် ရှေးအခါက စိတ္တဇလူသတ်သမား Ripper က လူ ၂ ဦး ရက်ရက်စက်စက် သတ်ခဲ့ဖူးသော နေရာအနီးတွင် တည်ရှိသည်။ ဓာတ်ပုံ-Zeena Event photography)

အိမ်ခြံမြေ ကိစ္စအဝဝနှင့် ပတ်သက်၍ ဥပဒေအကြံပေးပညာရှင်များနှင့် ဆွေးနွေးတိုင်ပင်လိုပါက iMyanmarHouse.com (အိုင်မြန်မာဟောက်စ်ဒေါ့ကွန်း) ၏ ဖုန်းနံပါတ်များဖြစ်သော 09-268022352 , 09-966901767  သို့ ဆက်သွယ်နိုင်ပါသည်။ အသေးစိတ်ကြည့်ရန် ဤနေရာကို နှိပ်ပါ။

ရောင်းရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

ငှားရန်အိမ်ခြံမြေများကို သင်စိတ်တိုင်းကျ ရှာဖွေရန်အတွက် ဤနေရာကို နှိပ်ပါ။

(iMyanmarHouse.com Team မှ ရေးသား ဖော်ပြသည်။)

Credit: iMyanmarHouse.com

Ref: London’s most haunted café is so terrifying staff refuse to work alone (metro) Photo Credit- Zeena Event photography